ઑકલૅન્ડ, નવી દિલ્હી, 11 જુલાઈ (હિ.સ.)। વડાપ્રધાન નરેન્દ્ર મોદીએ શનિવારે કહ્યું કે, ભારત અને ન્યૂઝીલેન્ડે પોતાના દ્વિપક્ષીય સંબંધોને વ્યૂહાત્મક ભાગીદારીના સ્તર સુધી લઈ જવાનો ઐતિહાસિક નિર્ણય લીધો છે. બંને દેશો વચ્ચે રેકોર્ડ સમયમાં પૂર્ણ થયેલો મુક્ત વેપાર કરાર (એફટીએ) ઉદ્યોગ, ખેડૂતો અને યુવાનો માટે નવા અવસરો ખોલશે તથા આગામી પાંચ વર્ષમાં દ્વિપક્ષીય વેપારને બમણો કરવાની મજબૂત આધારશિલા બનશે.

ન્યૂઝીલેન્ડના વડાપ્રધાન ક્રિસ્ટોફર લક્સન દ્વારા આયોજિત રાજકીય ભોજનમાં ભાગ લીધા બાદ વડાપ્રધાન મોદીએ કહ્યું કે, 40 વર્ષ બાદ કોઈ ભારતીય વડાપ્રધાનની ન્યૂઝીલેન્ડની સત્તાવાર મુલાકાત બંને દેશોના સંબંધોના નવા અધ્યાયની શરૂઆત છે. તેમણે ઉષ્માભર્યા સ્વાગત અને આતિથ્ય માટે વડાપ્રધાન લક્સનનો આભાર વ્યક્ત કરતાં કહ્યું કે તેમના સ્વાગતની આત્મીયતાથી ઑકલૅન્ડની ઠંડી પણ ઓછી લાગતી હતી.

વડાપ્રધાન મોદીએ કહ્યું કે, લોકશાહી મૂલ્યોમાં સહિયારા વિશ્વાસ ભારત અને ન્યૂઝીલેન્ડને સ્વાભાવિક ભાગીદાર બનાવે છે. છેલ્લા કેટલાક વર્ષોમાં બંને દેશોના સંબંધોને નવી ગતિ મળી છે અને હવે તેમને સ્પષ્ટ લક્ષ્યો તથા વ્યવહારુ સહકાર સાથે આગળ વધારવામાં આવશે.

તેમણે કહ્યું કે, છેલ્લા ત્રણ વર્ષમાં બંને દેશો વચ્ચેના વેપારમાં 50 ટકાથી વધુનો વધારો થયો છે. આ વર્ષે રેકોર્ડ સમયમાં પૂર્ણ થયેલા મુક્ત વેપાર કરારથી વેપાર, રોકાણ, કૃષિ, ડેરી, ખાદ્ય પ્રક્રિયા તથા યુવાનો માટે નવા અવસરો સર્જાશે અને આગામી પાંચ વર્ષમાં વેપારને બમણો કરવામાં મદદ મળશે.

વડાપ્રધાને કહ્યું કે, બંને દેશો માત્ર વેપાર પૂરતા સીમિત નથી, પરંતુ ટેકનોલોજી, નવીનતા અને વિશ્વાસનો પણ મજબૂત સેતુ બનાવી રહ્યા છે. ફિનટેક ક્ષેત્રમાં ભારતના યુપીઆઈ અને ન્યૂઝીલેન્ડની ચુકવણી પ્રણાલીને જોડવાની દિશામાં કામ કરવામાં આવશે. કૃષિ, ડેરી અને ખાદ્ય પ્રક્રિયામાં સહકારનો વ્યાપક ખાકો તૈયાર કરવામાં આવ્યો છે, જેના કારણે ખેડૂતો અને પશુપાલકોને લાભ મળશે.

તેમણે જણાવ્યું કે, પરંપરાગત ચિકિત્સાના ક્ષેત્રમાં બંને દેશોની સમૃદ્ધ પરંપરાઓને ધ્યાનમાં રાખીને આરોગ્ય સહકારમાં તેની ભૂમિકા વધારવા પર સહમતિ બની છે. ઉપરાંત, હિંદ-પ્રશાંત ક્ષેત્રમાં સમુદ્રી સહકાર માટે એક રૂપરેખા પર પણ સહમતિ બની છે, જેના હેઠળ નૌકાદળ અભ્યાસ, લોજિસ્ટિક સહકાર અને હાઇડ્રોગ્રાફીના ક્ષેત્રમાં તાલમેલ વધારવામાં આવશે.

વડાપ્રધાન મોદીએ કહ્યું કે, બંને દેશો વચ્ચે હસ્તાક્ષરિત સાંસ્કૃતિક સહકાર કરાર કલા, સંસ્કૃતિ, વારસો અને સર્જનાત્મક ઉદ્યોગોમાં આદાનપ્રદાનને નવી ગતિ આપશે. તેમણે ન્યૂઝીલેન્ડની યુનિવર્સિટીઓને ભારતમાં પોતાના કેમ્પસ સ્થાપિત કરવા માટે પણ આમંત્રણ આપ્યું.

તેમણે કહ્યું કે, આ વર્ષે ભારત અને ન્યૂઝીલેન્ડ રમતગમત સંબંધોની 100મી વર્ષગાંઠ મનાવી રહ્યા છે. મેજર ધ્યાનચંદના નેતૃત્વમાં ભારતીય હોકી ટીમ દ્વારા એક સદી પહેલાં રચાયેલા ઇતિહાસની સ્મૃતિમાં બંને દેશોમાં અનેક રમતગમત કાર્યક્રમો યોજાશે. ક્રિકેટ સિવાયના અન્ય રમતોમાં સહકાર વધારવા માટે સંયુક્ત રમતગમત કાર્યયોજના પણ અપનાવવામાં આવી છે.

વડાપ્રધાને કહ્યું કે, વૈશ્વિક મંચ પર ભારત અને ન્યૂઝીલેન્ડ વિશ્વસનીય ભાગીદાર છે અને બંનેનું માનવું છે કે, સંયુક્ત રાષ્ટ્ર સહિત વૈશ્વિક સંસ્થાઓમાં સુધારો સમયની જરૂરિયાત છે. તેમણે કહ્યું કે, આતંકવાદ સામેના સહકારને વધુ મજબૂત બનાવવા માટે સંયુક્ત કાર્યસમૂહની રચના પર પણ સહમતિ બની છે. તેમણે કહ્યું કે, હિંદ-પ્રશાંત ક્ષેત્રમાં શાંતિ, સ્થિરતા અને સુરક્ષા સુનિશ્ચિત કરવામાં ભારત અને ન્યૂઝીલેન્ડનો સહકાર અત્યંત મહત્વપૂર્ણ રહેશે.

હિન્દુસ્થાન સમાચાર / સુશીલ કુમાર / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ