નવી દિલ્હી, 25 ઓક્ટોબર (હિ.સ.) કેન્દ્રીય ગૃહ અને સહકારિતા મંત્રી અમિત શાહે કેન્દ્રીય તપાસ એજન્સીઓ તથા આસામ, મિઝોરમ અને મણિપુર પોલીસ દળના સંયુક્ત સફળ અભિયાનની પ્રશંસા કરી અને કડક સંદેશ આપ્યો કે આંતરરાષ્ટ્રીય સીમાઓનો ફાયદો ઉઠાવીને ભારતની યુવા પેઢીને નુકસાન પહોંચાડનારા કોઈપણ ગેંગને છોડવામાં આવશે નહીં.

અમિત શાહે આજે એક્સ પર લખ્યું, કેન્દ્રની મોદી સરકારે નશીલા પદાર્થો અને ગેરકાયદેસર માળખા વિરુદ્ધ પોતાની 'શૂન્ય સહિષ્ણુતા' નીતિ હેઠળ 'ઓપરેશન ટ્રાઇડેન્ટ' ચલાવીને આંતરરાષ્ટ્રીય નાર્કો-કાર્ટેલ (તસ્કર ગેંગ)ને જોરદાર ઝટકો આપ્યો છે. 23 ઓક્ટોબરના રોજ કેન્દ્રીય સુરક્ષા એજન્સીઓ અને રાજ્ય પોલીસ દળોના સંયુક્ત અભિયાનમાં આસામ, મિઝોરમ અને મણિપુરના 38 વિવિધ ઠેકાણાઓ પર એકસાથે ધડાધડ દરોડા પાડવામાં આવ્યા. આ કાર્યવાહીમાં તસ્કર ગેંગના સમગ્ર માળખાને ધ્વસ્ત કરી દેવામાં આવ્યું છે. 'ઓપરેશન ટ્રાઇડેન્ટ' દરમિયાન તપાસ એજન્સીઓના હાથમાં ઘણા ચોંકાવનારા પુરાવા લાગ્યા છે. લગભગ 100 કરોડ રૂપિયાના હવાલા લેણદેણની જાણકારી સામે આવી છે. માળખા સાથે જોડાયેલા 1,424 બેંક ખાતાઓને તાત્કાલિક અસરથી સ્થગિત કરી દેવામાં આવ્યા છે, જ્યારે 17.82 કરોડ રૂપિયાની કિંમતની સંપત્તિ જપ્ત કરવામાં આવી છે. દરોડા દરમિયાન 500 ડેટોનેટર અને 12 લાખ રૂપિયાની રોકડ જપ્ત કરવામાં આવી છે. આ મામલામાં સંડોવાયેલા 18 મુખ્ય આરોપીઓની ધરપકડ કરી લેવામાં આવી છે.

તપાસ અધિકારીઓ અનુસાર, આ આંતરરાષ્ટ્રીય નાર્કો-સિન્ડિકેટ 'ડેથ ટ્રાયેંગલ કોરિડોર'નો ઉપયોગ કરીને ભારત, મ્યાનમાર અને બાંગ્લાદેશની આંતરરાષ્ટ્રીય સીમાઓ દ્વારા નશીલા પદાર્થોની ગેરકાયદેસર તસ્કરીને અંજામ આપી રહ્યું હતું. આ સંકલિત કાર્યવાહી 31 ડિસેમ્બર 2029 સુધીમાં દેશમાંથી નશીલા પદાર્થોના સમગ્ર માળખાને જડમૂળથી ખતમ કરવાના ભારત સરકારના દ્રઢ સંકલ્પનો એક ભાગ છે. સરકારનો સ્પષ્ટ સંદેશ છે કે જ્યાં સુધી નાર્કો-કાર્ટેલનો સંપૂર્ણપણે ખાત્મો ન થઈ જાય, ત્યાં સુધી આવા કડક પ્રહારો ચાલુ રહેશે.

હિન્દુસ્થાન સમાચાર / શ્રદ્ધા દ્વિવેદી / મુકુંદ

હિન્દુસ્થાન સમાચાર / માધવી વ્યાસ