નવી દિલ્હી, 30 જૂન (હિ.સ.) કેન્દ્રીય નાણા અને કોર્પોરેટ બાબતોના મંત્રી નિર્મલા સીતારમણ, 30 જૂનથી 5 જુલાઈ સુધી સ્પેન, પોર્ટુગલ અને બ્રાઝિલના સત્તાવાર પ્રવાસે રહેશે. આ દરમિયાન, તેઓ નાણા મંત્રાલયના આર્થિક બાબતોના વિભાગના ભારતીય પ્રતિનિધિમંડળનું નેતૃત્વ કરશે.

નાણા મંત્રાલયના જણાવ્યા અનુસાર, કેન્દ્રીય નાણામંત્રી સ્પેનના સેવિલેની તેમની મુલાકાત દરમિયાન સંયુક્ત રાષ્ટ્ર દ્વારા આયોજિત વિકાસ માટે નાણાકીય ભંડોળ પર ચોથા આંતરરાષ્ટ્રીય પરિષદમાં ભાગ લેશે. આ સમિટનો વિષય 'એફએફડી-4 ના પરિણામોથી અમલીકરણ સુધી: ટકાઉ વિકાસ માટે ખાનગી મૂડીની સંભાવનાનો ઉપયોગ' રહેશે. આ દરમિયાન, સીતારમણ જર્મની, પેરુ અને ન્યુઝીલેન્ડના વરિષ્ઠ મંત્રીઓ અને યુરોપિયન ઇન્વેસ્ટમેન્ટ બેંક (ઈઆઈબી) ના પ્રમુખને મળશે.

મંત્રાલયના જણાવ્યા અનુસાર, પોર્ટુગલના લિસ્બનની તેમની મુલાકાત દરમિયાન, સીતારમણ પોર્ટુગલના નાણામંત્રી સાથે દ્વિપક્ષીય બેઠક કરશે. આ ઉપરાંત, તેઓ મુખ્ય રોકાણકારો અને ભારતીય પ્રવાસીઓ સાથે પણ વાતચીત કરશે. રિયો ડી જાનેરોમાં કેન્દ્રીય નાણાં પ્રધાન, ભારતના ગવર્નર તરીકે ન્યૂ ડેવલપમેન્ટ બેંક (એનડીબી) ની 10મી વાર્ષિક બેઠકને સંબોધિત કરશે અને બ્રિકસ નાણા પ્રધાનો અને સેન્ટ્રલ બેંક ગવર્નર્સ મીટિંગ (એફએમસીબીજી) માં પણ ભાગ લેશે.

એનડીબી બેઠકોના ભાગ રૂપે એનડીબી ફ્લેગશિપ ગવર્નર્સ સેમિનાર દરમિયાન નાણા પ્રધાન નિર્મલા સીતારમણ, 'ગ્લોબલ સાઉથ માટે એક પ્રીમિયર બહુપક્ષીય વિકાસ બેંકનું નિર્માણ' વિષય પર સંબોધન પણ આપશે. આ ઉપરાંત, એનડીબી બેઠકો દરમિયાન નાણા પ્રધાન બ્રાઝિલ, ચીન, ઇન્ડોનેશિયા અને રશિયાના તેમના સમકક્ષો સાથે દ્વિપક્ષીય બેઠકો કરશે.

હિન્દુસ્થાન સમાચાર / પ્રજેશ શંકર / સુનિત નિગમ

હિન્દુસ્થાન સમાચાર / ડો.હિતેશ એન.વ્યાસ