નવી દિલ્હી, 24 જુલાઈ (હિ.સ.) દિલ્હીમાં વિશ્વમાંગલ્ય સભાની પ્રબોધન બેઠકનો આજે બીજો દિવસ છે. બેઠકના બીજા દિવસે શુક્રવારે સવારે 9 વાગ્યે વિશ્વ યુવક કેન્દ્રમાં કાર્યકર્તા સત્રનો શુભારંભ થઈ ચૂક્યો છે. આ બેઠકમાં રાષ્ટ્રીય સ્વયંસેવક સંઘના સરસંઘચાલક ડો. મોહન ભાગવત સંગઠનના કાર્યકર્તાઓનું માર્ગદર્શન કરશે તથા આગામી વર્ષના સંગઠનાત્મક કાર્યક્રમોની રૂપરેખા પર ચર્ચા થશે.

વિશ્વમાંગલ્ય સભા અનુસાર, ભોજન બાદ બપોરે 4 વાગ્યે નવી દિલ્હી સ્થિત આંબેડકર આંતરરાષ્ટ્રીય કેન્દ્રમાં “યુગાનુકૂળ માતૃત્વ” વિષય પર ડો. મોહન ભાગવતનું સાર્વજનિક ઉદ્બોધન થશે. આ કાર્યક્રમમાં ઉત્તર ભારતના વિવિધ રાજ્યોમાંથી લગભગ 800 થી 1,000 પ્રબુદ્ધ મહિલાઓના સામેલ થવાની સંભાવના છે.

શુક્રવારે વિશ્વમાંગલ્ય સભાના પદાધિકારીઓએ જણાવ્યું કે, બે દિવસીય આ પ્રબોધન બેઠક બદલાતા સામાજિક પરિદૃશ્યમાં માતૃત્વ, પરિવાર, સંસ્કાર અને રાષ્ટ્ર નિર્માણના વિષયો પર વિચાર-વિમર્શ તથા સંગઠનના વાર્ષિક કાર્યોના આયોજનનું મુખ્ય મંચ છે. ઉલ્લેખનીય છે કે, ઉત્તર ભારતના વિવિધ રાજ્યોમાંથી આવેલી મહિલાઓની સહભાગિતા સાથે વિશ્વમાંગલ્ય સભાની બે દિવસીય પ્રબોધન બેઠક ગુરુવારથી નવી દિલ્હી સ્થિત વિશ્વ યુવક કેન્દ્રમાં દીપ પ્રાગટ્ય સાથે શરૂ થઈ ચૂકી છે. “યુગાનુકૂળ માતૃત્વ” વિષય પર આયોજિત આ બેઠકમાં પહેલા દિવસે લગભગ 250 મહિલા કાર્યકર્તાઓએ ભાગ લીધો. આમાં જમ્મુ, શ્રીનગર, અનંતનાગ, લેહ-લદ્દાખ, અરુણાચલ પ્રદેશ અને મણિપુર, પશ્ચિમ બંગાળ સહિત વિવિધ ક્ષેત્રોમાંથી આવેલી પ્રતિનિધિઓની પણ ઉપસ્થિતિ રહી.

ઉલ્લેખનીય છે કે, ગુરુવારે બેઠકના ઉદ્ઘાટન સત્રમાં વિશ્વમાંગલ્ય સભાના સંસ્થાપક તેમજ ગુરુજી દત્તા પીઠ પરંપરાના 18મા પીઠાધીશ્વર પરમ પૂજ્ય આચાર્ય સ્વામી જિતેન્દ્રનાથજી મહારાજ ઉપસ્થિત રહ્યા. આ અવસરે રાષ્ટ્રીય સ્વયંસેવક સંઘના વરિષ્ઠ પ્રચારક તેમજ સંગઠનના માર્ગદર્શક પ્રશાંત હરતાલકર તથા વિશ્વમાંગલ્ય સભાના રાષ્ટ્રીય અધ્યક્ષા નલિની હાવરે, રાષ્ટ્રીય સંગઠન મંત્રી વૃષાલી જોશી પણ હાજર રહ્યા. રાષ્ટ્રીય સંગઠન મંત્રી વૃષાલી જોશીએ કહ્યું કે, “માતૃ નિર્માણથી રાષ્ટ્ર નિર્માણ”ના ધ્યેય સાથે કાર્યરત વિશ્વમાંગલ્ય સભા આજે દેશભરમાં માતૃશક્તિના સંગઠન અને સંસ્કાર આધારિત સમાજ નિર્માણની દિશામાં કાર્ય કરી રહી છે. તેમણે કહ્યું કે, સંગઠનની પ્રચારિકાઓની સાથે-સાથે લાખો ગૃહસ્થ મહિલા કાર્યકર્તાઓ પરિવાર, સમાજ અને રાષ્ટ્ર પ્રત્યે પોતાની જવાબદારીઓનું નિર્વહન કરતા સંસ્કારિત પેઢીના નિર્માણમાં યોગદાન આપી રહી છે. તેમણે ભારતીય માતૃત્વના સાંસ્કૃતિક મૂલ્યો અને ભારતીયતાથી યુક્ત પારિવારિક વાતાવરણને સુરક્ષિત રાખવાની આવશ્યકતા પર ભાર મૂક્યો.

આચાર્ય સ્વામી જિતેન્દ્રનાથજી મહારાજે કહ્યું કે, બદલાતા સામાજિક પરિવેશમાં માતૃત્વની ભૂમિકા અને પડકારો પર ગંભીર ચિંતનની આવશ્યકતા છે. જ્યારે, પ્રશાંત હરતાલકરે કહ્યું કે, કોઈપણ સંગઠનની સૌથી મોટી શક્તિ તેના સમર્પિત અને સ્થિર કાર્યકર્તાઓ હોય છે, જે સંયુક્ત પરિવારની ભાવના સાથે રાષ્ટ્ર નિર્માણના કાર્યને આગળ વધારે છે.

હિન્દુસ્થાન સમાચાર/વિજયાલક્ષ્મી/અનુપ શર્મા

હિન્દુસ્થાન સમાચાર / ડો.હિતેશ એન.વ્યાસ