નવી દિલ્હી, 17 જુલાઈ (હિ.સ.). 'ભારત ટેક્સ ટ્રેડ ફેડરેશન'ના અધ્યક્ષ નરેન્દ્ર ગોયનકાએ શુક્રવારે જણાવ્યું કે, ભારત હવે પર્યાવરણ-અનુકૂળ અને આધુનિક ટેકનોલોજીથી સજ્જ વસ્ત્ર ઉદ્યોગમાં વૈશ્વિક નેતૃત્વ કરવા માટે સંપૂર્ણપણે તૈયાર છે. ગોયનકાએ અહીં ભારત મંડપમમાં ચાર-દિવસીય 'ભારત ટેક્સ 2026'ના સમાપન પર આયોજિત સંવાદ સત્રમાં કહ્યું, આ આયોજન માત્ર વ્યાપારિક ભાગીદારીને મજબૂત કરવામાં મદદરૂપ સાબિત થયું નથી, પરંતુ તેણે સસ્ટેનેબલ (ટકાઉ) અને ટેકનોલોજી-ડ્રિવન (ટેકનોલોજી-આધારિત) ટેક્સટાઈલ્સના ભવિષ્યનું નેતૃત્વ કરવાની ભારતની ક્ષમતાને પણ આખી દુનિયા સામે મજબૂતીથી સાબિત કરી છે. 'ભારત ટેક્સ 2026' 14-17 જુલાઈ સુધી ચાલ્યો.

ગોયનકાએ મીડિયાને જણાવ્યું કે, આ વર્ષે 'ભારત ટેક્સ'એ અગ્રણી વૈશ્વિક કાપડ અને પરિધાન ગંતવ્ય તરીકે ભારતની સ્થિતિને વધુ મજબૂત કરી છે. આ દરમિયાન 1,15,000 મુલાકાતીઓ આવ્યા. તેમાં 11 હજારથી વધુ ખરીદદારો શામેલ હતા, જેમાંથી લગભગ 6,000 ખરીદદારો આંતરરાષ્ટ્રીય બજારોમાંથી હતા જે 138 દેશોનું પ્રતિનિધિત્વ કરી રહ્યા હતા.

તેમણે જણાવ્યું કે, આ કાર્યક્રમમાં 1617 પ્રદર્શકો શામેલ હતા, જેમાંથી લગભગ 70 ટકા એમએસએમઈ (MSME) હતા. આ ભારતના ઉત્પાદન ઇકોસિસ્ટમ (પર્યાવરણ પ્રણાલી)ની તાકાત અને વિવિધતાને ઉજાગર કરે છે. આ ઉપરાંત, આ ચાર દિવસ દરમિયાન, 28,500થી વધુ બિઝનેસ-ટુ-બિઝનેસ (વ્યવસાય-થી-વ્યવસાય) બેઠકો થઈ. આ એવી બેઠકો છે જેને ખરીદદારો અને પ્રદર્શકોએ એપ (એપ્લિકેશન) પર પહેલાથી જ કન્ફર્મ (પુષ્ટિ) કરી હતી. આ સાથે જ ભારત ટેક્સ દરમિયાન 100થી વધુ ગવર્નમેન્ટ-ટુ-ગવર્નમેન્ટ (સરકાર-થી-સરકાર) અને બિઝનેસ-ટુ-ગવર્નમેન્ટ (વ્યવસાય-થી-સરકાર) બેઠકો પણ થઈ.

ગોયનકાએ જણાવ્યું કે, ભારત ટેક્સએ લગભગ 14,300 કરોડ રૂપિયાના રોકાણ પ્રસ્તાવોને આકર્ષિત કર્યા છે. આ દર્શાવે છે કે, આ આયોજન માત્ર કાગળ પરના દાવાઓ સુધી સીમિત નથી, પરંતુ વાસ્તવિક આર્થિક પ્રગતિનું માધ્યમ છે.

હિન્દુસ્થાન સમાચાર / શ્રદ્ધા દ્વિવેદી / પવન કુમાર

હિન્દુસ્થાન સમાચાર / ડો.હિતેશ એન.વ્યાસ