નવી દિલ્હી, 15 ઓક્ટોબર (હિ.સ.). ભારત અને સાઉદી અરેબિયાએ રસાયણ અને પેટ્રોકેમિકલ ક્ષેત્રમાં દ્વિપક્ષીય સહયોગ વધારવા, રોકાણને પ્રોત્સાહન આપવા અને સહયોગના નવા ક્ષેત્રો શોધવાનો નિર્ણય લીધો છે. બંને પક્ષોએ આ ક્ષેત્રમાં કાયમી અને પરસ્પર ફાયદાકારક ભાગીદારી બનાવવા માટે તેમની પ્રતિબદ્ધતાનો પુનરોચ્ચાર કર્યો, જે ભારત અને સાઉદી અરેબિયા વચ્ચેના વ્યૂહાત્મક અને આર્થિક સંબંધોને વધુ મજબૂત બનાવશે.

કેન્દ્રીય રસાયણ અને ખાતર મંત્રાલયે રસાયણ અને પેટ્રોકેમિકલ ક્ષેત્રમાં બંને દેશો વચ્ચે દ્વિપક્ષીય સહયોગને વધુ મજબૂત બનાવવા માટે સાઉદી અરેબિયાના ઉદ્યોગ અને ખનિજ મંત્રાલય સાથે દ્વિપક્ષીય બેઠક યોજી હતી. આ બેઠકની અધ્યક્ષતા સાઉદી અરેબિયાના ઉદ્યોગ અને ખનિજ નાયબ મંત્રી ખલીલ બિન ઇબ્રાહિમ બિન સલામા અને રસાયણ અને પેટ્રોકેમિકલ કેન્દ્રીય સચિવ નિવેદિતા શુક્લા વર્માએ કરી હતી. મંત્રાલયના જણાવ્યા અનુસાર, બેઠક દરમિયાન દ્વિપક્ષીય સહયોગ વધારવા, રોકાણને પ્રોત્સાહન આપવા અને આ ક્ષેત્રમાં સહયોગના નવા ક્ષેત્રોની શોધખોળ પર ચર્ચા કરવામાં આવી હતી. બંને દેશો આ ક્ષેત્રમાં સંશોધન અને વિકાસ તેમજ કૌશલ્ય વિકાસના ક્ષેત્રોમાં સહયોગ કરવા સંમત થયા હતા.

સાઉદી અરેબિયા ભારતનો ચોથો સૌથી મોટો વેપારી ભાગીદાર છે. ભારત સાઉદી અરેબિયાનો બીજો સૌથી મોટો વેપારી ભાગીદાર પણ છે. નાણાકીય વર્ષ 2024-25માં બંને દેશો વચ્ચે દ્વિપક્ષીય વેપાર 41.88 અબજ અમેરિકી ડોલર સુધી પહોંચવાનો અંદાજ છે, જેમાં રસાયણો અને પેટ્રોકેમિકલ્સનો ફાળો 10 ટકા અથવા 4.5 અબજ અમેરિકી ડોલર છે.

હિન્દુસ્થાન સમાચાર / પ્રજેશ શંકર / સુનિત નિગમ

હિન્દુસ્થાન સમાચાર / માધવી વ્યાસ