સુરત, 7 જુલાઈ (હિ.સ.)-ધરતી આબા જનજાતિય ઉત્કર્ષ અભિયાન અંતર્ગત આદિજાતિ વસ્તી ધરાવતા ગામોમાં પાયાની માળખાકીય તથા વ્યકિતલક્ષી યોજનાઓના લાભો ઘર આંગણે મળી રહે તે માટે સુરત જિલ્લાના મહુવા તાલુકાના પ્રાથમિક શાળા વાંક ખાતે ધારાસભ્ય મોહનભાઈ ઢોડિયાના અધ્યક્ષસ્થાને સેવા સેતુનો કેમ્પ યોજાયો હતો.

કેમ્પમાં ૩૩ જાતિના દાખલાઓ, ૧૬ વૃધ્ધ સહાય, પ્રધાનમંત્રી સન્માન યોજના હેઠળ ૩૪ તથા ખેતીવાડી હેઠળ ૩૪, આધારકાર્ડની ૮૮, હેલ્થ ચેકઅપ કેમ્પ હેઠળ ૧૦૦થી વધુ મળી ૬૦૦થી વધુ લાભાર્થીઓએ વિવિધ યોજનાઓના લાભો મેળવ્યા હતા.

આ અવસરે ધારાસભ્યએ જણાવ્યું હતું કે, આદિવાસીઓના સર્વાંગી વિકાસ માટે રાજય સરકાર કટિબધ્ધ છે. જે માટે વડાપ્રધાનએ ધરતી આબા જનજાતિય ઉત્કર્ષ અભિયાન ઉપાડયું છે. છેવાડાના માનવીઓને અનેકવિધ કલ્યાણકારી યોજનાઓના લાભો ઘર આંગણે મળી રહે તે માટે કેમ્પનું આયોજન કર્યું છે. ગામનો એક પણ લાભાર્થી લાભથી વંચિત રહી ન જાય તે માટે સૌને સાથે મળીને કાર્ય કરવાનો અનુરોધ કર્યો હતો. અગાઉ જમીનોમાં ૭/૧૨માં વારસદારોના વધુ નામોના કારણે ખેતીવાડી માટે વીજ કનેકશનો મળતા ન હતા પણ સરકારમાં રજુઆત કરીને સુધારો કરીને હવે ખેતી કરનારને વીજ કનેકશનો લાભો મળતા થયા છે. બાળકો ભણીગણીને વાંચન કરીને આગળ વધી શકે તે માટે તાલુકામાં લાયબ્રેરીઓ બનાવવામાં આવી રહી છે.

આ અવસરે તાલુકા પંચાયતના પ્રમુખ શીલાબેન પટેલ, મામલતદાર મહુવા તથા અન્ય પદાધિકારીઓ ઉપસ્થિત રહ્યા હતા.

---------------

હિન્દુસ્થાન સમાચાર / યજુવેન્દ્ર દુબે