કોલકતા, નવી દિલ્હી, 10 જાન્યુઆરી (હિ.સ.). રાષ્ટ્રીય સ્વયંસેવક સંઘ (આરએસએસ) ના વડા ડૉ. મોહન ભાગવત, આવતા મહિને 10 દિવસ માટે પશ્ચિમ બંગાળની મુલાકાત લેશે. આ યાત્રા 9 ફેબ્રુઆરીથી શરૂ થશે અને 16 ફેબ્રુઆરી સુધી ચાલુ રહેશે. આ સમયગાળા દરમિયાન, તેઓ સંઘના અન્ય ઉચ્ચ પદાધિકારીઓ સાથે રાજ્યના વિવિધ ભાગોમાં સંગઠનની પ્રવૃત્તિઓની સમીક્ષા કરશે.

ભાગવતની સાથે, આરએસએસના સહકાર્યકર દત્તાત્રેય હોસાબલે સહીત આઠ વરિષ્ઠ પદાધિકારીઓ પણ રહેશે. આ પહેલી વાર છે, જ્યારે આરએસએસ ના ટોચના નેતાઓ આટલા મોટા પાયે બંગાળની મુલાકાત લેશે, જે આગામી વિધાનસભા ચૂંટણી પહેલા રાજ્યમાં સંઘની વધતી સક્રિયતા સ્પષ્ટપણે દર્શાવે છે.

મુખ્યત્વે તેમનો પ્રવાસ ત્રણ ભાગમાં વહેંચાયેલો છે -

દક્ષિણ બંગાળ (૯-૧૧ ફેબ્રુઆરી): યાત્રાના પહેલા ત્રણ દિવસોમાં, દક્ષિણ બંગાળના જિલ્લાઓમાં સંઘની પ્રવૃત્તિઓ પર ધ્યાન કેન્દ્રિત કરવામાં આવશે.

બર્દવાન સત્ર (૧૧-૧૬ ફેબ્રુઆરી): ભાગવત અને અન્ય પદાધિકારીઓ ત્યારબાદ મધ્ય બંગાળના પૂર્વ બર્દવાન જિલ્લામાં સંગઠનની કામગીરીની સમીક્ષા કરશે. આમાં, આદિવાસી પ્રભુત્વ ધરાવતા વિસ્તારો પર ખાસ ધ્યાન આપવામાં આવશે.

જાહેર રેલી (૧૬ ફેબ્રુઆરી): આ પ્રવાસ બર્દવાનમાં જાહેર રેલી સાથે સમાપ્ત થશે.

ભલે આરએસએસ એ આ મુલાકાતને નિયમિત સંગઠનાત્મક મુલાકાત ગણાવી હોય, પરંતુ રાજકીય નિષ્ણાતો તેને ખૂબ જ મહત્વપૂર્ણ માની રહ્યા છે. પડોશી દેશ બાંગ્લાદેશમાં હિન્દુ લઘુમતીઓ સામેની હિંસા અને પશ્ચિમ બંગાળ પર તેની અસરને ધ્યાનમાં રાખીને આ મુલાકાત વધુ સુસંગત છે.

હિન્દુસ્થાન સમાચાર / ઓમ પરાશર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ