સુરત, 02 સપ્ટેમ્બર (હિ.સ.) સુરત શહેર વિસ્તારમાં રહેતી એક પરિણીત મહિલા પતિના વારંવારના ઘરેલુ વિવાદ, અપશબ્દો, વહેમ-શંકા અને માનસિક ત્રાસથી પરેશાન થઈ મદદ માટે 181 અભયમ મહિલા હેલ્પલાઇનનો સંપર્ક કર્યો હતો. મહિલાનો મદદ માટેનો કોલ મળતાની સાથે જ 181ની ઉમરાની ટીમે તાત્કાલિક સ્થળ પર પહોંચી મહિલાની રજૂઆત સંવેદનશીલતાથી સાંભળી સમગ્ર પરિસ્થિતિ જાણી જરૂરી સહાય, કાઉન્સેલિંગ અને માર્ગદર્શન પૂરું પાડ્યું હતું.

મહિલાએ જણાવ્યું કે, તેમના લગ્નના આશરે અઢી વર્ષ થયા છે અને બંનેએ પ્રેમલગ્ન કર્યા છે.

લગ્ન બાદ પતિ નાની-નાની બાબતોમાં તેમની સાથે અવારનવાર વિવાદ કરતા, અપશબ્દો બોલતા તેમજ તેમની દૈનિક જીવનશૈલીમાં બિનજરૂરી રોકટોક કરતા હોવાનું મહિલાએ જણાવ્યું હતું. મહિલાની રજૂઆત મુજબ, તેમને ઘરની બહાર જવા, કપડાં પહેરવા તેમજ પડોશની અન્ય મહિલાઓ સાથે વાતચીત કરવા જેવી બાબતોમાં પણ રોકટોક કરવામાં આવતી હતી.

મહિલાએ વધુમાં રજૂઆત કરી હતી કે, પતિ દ્વારા તેમના ચારિત્ર્ય અંગે વારંવાર વહેમ-શંકા વ્યક્ત કરવામાં આવે છે તેમજ અન્ય વ્યક્તિ સાથે અયોગ્ય સંબંધ હોવાની શંકાના આધારે તેમની સાથે વિવાદ કરવામાં આવે છે. આવા સતત વિવાદ અને વર્તનના કારણે પોતે માનસિક રીતે પરેશાન અને તણાવગ્રસ્ત હોવાનું મહિલાએ 181 અભયમ સમક્ષ જણાવ્યું હતું.

મદદ માટેનો કોલ પ્રાપ્ત થતાં 181 અભયમ ઉમરા ટીમે તાત્કાલિક પ્રતિસાદ આપી ઘટના સ્થળે પહોંચી સૌપ્રથમ મહિલાની વાત ધીરજપૂર્વક, નિષ્પક્ષતા અને સંવેદનશીલતાથી સાંભળી હતી. ટીમ દ્વારા મહિલાની પરિસ્થિતિ, પરિવારિક વાતાવરણ અને સમસ્યાના કારણો અંગે જરૂરી માહિતી મેળવી સમગ્ર પરિસ્થિતિને સમજવાનો પ્રયાસ કરવામાં આવ્યો હતો.

ત્યારબાદ 181 અભયમ ટીમ દ્વારા પતિનું અસરકારક કાઉન્સેલિંગ કરવામાં આવ્યું હતું. કાઉન્સેલિંગ દરમિયાન પતિને દાંપત્ય જીવનમાં પરસ્પર સન્માન, વિશ્વાસ, સંવાદ અને સમજણનું મહત્વ સમજાવ્યું. પત્ની સાથે અપમાનજનક ભાષાનો ઉપયોગ ન કરવો, બિનજરૂરી વહેમ-શંકાના આધારે વિવાદ ન કરવો તેમજ નાની-નાની બાબતોને લઈને મતભેદને ગંભીર સ્વરૂપ ન આપવા અંગે સમજ આપવામાં આવી હતી.

સાથે જ 181 અભયમ ટીમ દ્વારા મહિલાને તેમના કાયદાકીય અધિકારો અંગે જરૂરી માર્ગદર્શન આપવામાં આવ્યું હતું. મહિલાઓને ઘરેલુ હિંસાથી રક્ષણ આપતો કાયદો, 2005 હેઠળ ઘરેલુ હિંસા સામે ઉપલબ્ધ કાયદાકીય રક્ષણ અને યોગ્ય રાહત મેળવવાની જોગવાઈઓ અંગે સામાન્ય સમજ આપવામાં આવી હતી. મહિલાને ભવિષ્યમાં પરિસ્થિતિ ગંભીર બને અથવા પોતાની સલામતી અંગે કોઈ ભય ઊભો થાય તો તાત્કાલિક 181 અભયમનો સંપર્ક કરવા તથા જરૂરિયાત મુજબ સંબંધિત કાયદાકીય અને સરકારી સહાય મેળવવા અંગે પણ જણાવવામાં આવ્યું હતું.

181 અભયમ ટીમના અસરકારક કાઉન્સેલિંગ અને પરિવારિક સમજાવટ બાદ પતિએ આગળથી પત્ની સાથે બિનજરૂરી વિવાદ નહીં કરવા, વહેમ-શંકાના આધારે વિવાદ ઊભો નહીં કરવા તેમજ પત્ની સાથે પ્રેમ, સન્માન અને સમજણપૂર્વક વર્તન કરવાનો વિશ્વાસ વ્યક્ત કર્યો હતો.

અભયમ ટીમે બંને પક્ષોને પરસ્પર સન્માન, વિશ્વાસ અને સંવાદ જાળવી રાખવા તેમજ ભવિષ્યમાં કોઈ મતભેદ ઊભો થાય તો શાંતિપૂર્ણ રીતે તેનો ઉકેલ લાવવા સમજાવ્યું હતું.

આમ, 181 અભયમ ઉમરા, સુરત ટીમની તાત્કાલિક સ્થળ પરની કામગીરી, સંવેદનશીલ કાઉન્સેલિંગ, પરિવારિક સમજાવટ અને કાયદાકીય માર્ગદર્શનના સંકલિત પ્રયાસોથી પતિ-પત્ની વચ્ચેના વિવાદને શાંતિપૂર્ણ રીતે ઉકેલવામાં મહત્વપૂર્ણ મદદ મળી હતી. 181 અભયમ દ્વારા મહિલાની રજૂઆતને સંવેદનશીલતાથી સાંભળી તેને જરૂરી સહાય અને માર્ગદર્શન આપવામાં આવ્યું હતું તેમજ પરિવારિક સંબંધોમાં સંવાદ, સમજણ, વિશ્વાસ અને પરસ્પર સન્માન જળવાઈ રહે તે માટે અસરકારક કાઉન્સેલિંગ કરવામાં આવ્યું હતું

હિન્દુસ્થાન સમાચાર / યજુવેન્દ્ર દુબે