ચમોલી, નવી દિલ્હી, 19 ઓગસ્ટ (હિ.સ.) ઉત્તરાખંડના ચમોલી જિલ્લામાં હાટ-સિયાસૈણ, માયાપુર (પીપલકોટી) ખાતે આવેલી વિષ્ણુગઢ-પીપલકોટી જળવિદ્યુત પરિયોજનાની નિર્માણાધીન સુરંગમાં થયેલી દુર્ઘટનામાં ઘાયલ થયેલા વધુ એક શ્રમિકનું બુધવારે સવારે સારવાર દરમિયાન મૃત્યુ થયું. આ સાથે જ દુર્ઘટનામાં મૃત્યુ પામેલા લોકોની સંખ્યા વધીને 11 થઈ ગઈ છે. મૃતક શ્રમિકની ઓળખ રોહિત તરીકે થઈ છે. તે દુર્ઘટનામાં ઘાયલ થયા બાદ અખિલ ભારતીય આયુર્વિજ્ઞાન સંસ્થાન, ઋષિકેશમાં સારવાર હેઠળ હતો. બુધવારે સવારે સારવાર દરમિયાન તેનું મૃત્યુ થયું.

રાજ્ય આપત્તિ સંચાલન કેન્દ્ર દ્વારા બુધવારે એક અખબારી યાદી દ્વારા જણાવવામાં આવ્યું કે, નિર્માણાધીન સુરંગમાં 13 ઓગસ્ટના રોજ પાણી અને કાટમાળ આવવાથી દુર્ઘટના થઈ હતી. દુર્ઘટના બાદ સુરંગમાં ફસાયેલા શ્રમિકોને બહાર કાઢવા માટે મોટા પાયે શોધ અને બચાવ અભિયાન ચલાવવામાં આવ્યું હતું. આ અભિયાનમાં એસડીઆરએફ, એનડીઆરએફ, આઈટીબીપી, સેના અને અન્ય બચાવ દળોએ ભાગ લીધો હતો. દુર્ઘટના બાદ ઘણા શ્રમિકોને સુરક્ષિત બહાર કાઢીને હોસ્પિટલોમાં દાખલ કરવામાં આવ્યા હતા. સારવાર દરમિયાન અત્યાર સુધીમાં મૃતકોની સંખ્યા વધીને 11 થઈ ગઈ છે.

ઉલ્લેખનીય છે કે, ઉત્તરાખંડના ચમોલી જિલ્લાના પીપલકોટીના માયાપુર ખાતે આવેલી ટીએચડીસી ની વિષ્ણુગઢ-પીપલકોટી જળવિદ્યુત પરિયોજનાની નિર્માણાધીન સુરંગમાં, 13 ઓગસ્ટના રોજ થયેલી દુર્ઘટના બાદ લગભગ 117 કલાક સુધી ચાલેલું શોધ અને બચાવ અભિયાન મંગળવારે પૂર્ણ થયું. સુરંગમાં પાણી લીક થવા અને ભૂસ્ખલનના કારણે ઘણા શ્રમિકો અંદર ફસાઈ ગયા હતા. દુર્ઘટનામાં 11 શ્રમિકોના મૃત્યુ થયા છે, જ્યારે 12 શ્રમિકોને સુરક્ષિત બહાર કાઢવામાં આવ્યા હતા. સુરક્ષિત બહાર કાઢવામાં આવેલા શ્રમિકોમાં સામેલ રોહિતનું બુધવારે સવારે અખિલ ભારતીય આયુર્વિજ્ઞાન સંસ્થાન, ઋષિકેશમાં સારવાર દરમિયાન મૃત્યુ થયું.

હિન્દુસ્થાન સમાચાર / રાજેશ કુમાર પાંડેય / ડો. રાજેશ

હિન્દુસ્થાન સમાચાર / માધવી વ્યાસ