મુંબઈ, નવી દિલ્હી, 29 મે (હિ.સ.): મહારાષ્ટ્રના પુણે જિલ્લાના હડપસર અને ફુગેવાડી વિસ્તારોમાં ઝેરી દેશી દારૂ પીવાથી આઠ લોકોના મોત થયા છે, જ્યારે ઘણા લોકોની હાલત ગંભીર છે. બધાની સારવાર ચાલી રહી છે.

શુક્રવારે ઘટનાની જાણ થતાં મુખ્યમંત્રી દેવેન્દ્ર ફડણવીસે, પુણે પોલીસ કમિશનર અમિતેશ કુમાર સાથે વાત કરી અને આ ઘટનાને અત્યંત ગંભીર ગણાવી. તેમણે ગુનેગારો સામે શક્ય તેટલી કડક કાર્યવાહી કરવાનો પણ આદેશ આપ્યો. તેમણે કહ્યું કે આ ઘટનામાં કોઈને પણ છોડવામાં આવશે નહીં. પોલીસે અત્યાર સુધીમાં આઠ લોકોની ધરપકડ કરી છે અને આ મામલાની તપાસ ચાલી રહી છે.

રાજ્ય આબકારી વિભાગના કમિશનર અતુલ કાનડેએ જણાવ્યું હતું કે, આ ઘટનામાં પદુરંગ ફુગે, વિજય પ્રકાશ રાઠોડ, રાજેન્દ્ર પ્રકાશ રાઠોડ, રાજુ રાજપૂત, અકબર પઠાણ, બાબા શેખ, આનંદ દેસાઈ અને આનંદ નિકાલજેનું મૃત્યુ થયું છે. જ્યારે સુભાષ દિગીકર અને અક્ષય અવસરમલ સારવાર હેઠળ છે, આ ઘટનાના સંદર્ભમાં અત્યાર સુધીમાં આઠ લોકોની ધરપકડ કરવામાં આવી છે. તેમાં ગેરકાયદેસર દારૂના વેપારી વિરખા સિંહ અને વિતરક યોગેશ વાનખેડેનો સમાવેશ થાય છે. યોગેશ વાનખેડે પર આ ગેરકાયદેસર દારૂ બનાવવા માટે વપરાતી ઔદ્યોગિક સ્પિરિટ સપ્લાય કરવાનો આરોપ છે.

પ્રારંભિક તપાસમાં જાણવા મળ્યું છે કે, દેશી દારૂ પિંપરી-ચિંચવાડના પડોશી ફુગેવાડીમાં રાસાયણિક દૂષિત સ્પિરિટનો ઉપયોગ કરીને બનાવવામાં આવ્યો હતો અને બાદમાં હડપસર અને આસપાસના વિસ્તારોમાં તેનું વિતરણ કરવામાં આવ્યું હતું. ઝેરી દારૂ પીધા પછી, પીડિતોએ પેટમાં તીવ્ર દુખાવો અને ઉલટી થવાની ફરિયાદ કરી હતી. તેમને હોસ્પિટલોમાં દાખલ કરવામાં આવ્યા હતા પરંતુ સારવાર દરમિયાન તેમનું મૃત્યુ થયું હતું. પોલીસે મૃતકોના મૃતદેહને પોસ્ટમોર્ટમ માટે મોકલી દીધા છે. ફોરેન્સિક અને મેડિકલ રિપોર્ટ મળ્યા પછી વધુ તપાસ હાથ ધરવામાં આવશે.

હિન્દુસ્થાન સમાચાર / રાજ બહાદુર યાદવ / રામાનુજ શર્મા

હિન્દુસ્થાન સમાચાર / માધવી વ્યાસ