- દહેરાદૂનમાં વધુ એક ગેરકાયદેસર મજાર દૂર કરવામાં આવી, વહીવટીતંત્રની કાર્યવાહી ચાલુ

દેહરાદૂન, નવી દિલ્હી, 28 ડિસેમ્બર (હિ.સ.). અત્યાર સુધીમાં, ધામી સરકારે સરકારી જમીન પર બનેલ કુલ 571 ગેરકાયદેસર મજારો દૂર કરી છે. ગઈકાલે મોડી રાત્રે, ઉત્તરાખંડની રાજધાની દેહરાદૂન ખાતે વહીવટીતંત્રે અજબપુર કલાં વિસ્તારમાં શાસ્ત્રી નગરમાં ગેરકાયદેસર મજાર તોડી પાડી હતી. નોટિસ છતાં દસ્તાવેજો ન મળતાં આ કાર્યવાહી કરવામાં આવી હતી.

મુખ્યમંત્રી પુષ્કર સિંહ ધામીએ જણાવ્યું છે કે, સરકારી જમીન પર અતિક્રમણ કરીને બાંધવામાં આવેલા ગેરકાયદેસર બાંધકામો સામે કડક કાર્યવાહી કરવામાં આવી રહી છે. લોકોને આવા બાંધકામો જાતે જ દૂર કરવા અપીલ કરવામાં આવી છે.

આ કાર્યવાહીના લગભગ બે અઠવાડિયા પહેલા, વહીવટીતંત્રે સ્થળ પર એક નોટિસ લગાવી હતી, જેમાં લોકોને માળખાના બાંધકામ સંબંધિત માન્ય દસ્તાવેજો સબમિટ કરવાની સૂચના આપવામાં આવી હતી. નિર્ધારિત સમયમર્યાદામાં કોઈ પ્રતિભાવ ન મળતાં આ કાર્યવાહી કરવામાં આવી હતી.

જિલ્લા મેજિસ્ટ્રેટની સૂચના પર, સિટી મેજિસ્ટ્રેટ પ્રત્યુષ સિંહ અને એસડીએમ હરિ ગિરીના નેતૃત્વ હેઠળની મ્યુનિસિપલ કોર્પોરેશનની ટીમે ગેરકાયદેસર મજાર દૂર કરી. કામગીરી દરમિયાન માળખા નીચે કોઈ અવશેષો મળ્યા ન હતા. દૂર કરાયેલ કાટમાળ સ્થળ પરથી સાફ કરવામાં આવ્યો હતો.

એસએસપી અજય સિંહે જણાવ્યું હતું કે, સુરક્ષા કારણોસર કામગીરી પહેલા વિસ્તાર સીલ કરવામાં આવ્યો હતો. લગભગ એક કલાક ચાલેલા આ ઓપરેશન દરમિયાન કોઈ વિરોધ કે અનિચ્છનીય ઘટના બની નથી. વહીવટી અધિકારીઓના જણાવ્યા અનુસાર, રાજ્ય સરકારે અત્યાર સુધીમાં સરકારી જમીન પર બનેલા કુલ 571 ગેરકાયદેસર મજારો દૂર કરી છે.

હિન્દુસ્થાન સમાચાર / રાજેશ કુમાર / સંજીવ પાશ

હિન્દુસ્થાન સમાચાર / માધવી વ્યાસ