કચ્છ, 06 એપ્રિલ (હિ.સ.) : રાષ્ટ્રીય દરિયાઈ દિવસના અવસરે કંડલા સ્થિત દીનદયાળ પોર્ટ ઓથોરિટીએ પોતાના ગૌરવપૂર્ણ પ્રદર્શન અને ભવિષ્યલક્ષી પહેલોથી સમગ્ર દેશનું ધ્યાન આકર્ષ્યું છે. 5 એપ્રિલે યોજાયેલી પ્રેસ મીટમાં પોર્ટના ચેરમેન સુશીલ કુમાર સિંઘના માર્ગદર્શન હેઠળ પોર્ટ દ્વારા હાંસલ કરાયેલા ઐતિહાસિક આંકડા અને નવીન પહેલોની વિસ્તૃત માહિતી આપવામાં આવી હતી. દરિયાઈ ક્ષેત્ર સાથે સંકળાયેલા તમામ લોકો માટે આ પ્રસંગ ગર્વ અને પ્રેરણાનો બની રહ્યો હતો.

ચેરમેનએ પોતાના સંબોધનમાં દરિયાઈ સમુદાયને શુભેચ્છાઓ પાઠવી અને જણાવ્યું કે, દેશના વેપાર અને વિકાસમાં દરિયાઈ ક્ષેત્રની ભૂમિકા અતિમહત્ત્વપૂર્ણ છે. તેમણે ખાસ ઉલ્લેખ કર્યો કે સતત પ્રયત્નો અને સહકારના કારણે જ ભારતનું દરિયાઈ ક્ષેત્ર વૈશ્વિક સ્તરે મજબૂત બની રહ્યું છે.

રાષ્ટ્રીય દરિયાઈ દિવસનું મહત્ત્વ પણ આ પ્રસંગે ઉજાગર થયું, જે 1919માં ‘SS Loyalty’ નામના જહાજની ઐતિહાસિક સફરને યાદ કરાવે છે. આ જહાજે મુંબઈથી લંડન સુધીની મુસાફરી કરી ભારતના શિપિંગ ક્ષેત્રમાં આત્મનિર્ભરતાનો પાયો મૂક્યો હતો. આજનો દિવસ તે ગૌરવશાળી પરંપરાને આગળ વધારવાનો સંદેશ આપે છે.

કંડલા પોર્ટ માટે આ વર્ષ વિશેષ રહ્યું છે. કારણ કે, નાણાકીય વર્ષ 2025-26 દરમિયાન પોર્ટે 160 મિલિયન મેટ્રિક ટનથી વધુ કાર્ગો હેન્ડલ કરીને દેશના તમામ મુખ્ય બંદરોમાં પ્રથમ સ્થાન મેળવ્યું છે. આ આંકડો માત્ર સંખ્યાત્મક સિદ્ધિ નથી પરંતુ પોર્ટની કાર્યક્ષમતા, સંચાલન અને ટીમવર્કનું પ્રતિબિંબ છે. ગયા વર્ષની સરખામણીએ નોંધપાત્ર વૃદ્ધિ નોંધાઈ છે, જે પોર્ટના સતત વિકાસને દર્શાવે છે.

વિવિધ કાર્ગો સેગમેન્ટમાં થયેલી વૃદ્ધિ પણ આ સફળતામાં મહત્વપૂર્ણ રહી છે. ખાતર, પ્રવાહી કાર્ગો અને કન્ટેનર ટ્રાફિકમાં નોંધપાત્ર વધારો થયો છે, જ્યારે લોખંડ, સ્ટીલ અને અન્ય સામગ્રીમાં પણ સારો વધારો જોવા મળ્યો છે. કેટલાક ક્ષેત્રોમાં ઘટાડો હોવા છતાં, પોર્ટની સમગ્ર કામગીરી મજબૂત રહી છે અને કુલ વોલ્યુમમાં વધારો નોંધાયો છે.

આ પ્રસંગે ગ્રીન મેરિટાઇમ ફ્યુચર તરફ એક મહત્વપૂર્ણ પગલું પણ ચર્ચામાં રહ્યું. કંડલા પોર્ટે મેથેનોલ બંકરિંગનું સફળ પ્રદર્શન કરીને પર્યાવરણમિત્ર ઈંધણ તરફ આગળ વધવાનો સંદેશ આપ્યો છે. આ પહેલ વૈશ્વિક સ્તરે 2050 સુધી નેટ-ઝીરો ઉત્સર્જનના લક્ષ્ય સાથે સુસંગત છે અને ભારતના પોર્ટ ક્ષેત્ર માટે નવી દિશા નિર્ધારિત કરે છે.

આ સિદ્ધિઓની ઉજવણી દરમિયાન પોર્ટના અધિકારીઓ, કર્મચારીઓ અને શ્રમિકોને સન્માનિત કરવામાં આવ્યા હતા. તેમની મહેનત અને યોગદાનને માન આપી વિવિધ કાર્યક્રમો યોજાયા અને શ્રમિકોને ઉપયોગી કિટ્સ આપવામાં આવી હતી, જે પોર્ટ પરિવારની એકતા અને સહકારને ઉજાગર કરે છે.

ચેરમેન સુશીલ કુમાર સિંઘે અંતમાં જણાવ્યું કે, આ સિદ્ધિ માત્ર એક માઇલસ્ટોન નથી પરંતુ ભવિષ્ય માટે નવી તકોનું દ્વાર છે. વડાપ્રધાન નરેન્દ્ર મોદીના વિઝન અનુસાર કંડલા પોર્ટ દેશને આત્મનિર્ભર અને વૈશ્વિક સ્પર્ધામાં આગળ રાખવા માટે સતત પ્રયત્નશીલ રહેશે.

કંડલા પોર્ટની આ સફળતા માત્ર ગુજરાત માટે નહીં પરંતુ સમગ્ર ભારતના દરિયાઈ ક્ષેત્ર માટે ગૌરવનો વિષય બની છે, જે દેશના વિકાસમાં મહત્વપૂર્ણ યોગદાન આપી રહી છે.

---------------

હિન્દુસ્થાન સમાચાર / Rohit R. Padhiyar