નવી દિલ્હી, 24 જુલાઈ (હિ.સ.) નીટ-યુજી પ્રશ્નપત્ર લીક પર વડાપ્રધાન નરેન્દ્ર મોદી પર બે મહિના સુધી મૌન રહેવાનો આરોપ લગાવતા, કોંગ્રેસના મહાસચિવ (સંચાર) જયરામ રમેશે જણાવ્યું હતું કે, ભારે જાહેર આક્રોશ પછી, સરકારે આખરે પ્રશ્નપત્ર લીકનું સત્ય સ્વીકારવું પડ્યું. તેમણે આરોપ લગાવ્યો કે સરકારે સતત પોતાના રાજકીય હિતોને વિદ્યાર્થીઓના હિતોથી ઉપર રાખ્યા, નબળી તપાસ હાથ ધરી અને જવાબદારી ટાળી. તેમણે શિક્ષણ પ્રધાન ધર્મેન્દ્ર પ્રધાનને તેમના પદ પરથી હટાવવા, વિદ્યાર્થીઓ સામે હિંસા કરનારાઓ સામે કાર્યવાહી કરવા અને વિદ્યાર્થીઓની માફી માંગવાની માંગ કરી.

જયરામ રમેશે શુક્રવારે સોશિયલ મીડિયા પ્લેટફોર્મ એક્સ પર જણાવ્યું હતું કે, વડાપ્રધાને લગભગ બે મહિનાના મૌન પછી, પ્રશ્નપત્ર લીક મુદ્દાને સંબોધવા માટે મોડી રાત્રે એક વિડિઓ સંદેશ બહાર પાડ્યો. તેમણે દાવો કર્યો હતો કે, સરકારે લાંબા સમયથી સ્વીકારવાનો ઇનકાર કર્યો હતો કે, નીટ-યુજી 2026 પ્રશ્નપત્ર લીક થયું હતું. શિક્ષણ મંત્રી ધર્મેન્દ્ર પ્રધાને તેમની પ્રેસ કોન્ફરન્સમાં લીક શબ્દનો ઉપયોગ કરવાનું જાણી જોઈને ટાળ્યું હતું, અને શિક્ષણ મંત્રાલયે પણ શિક્ષણ પરની સંસદીય સ્થાયી સમિતિ સમક્ષ સત્તાવાર રીતે જણાવ્યું હતું કે કોઈ પ્રશ્નપત્ર લીક થયું નથી.

તેમણે કહ્યું કે, તીવ્ર જાહેર દબાણને કારણે, વડાપ્રધાનને આખરે સત્ય સ્વીકારવાની ફરજ પડી હતી, પરંતુ સરકારના વલણથી વિદ્યાર્થીઓનો તેના પરનો વિશ્વાસ સંપૂર્ણપણે ડગી ગયો છે.

તેમણે આરોપ લગાવ્યો કે, 2024 ની નીટ-યુજી પરીક્ષામાં કેટલાક પરીક્ષા કેન્દ્રો પર શંકાસ્પદ રીતે મોટી સંખ્યામાં ટોપર્સ બહાર આવ્યા હોવા છતાં, સરકારે વ્યાપક ગેરરીતિઓના પુરાવા દબાવી દીધા હતા. બાદમાં, સરકારે સ્વીકાર્યું કે હજારીબાગમાં પસંદગીયુક્ત પ્રશ્નપત્ર લીક થયું હતું, પરંતુ હજુ સુધી દોષિતોને ન્યાયના કઠેડામાં લાવવાનો બાકી છે.

જયરામ રમેશે કહ્યું કે, સંજીવ મુખિયા, જેમના પર અગાઉ પ્રશ્નપત્ર લીકનો મુખ્ય સૂત્રધાર હોવાનો આરોપ હતો, તેમને હવે નિર્દોષ જાહેર કરવામાં આવી રહ્યા છે. સેન્ટ્રલ બ્યુરો ઓફ ઇન્વેસ્ટિગેશન (સીબીઆઈ) એ 2024 રદ કરાયેલ યુનિવર્સિટી ગ્રાન્ટ્સ કમિશન-નેશનલ એલિજિબિલિટી ટેસ્ટ (યુજીસી-નેટ) કેસમાં ક્લોઝર રિપોર્ટ દાખલ કર્યો હતો, જેમાં કહેવામાં આવ્યું હતું કે, કોઈ પ્રશ્નપત્ર લીક થયું નથી, પરંતુ આજ સુધી તેના કારણો જાહેર કરવામાં આવ્યા નથી.

તેમણે કહ્યું કે, આ કટોકટી સીબીઆઈની નબળી તપાસ અને સરકારના નેતૃત્વની નિષ્ફળતાનું પરિણામ છે.

જયરામ રમેશે કહ્યું કે, આ સમગ્ર મુદ્દાના ઉકેલ તરફનું પહેલું પગલું એ છે કે શિક્ષણ મંત્રી ધર્મેન્દ્ર પ્રધાનને તેમના પદ પરથી દૂર કરવામાં આવે, વિદ્યાર્થીઓ સામે હિંસા કરનારાઓ સામે કાર્યવાહી કરવામાં આવે અને વિદ્યાર્થીઓની જાહેરમાં માફી માંગવામાં આવે.

હિન્દુસ્થાન સમાચાર / પ્રશાંત શેખર / અમરેશ દ્વિવેદી

હિન્દુસ્થાન સમાચાર / માધવી વ્યાસ