ભદ્રવાહ, નવી દિલ્હી, 17 જુલાઈ (હિ.સ.): જમ્મુ અને કાશ્મીરના ડોડા જિલ્લાના ભદ્રવાહમાં ગોળીબારની ઘટનામાં એક વ્યક્તિનું મોત અને ત્રણ સ્પેશિયલ ઓપરેશન ગ્રુપ (એસઓજી) કર્મચારીઓ ઘાયલ થયા છે. આ ઘટના ત્યારે બની જ્યારે એક વ્યક્તિએ કથિત રીતે સર્વિસ રાઇફલ છીનવી લેવાનો પ્રયાસ કર્યો હતો.

પોલીસ અધિકારીઓએ શુક્રવારે જણાવ્યું હતું કે, ગુરુવારે મોડી રાત્રે બનેલી ઘટનાના સંદર્ભમાં એક ધાર્મિક ઉપદેશકની અટકાયત કરવામાં આવી છે. અટકાયતીનો ઘટના સાથે શું સંબંધ છે તે તાત્કાલિક સ્પષ્ટ થયું નથી.

એક વરિષ્ઠ અધિકારીએ જણાવ્યું હતું કે, ઊંચાઈવાળા વિસ્તારમાં શંકાસ્પદ ગતિવિધિઓ વિશે માહિતી મળ્યા બાદ, એસઓજી ટીમે ગુરુવારે ભાદરવાહ શહેરથી લગભગ 35 કિલોમીટર દૂર જય-ગંડોહ રોડ પર ઓચિંતો છાપો માર્યો હતો.

તેમણે જણાવ્યું હતું કે, ગુરુવાર-શુક્રવારે મોડી રાત્રે, એસઓજી ટીમે એક યુવકને અટકાવ્યો હતો જેણે કથિત રીતે કર્મચારીઓ પર હુમલો કર્યો હતો અને સર્વિસ રાઇફલ છીનવી લેવાનો પ્રયાસ કર્યો હતો. અધિકારીએ જણાવ્યું હતું કે ઝપાઝપી દરમિયાન, એસઓજી જવાને ગોળીબાર કર્યો હતો. યુવકને ગોળી વાગી હતી, જ્યારે ત્રણ પોલીસકર્મીઓ ઘાયલ થયા હતા. ચારેયને ભદ્રવાહ સબ-ડિસ્ટ્રિક્ટ હોસ્પિટલમાં લઈ જવામાં આવ્યા હતા, જ્યાંથી તેમને વધુ સારી સારવાર માટે ડોડાની સરકારી મેડિકલ કોલેજમાં રિફર કરવામાં આવ્યા હતા. અધિકારીઓએ જણાવ્યું હતું કે, ચીકા ગામના રહેવાસી આરિફ હુસૈન (30) નું ઈજાઓથી મૃત્યુ થયું હતું.

તેમણે કહ્યું કે, એક ધાર્મિક ઉપદેશકની અટકાયત કરવામાં આવી છે. સાવચેતીના પગલા તરીકે, ભદ્રવાહ શહેરમાં વધારાની સેન્ટ્રલ રિઝર્વ પોલીસ ફોર્સ (સીઆરપીએફ) અને પોલીસ તૈનાત કરવામાં આવી છે. અધિકારીઓએ જણાવ્યું હતું કે સેનાએ જય વિસ્તારમાં સર્ચ ઓપરેશન શરૂ કર્યું છે.

હિન્દુસ્થાન સમાચાર / બલવાન સિંહ / મુકુંદ

હિન્દુસ્થાન સમાચાર / માધવી વ્યાસ