નવી દિલ્હી, 18 સપ્ટેમ્બર (હિ.સ.). વડાપ્રધાન નરેન્દ્ર મોદી, શનિવારે વિજ્ઞાન ભવનમાં ‘પર્યાવરણ અને આબોહવા ગતિશીલતાનું ભવિષ્ય’ વિષય પર આંતરરાષ્ટ્રીય સંમેલનનું ઉદ્ઘાટન કરશે. બે દિવસીય આ સંમેલન 19 અને 20 સપ્ટેમ્બરના રોજ રાષ્ટ્રીય હરિત અધિકરણ (એનજીટી) દ્વારા આયોજિત કરવામાં આવી રહ્યું છે.

વડાપ્રધાન કાર્યાલય અનુસાર, સંમેલનમાં, પર્યાવરણ અને આબોહવા સંબંધિત મહત્વપૂર્ણ પડકારો પર વિચાર-વિમર્શની સાથે પર્યાવરણીય શાસન વ્યવસ્થાને મજબૂત કરવાના ઉપાયો પર ચર્ચા થશે. આમાં, ભારતના સર્વોચ્ચ ન્યાયાલય અને વિવિધ ઉચ્ચ ન્યાયાલયોના ન્યાયાધીશો, જિલ્લા ન્યાયાલયોના ન્યાયાધીશો, વિવિધ મંત્રાલયોના સચિવો અને વરિષ્ઠ અધિકારીઓ સહિત પર્યાવરણ નિષ્ણાતો અને અન્ય સંબંધિત પક્ષો ભાગ લેશે.

સંમેલનમાં, 17 દેશોના પ્રતિષ્ઠિત ન્યાયાધીશો અને ન્યાયિક પ્રતિનિધિઓની પણ ભાગીદારી થશે. આ ઉપરાંત, રાજ્ય ન્યાયિક અકાદમીઓ, રાજ્ય કાનૂની સેવા સત્તામંડળો, રાજ્ય નિષ્ણાત મૂલ્યાંકન સમિતિઓ (એસઇએસી), રાજ્ય પર્યાવરણ પ્રભાવ આકારણી સત્તામંડળો (એસઇઆઇએએ) અને રાજ્ય આર્દ્રભૂમિ સત્તામંડળોના પ્રતિનિધિઓ પણ સામેલ થશે.

સંમેલનમાં, વિવિધ દેશો અને સંસ્થાઓ વચ્ચે ન્યાયિક દૃષ્ટિકોણ, વૈજ્ઞાનિક જ્ઞાન, પર્યાવરણીય શાસનની પ્રક્રિયાઓ તથા સંસ્થાકીય અનુભવોનું આદાન-પ્રદાન કરવામાં આવશે. આ સાથે, નીતિ નિર્માણ, તેના અમલીકરણ અને અમલમાં રહેલી ખામીઓ તથા પર્યાવરણ અને આબોહવા સંબંધિત પડકારો પર ચર્ચા કરવામાં આવશે.

સંમેલનનો ઉદ્દેશ્ય પર્યાવરણીય શાસન વ્યવસ્થાને વધુ અસરકારક બનાવવાની સાથે વિવિધ સંસ્થાઓ વચ્ચે સહયોગને મજબૂત કરવાના ઉપાયો શોધવાનો પણ છે.

હિન્દુસ્થાન સમાચાર / સુશીલ કુમાર / પવન કુમાર

હિન્દુસ્થાન સમાચાર / માધવી વ્યાસ