જમ્મુ, નવી દિલ્હી, 29 મે (હિ.સ.). આ વર્ષે 57 દિવસની અમરનાથ યાત્રાની સુરક્ષા માટે અર્ધલશ્કરી દળોની 670 કંપનીઓ તૈનાત કરવાનો નિર્ણય લેવામાં આવ્યો છે. આ તીર્થયાત્રા 3 જુલાઈથી શરૂ થઈને 28 ઓગસ્ટ સુધી ચાલશે. આ વર્ષે દેશભરમાંથી મોટી સંખ્યામાં શ્રદ્ધાળુઓ દક્ષિણ કાશ્મીર હિમાલયમાં ભગવાન શિવના પવિત્ર હિમશિવલિંગના દર્શન કરે તેવી આશા છે. દક્ષિણ કાશ્મીર હિમાલયમાં સ્થિત અમરનાથ જી ગુફા મંદિર સહિત યાત્રા માર્ગમાં કેટલીક ઊંચાઈવાળા વિસ્તારો અને રાષ્ટ્રીય ધોરીમાર્ગોના કેટલાક ભાગો પર સેના પણ તૈનાત રહેશે.

આ વર્ષની યાત્રા લગભગ બે મહિના સુધી ચાલશે અને કેન્દ્ર સરકાર સુરક્ષા વ્યવસ્થાને લઈને કોઈ જોખમ લેવા માંગતી નથી, તેથી જમ્મુ-કાશ્મીરના ઉચ્ચ સુરક્ષા અધિકારીઓ સાથે પરામર્શ કર્યા પછી કેન્દ્રીય ગૃહ મંત્રાલયે સુરક્ષા વ્યવસ્થાને અંતિમ રૂપ આપ્યું છે. આ વર્ષે સેન્ટ્રલ આર્મ્ડ પોલીસ ફોર્સ (સીએપીએફ) ની 670 કંપનીઓ જમ્મુ-કાશ્મીરના પ્રવેશદ્વાર લખનપુરથી લઈને દક્ષિણ કાશ્મીર હિમાલયમાં આવેલી પવિત્ર ગુફા મંદિર સુધી તૈનાત કરવામાં આવશે. જેમાં નુનવાન (પહલગામ) અને બાલતાલના બેઝ કેમ્પ, યાત્રી નિવાસ જમ્મુ (જ્યાંથી દરરોજ સવારે કાફલો નીકળે છે), પઠાણકોટ-જમ્મુ અને જમ્મુ-શ્રીનગર રાષ્ટ્રીય ધોરીમાર્ગ અને તમામ મહત્વપૂર્ણ યાત્રા માર્ગો તેમજ શ્રદ્ધાળુઓ દ્વારા મુસાફરી કરવામાં આવનારા અન્ય સ્થળોનો સમાવેશ થાય છે. અર્ધલશ્કરી દળોની વધારાની કંપનીઓ જૂનની શરૂઆત સુધીમાં કેન્દ્રશાસિત પ્રદેશમાં પહોંચવાનું શરૂ કરી દેશે અને સંપૂર્ણ તૈનાતી તીર્થયાત્રા શરૂ થવાના લગભગ એક અઠવાડિયા પહેલા પૂર્ણ થઈ જશે.

અધિકારીઓએ જણાવ્યું કે, અમરનાથ તીર્થયાત્રાની સુરક્ષા વ્યવસ્થામાં જમ્મુ-કાશ્મીર પોલીસ પણ મહત્વની ભૂમિકા ભજવશે. તેમણે આગળ કહ્યું કે અર્ધલશ્કરી કંપનીઓ અને પોલીસની તૈનાતી કરવામાં આવશે. આ સુરક્ષા વ્યવસ્થા એવી રીતે ગોઠવવામાં આવી છે કે નિયમિત આતંકવાદ વિરોધી અભિયાનોમાં કોઈ અવરોધ ન આવે. બાલતાલ અને ચંદનવાડીના બંને ટ્રેક (માર્ગો) ની સાથે-સાથે પવિત્ર ગુફા મંદિરની સુરક્ષા વ્યવસ્થા પર વિશેષ ધ્યાન આપવામાં આવી રહ્યું છે. જમ્મુ-કાશ્મીરમાં વિવિધ સુરક્ષા સમીક્ષા બેઠકોમાં આ અંગે આયોજન કરવામાં આવ્યું છે. બાલતાલ, નુનવાન અને યાત્રી નિવાસ જમ્મુના બેઝ કેમ્પમાં પણ મહત્તમ સુરક્ષા વ્યવસ્થા કરવામાં આવશે. રોડ ઓપનિંગ પાર્ટી (આરઓપી) ઉપરાંત, અર્ધલશ્કરી દળો અને સ્થાનિક પોલીસ દ્વારા રાષ્ટ્રીય ધોરીમાર્ગ પર નિયમિત પેટ્રોલિંગ કરવામાં આવશે.

જમ્મુ-શ્રીનગર રેલવે ટ્રેક પર પણ સુરક્ષા વ્યવસ્થા કડક કરવામાં આવશે, કારણ કે મોટી સંખ્યામાં શ્રદ્ધાળુઓ વંદે ભારત એક્સપ્રેસ ટ્રેનો દ્વારા શ્રીનગર જાય તેવી આશા છે. હાલમાં જમ્મુ અને શ્રીનગર વચ્ચે બે ટ્રેનો દોડી રહી છે અને યાત્રા દરમિયાન તેની સંખ્યા વધવાની શક્યતાને નકારી શકાય નહીં. પંજાબ નેશનલ બેંક (પીએનબી) ઉપરાંત જમ્મુ એન્ડ કાશ્મીર બેંક, સ્ટેટ બેંક ઓફ ઈન્ડિયા અને યસ બેંકની નિયુક્ત શાખાઓ દ્વારા સમગ્ર ભારતમાં શ્રદ્ધાળુઓની નોંધણી કરવામાં આવી રહી છે.

હિન્દુસ્થાન સમાચાર / બલવાન સિંહ / સુનીત નિગમ

હિન્દુસ્થાન સમાચાર / ડો.હિતેશ એન.વ્યાસ