નવી દિલ્હી, 23 જુલાઈ (હિ.સ.) ઉપરાષ્ટ્રપતિ સી.પી. રાધાકૃષ્ણન, લોકસભા અધ્યક્ષ ઓમ બિરલા અને પ્રધાનમંત્રી નરેન્દ્ર મોદી તથા અન્યોએ આજે ચંદ્રશેખર આઝાદ અને લોકમાન્ય ટિળકની જયંતિ પર તેમને શ્રદ્ધાંજલિ અર્પણ કરી.

ઉપરાષ્ટ્રપતિએ એક્સ પર કહ્યું, લોકમાન્ય બાળ ગંગાધર ટિળકની જયંતિ પર, હું ભારતના સ્વતંત્રતા આંદોલનના મુખ્ય નેતાઓમાંના એકને સાદર શ્રદ્ધાંજલિ અર્પણ કરું છું. એક દૂરંદેશી રાજનેતા, પ્રખ્યાત વિદ્વાન અને નીડર રાષ્ટ્રવાદી તરીકે, તેમણે પોતાના અમર ઉદ્ઘોષ સ્વરાજ મારો જન્મસિદ્ધ અધિકાર છે અને હું તેને મેળવીને જ રહીશ દ્વારા સ્વ-શાસનની ભાવનાને જાગૃત કરી. તેમના નેતૃત્વ, લેખન અને રાષ્ટ્ર પ્રત્યેના અતૂટ સમર્પણે પેઢીઓને સ્વતંત્રતા અને રાષ્ટ્રીય ચેતના માટે પ્રયાસ કરવા પ્રેરિત કર્યા.

જ્યારે, ચંદ્રશેખર આઝાદને શ્રદ્ધાંજલિ અર્પણ કરતા ઉપરાષ્ટ્રપતિએ કહ્યું કે, ભારતના સ્વતંત્રતા સંગ્રામના એક ઝળહળતા પ્રતીક તરીકે, તેમણે અસાધારણ સાહસ અને દેશ પ્રત્યે અતૂટ નિષ્ઠાનું ઉદાહરણ પૂરું પાડ્યું. તેમના જીવનએ અસંખ્ય યુવા ભારતીયોને માતૃભૂમિની સેવા માટે પોતાને સમર્પિત કરવાની પ્રેરણા આપી. તેમનો અમર વારસો પેઢીઓ સુધી દેશભક્તિની ભાવનાને જગાડતો રહેશે.

બિરલાએ કહ્યું કે, મહાન દેશભક્ત અને સ્વતંત્રતા સેનાની ચંદ્રશેખર આઝાદની જયંતિ પર તેમને સાદર નમન. રાષ્ટ્રને સમર્પિત તેમનું સંપૂર્ણ જીવન સદૈવ પ્રેરણા આપતું રહેશે.

પ્રધાનમંત્રી મોદીએ કહ્યું કે, ચંદ્રશેખર આઝાદે અસંખ્ય યુવા ભારતીયોને દેશ પ્રત્યે સમર્પિત થવા પ્રેરિત કર્યા. તેમનો દ્રઢ સંકલ્પ દરેક પેઢી માટે પ્રેરણાનો સ્ત્રોત બની રહેશે. ભારતના સ્વતંત્રતા સંગ્રામની એક મહાન વિભૂતિ તરીકે, લોકમાન્ય ટિળકે રાષ્ટ્રવાદની ભાવનાને પ્રજ્વલિત કરી અને ભાવિ પેઢીઓને જનસેવા પ્રત્યે સમર્પિત થવા પ્રેરિત કર્યા.

અમિત શાહે કહ્યું કે, આઝાદે પોતાનું સર્વસ્વ દેશ માટે સમર્પિત કરી દીધું અને માતૃભૂમિની આઝાદીને જ પોતાના જીવનનું એકમાત્ર લક્ષ્ય બનાવ્યું. કાકોરી ટ્રેન એક્શન દ્વારા તેમણે બ્રિટિશ શાસનને કડક સંદેશ આપ્યો કે, દેશના સંસાધનો પર ફક્ત તેના નાગરિકોનો જ અધિકાર છે. તેમણે ક્રાંતિકારીઓની એક એવી પેઢી તૈયાર કરી જેણે વિદેશી શાસનના પાયા હચમચાવી દીધા. આજે પણ, તેમની વીરતાની ગાથા વાંચીને મારા રોમ-રોમમાં દેશભક્તિનો સંચાર થઈ જાય છે.

હિન્દુસ્થાન સમાચાર / શ્રદ્ધા દ્વિવેદી / મુકુંદ

હિન્દુસ્થાન સમાચાર / માધવી વ્યાસ