નવી દિલ્હી, 06 ઓગસ્ટ (હિ.સ.). દેશમાં નેટફ્લિક્સના 10 વર્ષ પૂરા થવાનો જશ્ન શરૂ થઈ ગયો છે. આ ઐતિહાસિક અવસર પર નેટફ્લિક્સના સહ-મુખ્ય કાર્યકારી અધિકારી (કો-સીઈઓ) ટેડ સારન્ડોસે, વડાપ્રધાન નરેન્દ્ર મોદી સાથે મુલાકાત કરી. વડાપ્રધાન મોદીએ આ મુલાકાત પર ખુશી વ્યક્ત કરતા, બુધવારે મોડી રાત્રે પોસ્ટને એક્સ પર શેર કરી. બંને વચ્ચે મનોરંજનના વૈશ્વિક આયામો પર ચર્ચા થઈ.

વડાપ્રધાન મોદીએ લખ્યું, ''ટેડ સારન્ડોસને મળીને ખુશી થઈ. ભારતના મીડિયા અને મનોરંજન ક્ષેત્રની અપાર સંભાવનાઓ પર ચર્ચા કરી. ભારતમાં વાર્તા કહેવાની એક સમૃદ્ધ પરંપરા અને રચનાત્મક પ્રતિભાનો એક અસાધારણ ભંડાર છે. તેનો લાભ ઉઠાવીને સામગ્રી નિર્માણના વૈશ્વિક કેન્દ્ર તરીકે દેશની સ્થિતિને મજબૂત કરી શકાય છે.''

તેમણે પોતાની પોસ્ટ સાથે નેટફ્લિક્સ ઇન્ડિયાની પોસ્ટ પણ શેર કરી. તેમાં કહેવામાં આવ્યું, ''ભારતમાં નેટફ્લિક્સના 10 વર્ષ પૂરા થવાનો જશ્ન! અમારા કો-સીઈઓ ટેડ સારન્ડોસનું, માનનીય વડાપ્રધાન શ્રી નરેન્દ્ર મોદીને મળવું સન્માનની વાત રહી. તેમણે ભારતના મીડિયા અને મનોરંજન ઉદ્યોગને વૈશ્વિક સ્તર પર લઈ જવાના પોતાના સહિયારા દ્રષ્ટિકોણ પર ચર્ચા કરી.''

નેટફ્લિક્સ ઇન્ડિયાએ કહ્યું, ''ભારતમાં આ દિશામાં પગલાં ભરતા નેટફ્લિક્સ ઇન્ડિયા સ્ટોરીટેલિંગ ઇનિશિયેટિવની શરૂઆત કરવામાં આવી છે. આ એક એવું પ્લેટફોર્મ છે જે ભારતીય રચનાત્મક પ્રૌદ્યોગિકી સંસ્થાન (આઈઆઈસીટી) અને રાષ્ટ્રીય ફિલ્મ વિકાસ નિગમ (એનએફડીસી) સાથે કૌશલ્ય વિકાસ અને શિક્ષણ ભાગીદારી દ્વારા ભારતના રચનાત્મક પ્રતિભાની આગામી પેઢીને આગળ વધારવામાં મદદ કરશે.''

હિન્દુસ્થાન સમાચાર / મુકુન્દ

હિન્દુસ્થાન સમાચાર / ડો.હિતેશ એન.વ્યાસ