નવી દિલ્હી, 23 સપ્ટેમ્બર (હિ.સ.). જાહેર ક્ષેત્રની બેંકોની 28 થી 30 સપ્ટેમ્બર સુધી પ્રસ્તાવિત દેશવ્યાપી હડતાળને ધ્યાનમાં રાખીને રિઝર્વ બેંક ઓફ ઇન્ડિયા (આરબીઆઈ) એ મોટો નિર્ણય લીધો છે. રિઝર્વ બેંકે જણાવ્યું છે કે, રવિવાર, 27 સપ્ટેમ્બર, 2026 ના રોજ બેંકો ખુલ્લી રહેશે, જેથી ગ્રાહકોને કોઈ મુશ્કેલી ન પડે.

નાણા મંત્રાલયે બુધવારે જારી કરેલા નિવેદનમાં જણાવ્યું હતું કે, યુનાઈટેડ ફોરમ ઓફ બેંક યુનિયન્સ (યુએફબીયુ) એ 28 થી 30 સપ્ટેમ્બર, 2026 સુધી ત્રણ દિવસની રાષ્ટ્રવ્યાપી બેંક હડતાળ બોલાવી છે. આ હડતાળ 26 અને 27 સપ્ટેમ્બરની સપ્તાહાંતની રજાઓના બરાબર પછી થઈ રહી છે. તેથી, સરકારે નાગરિકોની બેંકિંગ જરૂરિયાતોને ધ્યાનમાં રાખીને અગાઉથી જ આ જરૂરી પગલાં લીધાં છે.

મંત્રાલયે જણાવ્યું હતું કે, એ સુનિશ્ચિત કરવા માટે કે સામાન્ય લોકોની બેંકિંગ સંબંધિત જરૂરી જરૂરિયાતો લાંબા સમય સુધી પ્રભાવિત ન થાય, તમામ પબ્લિક સેક્ટર બેંકો અને રિજનલ રૂરલ બેંકો રવિવાર, 27 સપ્ટેમ્બર 2026 ના રોજ સામાન્ય રીતે કામ કરશે.

નાણા મંત્રાલયે જણાવ્યું હતું કે, રિઝર્વ બેંકે તમામ બેંક શાખાઓ, કાર્યાલયો, એટીએમ લિંક શાખાઓ અને કરન્સી ચેસ્ટને 27 સપ્ટેમ્બર 2026 ના રોજ સંપૂર્ણપણે કાર્યરત રાખવાની મંજૂરી આપી દીધી છે.

નાણા મંત્રાલયે જણાવ્યું હતું કે, બેંક ગ્રાહકોની સુખાકારી અને સુવિધા સરકારની સૌથી મોટી પ્રાથમિકતા છે. સરકાર અને બેંક મેનેજમેન્ટે યુનિયનોને પ્રસ્તાવિત હડતાળ મોકૂફ રાખવા અપીલ કરી છે અને એ સુનિશ્ચિત કરવા માટે પણ પગલાં લીધાં છે કે જરૂરી બેંકિંગ સેવાઓ કોઈપણ અવરોધ વિના ચાલુ રહે.

હિન્દુસ્થાન સમાચાર / પ્રજેશ શંકર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ