વોશિંગ્ટન, નવી દિલ્હી, 19 જૂન (હિ.સ.). રાષ્ટ્રપતિ ડોનાલ્ડ ટ્રમ્પે, મંગળવારે રાત્રે ઈરાન પર હુમલો કરવાની યોજનાને મંજૂરી આપી હતી. તેમણે હુમલો કરવો કે નહીં તે અંગે અંતિમ નિર્ણય લીધો નથી. તેમણે ઇઝરાયલના હવાઈ અભિયાનમાં જોડાવું કે નહીં, તે અંગે ઔપચારિક રીતે નિર્ણય પણ લીધો નથી. અમેરિકાના 'સીબીએસ ન્યૂઝ' ચેનલે 18 જૂનના રોજ પ્રસારિત થયેલા તેના અહેવાલમાં એક વરિષ્ઠ ગુપ્તચર સ્ત્રોત અને સંરક્ષણ વિભાગના અધિકારીને ટાંકીને આ દાવો કર્યો છે.

સીબીએસ ન્યૂઝના અહેવાલ મુજબ, સૂત્રોએ જણાવ્યું હતું કે, જો તેહરાન પોતાનો પરમાણુ કાર્યક્રમ છોડી દેવા સંમત થાય છે, તો અમેરિકા હુમલો કરશે નહીં. ટ્રમ્પે હુમલાની યોજનાને મંજૂરી આપતી વખતે આ વાત કહી હતી. ચેનલ અનુસાર, આ સમાચાર સૌપ્રથમ ધ વોલ સ્ટ્રીટ જર્નલ દ્વારા આપવામાં આવ્યા હતા. વ્હાઇટ હાઉસે આ અંગે ટિપ્પણી માટેની વિનંતીનો તાત્કાલિક જવાબ આપ્યો ન હતો.

સીબીએસ ન્યૂઝ અનુસાર, ટ્રમ્પ ઈરાનના ફોર્ડો ભૂગર્ભ યુરેનિયમ સંવર્ધન સુવિધા પર યુએસ હુમલાનું વિચારી રહ્યા હતા. ગયા સપ્તાહના અંતે ત્યાં ઈરાની પરમાણુ અને લશ્કરી સુવિધાઓ પર બોમ્બમારો શરૂ કર્યા પછી ઇઝરાયલે હજુ સુધી ફોર્ડો પર હુમલો કર્યો નથી. ટ્રમ્પે બુધવારે પત્રકારોને જણાવ્યું હતું કે, તેમણે ઈરાન પર હુમલો કરવા અંગે હજુ સુધી કોઈ અંતિમ નિર્ણય લીધો નથી.

તેમણે કહ્યું, મને સમય કરતાં એક સેકન્ડ વહેલો અંતિમ નિર્ણય લેવાનું ગમે છે, કારણ કે પરિસ્થિતિ બદલાય છે, ખાસ કરીને યુદ્ધ સાથે. તેમણે બુધવારે અગાઉ કહ્યું હતું કે, હું તે કરી શકું છું. હું તે ન પણ કરી શકું. મારો મતલબ, કોઈને ખબર નથી કે હું શું કરવા જઈ રહ્યો છું. તેમણે કહ્યું હતું કે, તેઓ ઇચ્છે છે કે ઈરાન તેના પરમાણુ કાર્યક્રમને સમાપ્ત કરવા માટે એક કરાર પર વાટાઘાટો કરે.

ઈરાને બુધવારે કહ્યું હતું કે, તે દબાણ હેઠળ વાટાઘાટો કરતું નથી. તેણે કહ્યું હતું કે, તે કોઈપણ ધમકીનો જવાબ ધમકીથી આપશે. એક વરિષ્ઠ યુએસ ગુપ્તચર અધિકારી અને આ બાબતની જાણકારી ધરાવતા પેન્ટાગોન અધિકારીના જણાવ્યા અનુસાર, જો યુએસ ઇઝરાયલી અભિયાનમાં જોડાય છે તો ઈરાને મધ્ય પૂર્વમાં યુએસ લક્ષ્યો પર હુમલો કરવા માટે મિસાઇલો અને સાધનો તૈયાર કર્યા છે.

યુએસ ટુડે અખબાર અનુસાર, પેન્ટાગોન પાસે ઈરાન પર સંભવિત હુમલાની તૈયારી માટે મધ્ય પૂર્વમાં ઓછામાં ઓછા 40,000 સૈનિકો છે. આ સૈનિકો હાલમાં બહેરીનથી સીરિયા અને વચ્ચેના સ્થળોએ તૈનાત છે. જો અમેરિકા ઈરાનના પરમાણુ સુવિધાઓ પરના તેના ચાલુ હુમલામાં ઈઝરાયલ સાથે જોડાય છે, તો આ સૈનિકો ઈરાની બેલિસ્ટિક મિસાઈલ, ડ્રોન અથવા આતંકવાદને લગતા હુમલાઓનો સામનો કરવામાં મદદ કરશે.

હિન્દુસ્થાન સમાચાર / મુકુન્દ

હિન્દુસ્થાન સમાચાર / ડો.હિતેશ એન.વ્યાસ