મુંબઈ, નવી દિલ્હી, 21 ડિસેમ્બર (હિ.સ.) મુંબઈના ગેટવે ઓફ ઈન્ડિયાથી એલિફન્ટા જઈ રહેલી નીલકમલ બોટના અકસ્માતમાં, ગુમ થયેલા સાત વર્ષના બાળકનો મૃતદેહ શનિવારે બપોરે રેસ્ક્યુ ટીમ દ્વારા મળી આવ્યો હતો. આ રીતે આ ઘટનામાં મૃત્યુઆંક વધીને 15 થઈ ગયો છે. કોલાબા પોલીસ સ્ટેશન અને નેવીની ટીમ આ ઘટનાની તપાસ કરી રહી છે. આ માહિતી પોલીસ દ્વારા આપવામાં આવી છે.

પોલીસ સૂત્રોના જણાવ્યા અનુસાર, બચાવ ટીમે આજે બપોરે ગુમ થયેલા સાત વર્ષના બાળકનો મૃતદેહ બહાર કાઢ્યો હતો. તેની ઓળખ જોહાન મોહમ્મદ નિસાર અહમદ પઠાણ તરીકે થઈ છે. નીલકમલ બોટ અકસ્માત બાદ, આ બાળક 18 ડિસેમ્બરથી ગુમ હતો. આ જ અકસ્માતમાં બાળકની માતાનું પણ મૃત્યુ થયું હતું. માતા અને પુત્ર ગોવાના રહેવાસી હતા. આ પહેલા ગુરુવારે રેસ્ક્યુ ટીમ દ્વારા 43 વર્ષીય હંસરાજ ભાટીનો મૃતદેહ મળી આવ્યો હતો. આ રીતે આ ઘટનામાં કુલ મૃતકોની સંખ્યા 15 પર પહોંચી ગઈ છે.

ભારતીય નૌકાદળે નીલકમલ બોટ દુર્ઘટનાની તપાસ શરૂ કરી દીધી છે, જે શહેરના બંદર વિસ્તારમાં થયેલા સૌથી ભયંકર અકસ્માતોમાંની એક છે. એસએઆર ઓપરેશનના ભાગરૂપે ગુમ થયેલા મુસાફરોને શોધવા માટે નેવી અને કોસ્ટ ગાર્ડ તરફથી નૌકાદળના હેલિકોપ્ટર અને બોટ તૈનાત કરવામાં આવી હતી, એમ એક અધિકારીએ જણાવ્યું હતું. બંને જહાજોમાં સવાર 113 લોકોમાંથી 15ના મોત થયા હતા અને બે ઘાયલો સહિત 98ને બચાવી લેવાયા હતા. આ અધિકારીએ જણાવ્યું હતું કે, નૌકાદળના જહાજમાં છ લોકો સવાર હતા, જેમાંથી બે બચી ગયા હતા. આ અકસ્માત ત્યારે થયો જ્યારે હાઇ-સ્પીડ નેવલ બોટ, જેનું એન્જિન પરીક્ષણ ચાલી રહ્યું હતું, તેણે નિયંત્રણ ગુમાવ્યું અને મુંબઈ કિનારે, પેસેન્જર ફેરી 'નીલ કમલ' સાથે અથડાઈ. 100 થી વધુ મુસાફરો સાથેની બોટ, ગેટવે ઓફ ઈન્ડિયાથી એલિફન્ટા પર્યટન સ્થળ તરફ જઈ રહી હતી.

કોલાબા પોલીસ સ્ટેશનની ટીમ પણ આ મામલે તપાસ કરી રહી છે. મહારાષ્ટ્ર મેરીટાઇમ બોર્ડ (એમએમબી) દ્વારા જારી કરાયેલા દસ્તાવેજો અનુસાર, બોટને 84 મુસાફરો અને 6 ક્રૂ સભ્યોને લઈ જવાની મંજૂરી આપવામાં આવી હતી, પરંતુ તે ઓવરલોડ હતી, એમ એક પોલીસ અધિકારીએ જણાવ્યું હતું. આ મામલે તપાસ કરવામાં આવી રહી છે.

હિન્દુસ્થાન સમાચાર / રાજબહાદુર યાદવ / રામાનુજ શર્મા

હિન્દુસ્થાન સમાચાર / ડો.હિતેશ એન.વ્યાસ