નવી દિલ્હી, 19 એપ્રિલ (હિ.સ.). ભારત અને અમેરિકા વચ્ચે પ્રસ્તાવિત દ્વિપક્ષીય વેપાર કરાર માટે બંને દેશો દ્વારા અંતિમ સ્વરૂપ આપવામાં આવેલા સંદર્ભની શરતો (ટીઓઆર) માં લગભગ 19 પ્રકરણો છે. આમાં માલસામાન, સેવાઓની ઉપલબ્ધતા અને કસ્ટમ સુવિધા જેવા મુદ્દાઓનો સમાવેશ થાય છે.

વાટાઘાટોને વધુ વેગ આપવાના પ્રયાસમાં, ભારતની એક સત્તાવાર ટીમ આવતા અઠવાડિયે વોશિંગ્ટનની મુલાકાત લઈ રહી છે જેથી પ્રસ્તાવિત ભારત-અમેરિકા દ્વિપક્ષીય વેપાર કરાર (બીટીએ) માટે, ઔપચારિક રીતે વાટાઘાટો શરૂ કરતા પહેલા કેટલાક મુદ્દાઓ પરના મતભેદોને દૂર કરી શકાય, એમ સત્તાવાર સૂત્રોએ શનિવારે જણાવ્યું હતું.

ભારતના મુખ્ય વાટાઘાટકાર, વાણિજ્ય વિભાગના અધિક સચિવ રાજેશ અગ્રવાલ, બંને દેશો વચ્ચેની પ્રથમ રૂબરૂ વાટાઘાટો માટે ટીમનું નેતૃત્વ કરશે. રાજેશ અગ્રવાલને 18 એપ્રિલના રોજ આગામી વાણિજ્ય સચિવ તરીકે નિયુક્ત કરવામાં આવ્યા હતા. તેઓ એક ઓક્ટોબરથી ચાર્જ સંભાળશે.

મળતી માહિતી મુજબ, વોશિંગ્ટનમાં ભારતીય સત્તાવાર ટીમ અને અમેરિકન સમકક્ષોની ત્રણ દિવસીય વાટાઘાટો બુધવાર, 23 એપ્રિલથી શરૂ થશે. આ મુલાકાત ઉચ્ચ સ્તરીય યુએસ ટીમના ભારત પ્રવાસના થોડા અઠવાડિયા પછી થઈ રહી છે.

ઉલ્લેખનીય છે કે, બંને પક્ષો 9 એપ્રિલે યુએસ રાષ્ટ્રપતિ ડોનાલ્ડ ટ્રમ્પ દ્વારા જાહેર કરાયેલા નવા ટેરિફ પર 90 દિવસના મોરેટોરિયમનો લાભ લેવા માંગે છે.

હિન્દુસ્થાન સમાચાર/પ્રજેશ શંકર/સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ