નવી દિલ્હી, 23 સપ્ટેમ્બર (હિ.સ.) ભારત ચૂંટણી પંચ સાથે સંકળાયેલા સૂત્રોએ જણાવ્યું કે, મતદાર યાદીના સઘન પુનરાવર્તન (એસઆઈઆર) સહિત પંચના તમામ નિર્ણયો મુખ્ય ચૂંટણી કમિશનર અને બંને ચૂંટણી કમિશનરોની મંજૂરીથી સર્વસંમતિથી લેવામાં આવ્યા છે. આ સ્પષ્ટતા ચૂંટણી પંચની અંદર નિર્ણયોને લઈને કથિત મતભેદના અહેવાલો પછી આવી છે.

પંચના સૂત્રો અનુસાર, એસઆઈઆર અને અન્ય નિર્ણયોમાં મુખ્ય ચૂંટણી કમિશનર જ્ઞાનેશ કુમારની સાથે ચૂંટણી કમિશનર સુખબીર સિંહ સંધુ અને વિવેક જોષીની પણ મંજૂરી રહી છે. ચૂંટણી પંચની વર્તમાન ત્રણ સભ્યોની સંરચનામાં જ્ઞાનેશ કુમાર મુખ્ય ચૂંટણી કમિશનર તથા સુખબીર સિંહ સંધુ અને વિવેક જોષી ચૂંટણી કમિશનર છે.

હકીકતમાં, એક અંગ્રેજી અખબારના એક અહેવાલમાં દાવો કરવામાં આવ્યો કે, બંને ચૂંટણી કમિશનરોએ છેલ્લા 10 મહિનામાં પંચના નામે લેવાયેલા કેટલાક નિર્ણયો પર ઓછામાં ઓછી 14 વખત વાંધો નોંધાવ્યો. અહેવાલ અનુસાર, આ વાંધાઓમાં ફોર્મ-6 માં ફેરફાર, મતદાર યાદીના ડિજિટલ રેકોર્ડ સુધી પહોંચ, પશ્ચિમ બંગાળમાં મતદાર નામો સાથે સંબંધિત અપીલ અને ગોવામાં પાત્ર મતદારોના નામ નોંધણી જેવા મામલાઓ સામેલ હતા.

આ પછી પંચ સાથે સંકળાયેલા સૂત્રોએ આ અહેવાલોના સંદર્ભમાં કહ્યું કે, પંચના તમામ નિર્ણયો સર્વસંમતિથી લેવામાં આવ્યા છે અને એસઆઈઆર પણ ત્રણેય ચૂંટણી કમિશનરોની મંજૂરીથી આગળ વધ્યો છે.

પંચ તરફથી અગાઉ પણ એસઆઈઆરને લઈને ત્રણેય કમિશનરોની સંયુક્ત ભૂમિકા સામે આવતી રહી છે. ઓક્ટોબર 2025 માં એસઆઈઆરની તૈયારીઓને લઈને આયોજિત મુખ્ય ચૂંટણી અધિકારીઓના સંમેલનની અધ્યક્ષતા જ્ઞાનેશ કુમારે કરી હતી, જેમાં બંને ચૂંટણી કમિશનર પણ હાજર હતા.

હિન્દુસ્થાન સમાચાર / પ્રશાંત શેખર / મુકુંદ

હિન્દુસ્થાન સમાચાર / માધવી વ્યાસ