નવી દિલ્હી, 12 જુલાઈ (હિ.સ.) કેન્દ્ર સરકાર 13 જુલાઈએ અખિલ ભારતીય જળ સંસાધન વિભાગના સચિવોનું સંમેલન યોજશે. આ બેઠકમાં રાજ્યો અને કેન્દ્રશાસિત પ્રદેશોના વરિષ્ઠ સચિવો સાથે જળ સંસાધન ક્ષેત્રની પ્રાથમિક પહેલો પર ચર્ચા થશે અને મુખ્ય રાષ્ટ્રીય કાર્યક્રમોની પ્રગતિની સમીક્ષા કરવામાં આવશે.

કેન્દ્રીય જળશક્તિ મંત્રાલય અનુસાર, આ સંમેલનનું આયોજન જળ સંસાધન, નદી વિકાસ અને ગંગા સંરક્ષણ વિભાગ કરશે. બેઠકની અધ્યક્ષતા કેન્દ્રીય જળ શક્તિ મંત્રી સી.આર. પાટીલ કરશે, જ્યારે રાજ્ય મંત્રી રાજ ભૂષણ ચૌધરી અને વિભાગના સચિવ વી.એલ. કંઠા રાવ સહ-અધ્યક્ષ રહેશે. તેમાં મંત્રાલય હેઠળના સંગઠનો જેમ કે, કેન્દ્રીય જળ આયોગ, રાષ્ટ્રીય બંધ સુરક્ષા પ્રાધિકરણ અને રાષ્ટ્રીય જળ મિશન પણ ભાગ લેશે.

સંમેલનમાં આઠ મુખ્ય મુદ્દાઓ પર વિચાર થશે, જેમાં કમાન્ડ એરિયા વિકાસ અને જળ વ્યવસ્થાપન યોજનાનું આધુનિકીકરણ, કેચ ધ રેન અભિયાન, સિંચાઈ અને પૂર વ્યવસ્થાપન યોજનાઓના સુધારેલા મૂલ્યાંકન માર્ગદર્શિકા, બંધ જળાશયોના રૂલ કર્વ્સનું અમલીકરણ, રાજ્ય જળ સુધારણા માળખું, બંધ સુરક્ષા અધિનિયમ 2021 હેઠળ વ્યાપક મૂલ્યાંકન, સિંચાઈ જનગણનાની પ્રગતિ અને મોડેલ રાજ્ય જળ પુરસ્કારનું માળખું સામેલ છે.

બેઠકમાં રાજ્યો અને કેન્દ્રશાસિત પ્રદેશોને પણ સામેલ કરવામાં આવશે. સાથે જ દેશભરમાં જળ સંચયને લઈને અમલીકરણ સંબંધિત પડકારો પર ચર્ચા કરવા અને જળ ક્ષેત્રમાં સુધારાઓને ગતિ આપવા માટે સંકલિત વ્યૂહરચના વિકસાવવા પર પણ ચર્ચા થશે.

હિન્દુસ્થાન સમાચાર / પ્રશાંત શેખર / સુનીત નિગમ

હિન્દુસ્થાન સમાચાર / માધવી વ્યાસ