રાયપુર, નવી દિલ્હી, 10 જુલાઈ (હિ.સ.) છત્તીસગઢમાં પાસપોર્ટ બનાવાવનારાઓની સંખ્યા છેલ્લા 25 વર્ષમાં રેકોર્ડ સ્તરે પહોંચી ગઈ છે. રાયપુરમાં પ્રાદેશિક પાસપોર્ટ કાર્યાલય શરૂ થયા બાદ અરજીઓ 152 ગણાં વધી છે અને તેના કારણે રાજ્યના યુવાનો, વ્યાવસાયિકો તથા વેપારીઓ માટે વિદેશ યાત્રાની પ્રક્રિયા પહેલાં કરતાં વધુ સરળ બની છે.

સત્તાવાર અહેવાલ મુજબ, વર્ષ 2007માં સમગ્ર વર્ષ દરમિયાન માત્ર 375 અરજીઓ આવી હતી, જ્યારે 2025માં આ સંખ્યા વધીને 56,991 થઈ ગઈ. કોરોના કાળ જેવી મુશ્કેલ પરિસ્થિતિઓમાં પણ લગભગ 27 હજાર પાસપોર્ટ જારી કરવામાં આવ્યા, જે સેવાની સતતતા દર્શાવે છે. અહેવાલમાં એ પણ જણાવાયું છે કે રાયપુર બાદ દુર્ગ-ભિલાઈ અને બિલાસપુરમાં પાસપોર્ટ ધારકોની સંખ્યા વધુ છે.

રાજ્યમાં વધતી ઉચ્ચ શિક્ષણ, રોજગાર, તબીબી, પર્યટન અને વેપાર સંબંધિત વિદેશ યાત્રાની ઇચ્છા આ વૃદ્ધિનું મુખ્ય કારણ માનવામાં આવી રહી છે. આથી છત્તીસગઢની વૈશ્વિક પહોંચ અને નાગરિક સેવાઓના વિસ્તરણનો સંકેત મળે છે.

રાજ્યમાં સૌથી વધુ રાયપુરમાં 23 હજાર લોકો પાસપોર્ટ ધારક છે. ત્યારબાદ દુર્ગ-ભિલાઈમાં નવ હજાર, બિલાસપુરમાં સાત હજાર, રાજનાંદગાંવમાં ચાર હજાર તથા બસ્તર અને સરગુજા વિભાગમાં લગભગ ત્રણ હજાર પાસપોર્ટધારકો છે. અન્ય જિલ્લાઓને મળીને આ સંખ્યા લગભગ 11 હજાર છે, જે વિદેશ યાત્રાના વધતા રુઝાનને દર્શાવે છે.

રાજ્યમાં છેલ્લા 19 વર્ષમાં રાજ્યપાલ, મુખ્યમંત્રી, વિધાનસભા અધ્યક્ષ, મુખ્ય ન્યાયાધીશ, મુખ્ય સચિવ અને અન્ય પાત્ર વિશિષ્ટ વ્યક્તિઓ સહિત 26 ડિપ્લોમેટિક પાસપોર્ટ જારી કરવામાં આવ્યા છે. વિદેશ મંત્રાલયના નિયમો હેઠળ જારી થતા મરૂન રંગના આ પાસપોર્ટ ધરાવનારાઓને વિદેશ યાત્રા દરમિયાન વિશેષ પ્રોટોકોલ અને અનેક ઔપચારિકતાઓમાં રાહત મળે છે.

પ્રાદેશિક પાસપોર્ટ અધિકારી બી.એસ. રાણાના અનુસાર નવી શાખાઓ અને સરળ પ્રક્રિયાના કારણે હવે લોકોને પાસપોર્ટ બનાવાવવા માટે અન્ય રાજ્યોનો સહારો લેવો પડતો નથી. પાસપોર્ટ બનાવાવનારાઓની સંખ્યામાં સતત વધારો થઈ રહ્યો છે. નવા અરજદારો સાથે નવિનીકરણ કરાવનારાઓ પણ મોટી સંખ્યામાં સામેલ છે. છેલ્લા 25 વર્ષમાં અરજીઓ 152 ગણાં વધી ગઈ છે. છેલ્લા પાંચ વર્ષમાં 11 ડિપ્લોમેટિક પાસપોર્ટ જારી થયા છે.

હિન્દુસ્થાન સમાચાર / ચંદ્ર નારાયણ શુક્લ / રામાનુજ શર્મા

હિન્દુસ્થાન સમાચાર / માધવી વ્યાસ