નવસારી, 01 ઓગસ્ટ (હિ.સ.) : નવસારી જિલ્લામાં સતત ભારે વરસાદને કારણે સર્જાયેલી પૂર જેવી પરિસ્થિતિને ધ્યાનમાં રાખીને કેન્દ્રીય જળ શક્તિ મંત્રી સી.આર. પાટીલે શનિવારે નવસારી કંટ્રોલ રૂમ ખાતે ઉચ્ચ અધિકારીઓ અને પક્ષના કાર્યકરો સાથે સમીક્ષા બેઠક યોજી હતી.

બેઠક દરમિયાન પૂરગ્રસ્ત વિસ્તારોની સ્થિતિ અંગે વિગતવાર માહિતી મેળવી રાહત અને બચાવ કામગીરીની સમીક્ષા કરવામાં આવી હતી. સી.આર. પાટીલે નીચાણવાળા તથા અસરગ્રસ્ત વિસ્તારોમાં ફસાયેલા લોકોને તાત્કાલિક સલામત સ્થળે ખસેડવા તેમજ એનડીઆરએફ અને સ્થાનિક તંત્ર દ્વારા રાહત કામગીરી વધુ ઝડપી બનાવવા સૂચના આપી હતી.

તેમણે રાહત શિબિરોમાં રહેતા અસરગ્રસ્ત લોકોને શુદ્ધ પીવાનું પાણી, ભોજન અને આરોગ્ય સંબંધિત તમામ જરૂરી સુવિધાઓ સમયસર ઉપલબ્ધ થાય તેની ખાતરી કરવા ભાર મૂક્યો હતો. સાથે જ ભાજપના કાર્યકરોને સ્થાનિક સ્તરે રહીને તંત્ર સાથે સંકલન સાધી અસરગ્રસ્તોની સતત સેવા કરવા આહ્વાન કર્યું હતું.

સી.આર. પાટીલે જણાવ્યું કે કંટ્રોલ રૂમ દ્વારા 24 કલાક પરિસ્થિતિ પર સતત નજર રાખવામાં આવી રહી છે. તેમણે નાગરિકોને અફવાઓથી દૂર રહેવા અને જિલ્લા પ્રશાસન દ્વારા આપવામાં આવતી સૂચનાઓનું પાલન કરવાની અપીલ કરી હતી.

આ સમીક્ષા બેઠકમાં રાજ્ય કક્ષાના મંત્રી નરેશભાઈ પટેલ, નવસારી જિલ્લા ભાજપ પ્રમુખ ભુરાભાઈ શાહ, સંબંધિત વિભાગોના ઉચ્ચ અધિકારીઓ તેમજ પક્ષના કાર્યકરો ઉપસ્થિત રહ્યા હતા.

---------------

હિન્દુસ્થાન સમાચાર / યજુવેન્દ્ર દુબે