પાટણ, 01 મે (હિ.સ.) : પાટણની એડિશનલ જ્યુડિશિયલ મેજિસ્ટ્રેટ ફર્સ્ટ ક્લાસની અદાલતે ઘરેલું હિંસા અને માનસિક ત્રાસના એક કેસમાં પતિ અને તેની પ્રેયસીને દોષિત ઠેરવી 2 વર્ષ અને 6 માસની કેદની સજા ફટકારી છે. આ કેસની વિગત મુજબ, પાટણ શહેરની કૌમારીબેનના લગ્ન 10 ડિસેમ્બર, 2018ના રોજ ધવલ રાવલ સાથે થયા હતા. લગ્નજીવનના એક વર્ષ બાદ પતિ ધવલ રાવલને ગોરલબેન ત્રિવેદી સાથે લગ્નેતર સંબંધો થયા, જેના પરિણામે પત્ની સાથે શારીરિક અને માનસિક ત્રાસ શરૂ થયો.

ફરિયાદી પક્ષના પુરાવા મુજબ, પતિ અન્ય મહિલાના સંપર્કમાં આવ્યા પછી પત્ની સાથે અવારનવાર ઝઘડા કરતો હતો. દહેજની માંગણી સંતોષવામાં આવી હોવા છતાં ત્રાસ ચાલુ રહ્યો. 6 ઓગસ્ટ, 2021ના રોજ ગોરલબેન ત્રિવેદી ફરિયાદીના ઘરમાં આવી, પતિની હાજરીમાં ઘર છોડી દેવા ધમકાવી અને ગાળાગાળી કરી હતી.

આ કેસની તપાસ દરમિયાન, પોલીસ દ્વારા ટેકનિકલ પુરાવા તરીકે વોટ્સએપ ચેટ, ઓડિયો રેકોર્ડિંગ અને ફોટોગ્રાફ્સ રજૂ કરવામાં આવ્યા હતા. આરોપી પક્ષે આ પુરાવાઓ સાથે છેડછાડ થયો હોવાનું દાવો કર્યો, પરંતુ અદાલતે તેને નકારી દીધી. અદાલતે આકર્ષણ કર્યું કે પતિના લગ્નેતર સંબંધો પત્ની માટે ગંભીર માનસિક ત્રાસ સમાન છે.

અદાલતે અંતિમ ચુકાદામાં મુખ્ય આરોપી ધવલ રાવલને 2 વર્ષની સાદી કેદ અને 10,000 રૂપિયા દંડ તથા કલમ 504 હેઠળ 6 માસની કેદ અને 5,000 રૂપિયા દંડની સજા ફટકારી. અન્ય આરોપી ગોરલબેન ત્રિવેદીને કલમ 504 અને 114 હેઠળ 6 માસની સાદી કેદ અને 5,000 રૂપિયા દંડ ફટકાર્યો. અદાલતે આદેશ કર્યો છે કે દંડની રકમ ફરિયાદીને વળતર પેટે ચૂકવવી.

હિન્દુસ્થાન સમાચાર / હાર્દિક રાઠોડ