ગૌહાટી, નવી દિલ્હી, 21 જુલાઈ (હિ.સ.). આસામમાં પૂરની સ્થિતિ હજુ પણ ગંભીર બનેલી છે. રાજ્યમાં પૂરથી મૃત્યુ પામનારાઓની સંખ્યા વધીને 13 થઈ ગઈ છે, જ્યારે 11 જિલ્લાના 3.13 લાખથી વધુ લોકો પ્રભાવિત છે. પડોશી પહાડી રાજ્યો, ખાસ કરીને નાગાલેન્ડમાં સતત થઈ રહેલા ભારે વરસાદ અને વાદળ ફાટવાની ઘટનાઓને કારણે અચાનક આવેલા પૂરથી રાજ્યની ઘણી મુખ્ય નદીઓ ભયજનક સપાટીથી ઉપર વહી રહી છે. આનાથી જનજીવન ખરાબ રીતે પ્રભાવિત થયું છે અને રાહત તથા બચાવ કાર્ય યુદ્ધના ધોરણે ચાલુ છે.

આસામ રાજ્ય આપત્તિ વ્યવસ્થાપન પ્રાધિકરણ (એએસડીએમએ) અનુસાર, સૌથી વધુ પ્રભાવિત જિલ્લાઓમાં ચરાઈદેવ, શિવસાગર અને જોરહાટનો સમાવેશ થાય છે. એકલા શિવસાગર જિલ્લામાં લગભગ 1.58 લાખ લોકો પૂરથી પ્રભાવિત છે. રાજ્યભરમાં 794 ગામ જળમગ્ન થઈ ચૂક્યા છે, જ્યારે 19,099 હેક્ટરથી વધુ કૃષિ ભૂમિ પૂરના પાણીમાં ડૂબી ગઈ છે. આ ઉપરાંત લગભગ 5.97 લાખ પશુ અને મરઘાંપાલન પણ પ્રભાવિત થયા છે, જેનાથી ગ્રામીણ અર્થતંત્ર પર ઊંડો પ્રભાવ પડ્યો છે.

એએસડીએમએ મુજબ, બ્રહ્મપુત્રા નદી નિમાતીઘાટ, બુઢીદિહિંગ નદી ખોવાંગ, દિખૌ નદી શિવસાગર, દિસાંગ નદી નાંગલામુરાઘાટ તથા ધનસિરી નદી ગોલાઘાટ અને નુમાલીગઢમાં ભયજનક સપાટીથી ઉપર વહી રહી છે. સતત વધતા જળસ્તરને કારણે નીચાણવાળા વિસ્તારોમાં જળભરાવ અને ધોવાણની સ્થિતિ ગંભીર બનેલી છે.

પૂરની અસર માર્ગ અને રેલવે પરિવહન પર પણ પડી છે. નાઝિરા-ગેલેકી માર્ગનો એક મોટો ભાગ ધોવાઈ જવાથી શિવસાગર અને નાઝિરા વચ્ચેનો માર્ગ સંપર્ક સંપૂર્ણપણે ખોરવાઈ ગયો છે. જ્યારે ટિયક નજીક રાષ્ટ્રીય ધોરીમાર્ગ-715 જળમગ્ન થવાથી અવરજવર પ્રભાવિત થઈ છે.

રેલવે સેવાઓ પર પણ પૂરની વ્યાપક અસર જોવા મળી છે. સિમલુગુડી રેલવે સ્ટેશનના યાર્ડ અને રેલવે ટ્રેક પર પાણી ભરાઈ જવાને કારણે પૂર્વોત્તર સીમાંત રેલવેએ 30થી વધુ ટ્રેનોને રદ, ડાયવર્ટ અથવા શોર્ટ ટર્મિનેટ કરી દીધી છે. આનાથી મુસાફરોને ભારે મુશ્કેલીનો સામનો કરવો પડી રહ્યો છે.

પ્રશાસન દ્વારા રાહત અને બચાવ કાર્ય ઝડપથી ચાલુ છે. ભારતીય સેના, ભારતીય વાયુસેના, રાષ્ટ્રીય આપત્તિ પ્રતિભાવ દળ (એનડીઆરએફ), રાજ્ય આપત્તિ પ્રતિભાવ દળ (એસડીઆરએફ) તથા અગ્નિશમન અને કટોકટી સેવાઓની ટીમો પ્રભાવિત વિસ્તારોમાં ફસાયેલા લોકોને સુરક્ષિત સ્થળોએ પહોંચાડવામાં વ્યસ્ત છે. રાજ્ય સરકારે અત્યાર સુધીમાં 52 રાહત શિબિરો અને રાહત વિતરણ કેન્દ્રો સ્થાપિત કર્યા છે, જ્યાં 12,720થી વધુ વિસ્થાપિત લોકોને આશ્રય, ભોજન અને અન્ય આવશ્યક સુવિધાઓ પૂરી પાડવામાં આવી રહી છે.

પ્રશાસને નદીઓના કિનારે અને નીચાણવાળા વિસ્તારોમાં રહેતા લોકોને સાવચેત રહેવા, બિનજરૂરી મુસાફરી ટાળવા તથા સ્થાનિક પ્રશાસન દ્વારા જારી કરાયેલા દિશા-નિર્દેશોનું પાલન કરવા અપીલ કરી છે.

હિન્દુસ્થાન સમાચાર/શ્રીપ્રકાશ/અરવિંદ રાય/ઉદય કુમાર સિંહ

હિન્દુસ્થાન સમાચાર / ડો.હિતેશ એન.વ્યાસ