કારગીલ, નવી દિલ્હી, 26 જુલાઇ (હિ.સ.). આજે, 25મા કારગિલ વિજય દિવસ પર, વડા પ્રધાન નરેન્દ્ર મોદીએ, દ્રાસમાં કારગિલ યુદ્ધ સ્મારક ખાતે કારગિલ યુદ્ધના નાયકોને શ્રદ્ધાંજલિ અર્પણ કરી હતી. આ પ્રસંગે વડાપ્રધાન મોદીએ કહ્યું કે, કારગિલ વિજય દિવસ એ વાતનો સાક્ષી છે કે, રાષ્ટ્ર માટે આપેલા બલિદાન અમર છે. આપણે માત્ર કારગીલમાં યુદ્ધ જીત્યા નથી. સત્યનો પણ વિજય થયો હતો. તે સમયે ભારત શાંતિ માટે કામ કરી રહ્યું હતું. પાકિસ્તાને દુનિયા સાથે દગો કર્યો.
વડાપ્રધાન મોદીએ કહ્યું કે, 26 જુલાઈ 1999ના રોજ ભારતે કારગિલ યુદ્ધ જીત્યું હતું. આજે લદ્દાખની આ મહાન ભૂમિ કારગિલ વિજય દિવસની 25મી વર્ષગાંઠની સાક્ષી બની રહી છે. મને યાદ છે કે, કેવી રીતે આપણા દળોએ આટલી ઊંચાઈએ આવી મુશ્કેલ લડાયક કામગીરી હાથ ધરી હતી. દેશને જીત અપાવનાર આવા તમામ બહાદુરોને હું આદરપૂર્વક નમન કરું છું. કારગીલમાં માતૃભૂમિની રક્ષા માટે સર્વોચ્ચ બલિદાન આપનારા શહીદોને હું સલામ કરું છું. વડાપ્રધાને કહ્યું કે, આ યુદ્ધમાં પાકિસ્તાનને હારનો સામનો કરવો પડ્યો હતો પરંતુ પાકિસ્તાને તેના ઈતિહાસમાંથી કંઈ શીખ્યું નથી.
આ પછી વડા પ્રધાન મોદીએ શિંકુન લા ટનલ પ્રોજેક્ટનો વર્ચ્યુઅલ રીતે પ્રથમ વિસ્ફોટ કર્યો હતો. આ ટનલ લદ્દાખને તમામ હવામાનમાં કનેક્ટિવિટી પ્રદાન કરશે. આ ટનલ પ્રોજેક્ટમાં 4.1 કિમી લાંબી ટ્વીન-ટ્યુબ ટનલનો પણ સમાવેશ થાય છે, જેનું નિર્માણ નિમુ-પદુમ-દારચા રોડ પર લગભગ 15,800 ફૂટની ઊંચાઈએ કરવામાં આવશે. આની મદદથી લેહને દરેક સિઝનમાં કનેક્ટિવિટી પૂરી પાડી શકાય છે. આ વિશ્વની સૌથી ઊંચી ટનલ હશે. શિંકુન લા ટનલ માત્ર આપણા સશસ્ત્ર દળો અને સાધનોની ઝડપી અને કાર્યક્ષમ હિલચાલને સુનિશ્ચિત કરશે નહીં પરંતુ લદ્દાખમાં આર્થિક અને સામાજિક વિકાસને પણ વેગ આપશે.
હિન્દુસ્થાન સમાચાર/બલવાન સિંહ/મુકુંદ / ડો. હિતેશ
હિન્દુસ્થાન સમાચાર / ડો.હિતેશ એન.વ્યાસ / માધવી વ્યાસ
