કચ્છ, 19 સપ્ટેમ્બર (હિ.સ.) : ભુજ તાલુકાના ટાંકણાસર ગામ નજીક વવાર ડુંગર વિસ્તારમાંથી દેશી બનાવટની મજલ લોડ બંદૂક સાથે એક ઇસમને ઝડપી પાડવામાં આવ્યો છે. પશ્ચિમ કચ્છ-ભુજ એસ.ઓ.જી. અને માનકુવા પોલીસ સ્ટેશનની ટીમે સંયુક્ત કામગીરી હાથ ધરી આ કાર્યવાહી કરી હોવાનું પોલીસ દ્વારા જણાવાયું છે.

પોલીસની ટીમ ટાંકણાસર ગામથી આગળ વવાર ડુંગર તરફના વિસ્તારમાં પેટ્રોલિંગ અને તપાસમાં હતી તે દરમિયાન શંકાસ્પદ હિલચાલ જણાતા એક ઇસમને અટકાવી તેની તપાસ હાથ ધરવામાં આવી હતી. તપાસ દરમિયાન તેની પાસેથી દેશી બનાવટની મજલ લોડ બંદૂક મળી આવી હતી. પોલીસે અગ્નિશસ્ત્ર અંગે જરૂરી પૂછપરછ હાથ ધરી વધુ તપાસ શરૂ કરી છે.

પોલીસના જણાવ્યા મુજબ પકડાયેલા ઇસમની ઓળખ સાલે દાઉદ જત, ઉંમર 28 વર્ષ, રહે. ટાંકણાસર, તાલુકો ભુજ, જિલ્લો કચ્છ તરીકે થઈ છે. તેની પાસેથી દેશી બનાવટની મજલ લોડ બંદૂક ઉપરાંત એક મોબાઈલ ફોન પણ કબજે કરવામાં આવ્યો છે.

કબજે કરાયેલા મુદ્દામાલમાં આશરે રૂ. 2 હજારની કિંમતની એક દેશી બનાવટની મજલ લોડ બંદૂક અને રૂ. 10 હજારની કિંમતનો એક મોબાઈલ ફોન મળી કુલ રૂ. 12 હજારનો મુદ્દામાલ હોવાનું પોલીસ દ્વારા જણાવાયું છે. બંદૂક ઇસમ પાસે કયા હેતુથી હતી અને તેનો અગાઉ કોઈ ગુનાહિત પ્રવૃત્તિમાં ઉપયોગ થયો છે કે કેમ તે સહિતના મુદ્દાઓને લઈને તપાસ આગળ ધપાવવામાં આવી રહી છે.

આ સમગ્ર કાર્યવાહી એસ.ઓ.જી. ભુજના પોલીસ ઇન્સ્પેક્ટર એ.ડી. પારમાર અને પોલીસ સબ ઇન્સ્પેક્ટર ટી.બી. રબારીના માર્ગદર્શન હેઠળ હાથ ધરાઈ હતી. કામગીરીમાં એ.એસ.આઈ. નરેન્દ્રસિંહ ઝાલા, પોલીસ હેડ કોન્સ્ટેબલ ભાવેશભાઈ ચૌધરી, પોલીસ કોન્સ્ટેબલ દિનેશભાઈ ચૌધરી તેમજ એલ.આર. પોલીસ કોન્સ્ટેબલ મહિપાલસિંહ જાડેજા, રવિન્દ્રકુમાર રાઠોડ અને મીતેશભાઈ રાજગોર જોડાયા હતા.

પોલીસે કબજે કરેલા અગ્નિશસ્ત્રને આધારે કાયદેસરની કાર્યવાહી હાથ ધરી છે. સમગ્ર મામલે વધુ તપાસ દરમિયાન બંદૂકનો સ્ત્રોત, તેને રાખવા પાછળનો હેતુ તથા અન્ય કોઈ વ્યક્તિની સંડોવણી છે કે કેમ તે અંગે વિગતો બહાર આવવાની શક્યતા છે.

---------------

હિન્દુસ્થાન સમાચાર / Rohit Ramjibhai Padhiyar