નવી દિલ્હી, 31 ઓક્ટોબર (હિ.સ.) વડાપ્રધાન નરેન્દ્ર મોદીએ શનિવારે ગુજરાતના કેવડિયા સ્થિત એકતા નગરમાં આયોજિત ‘ભારત પર્વ 2026’ દરમિયાન સેન્ટ્રલ કોટેજ ઇન્ડસ્ટ્રીઝ કોર્પોરેશન ઓફ ઇન્ડિયા લિમિટેડ (સીસીઆઈસી) પેવેલિયનની મુલાકાત લીધી.

કેન્દ્રીય કાપડ મંત્રાલય અનુસાર, વડાપ્રધાનની આ મુલાકાતથી સીસીઆઈસીને પોતાની સમૃદ્ધ વિરાસત, કારીગરો અને વણકરો સાથે પોતાના દીર્ઘકાલીન જોડાણ અને ભારતની પરંપરાગત હસ્તકલા તથા હસ્તશિલ્પ કલાને પ્રોત્સાહન આપવાના સતત પ્રયાસોને પ્રદર્શિત કરવાની સુવર્ણ તક મળી. આ પેવેલિયન કારીગરો અને વણકરોને બહેતર બજાર તથા આજીવિકાની સ્થાયી તકો પૂરી પાડીને તેમને સશક્ત બનાવવાની નિગમની યાત્રાને દર્શાવે છે. પોતાની આ પહેલો દ્વારા, સીસીઆઈસી વોકલ ફોર લોકલ અને લોકલને ગ્લોબલ બનાવવાની દ્રષ્ટિમાં સક્રિયપણે યોગદાન આપતા પરંપરાગત કારીગરીને મોટા સ્થાનિક અને આંતરરાષ્ટ્રીય બજારો સાથે જોડી રહ્યું છે.

આ પ્રસંગે, સીસીઆઈસીના મેનેજિંગ ડિરેક્ટર બિમલ ગોપાલાચારી, નિગમના અન્ય અધિકારીઓ, કારીગરો અને વણકરો પેવેલિયનમાં હાજર રહ્યા. પેવેલિયનમાં દેશના વિવિધ ભાગોના કારીગરોના શાનદાર હુનર અને કારીગરીને પ્રદર્શિત કરવામાં આવી છે. આમાં ખાસ કરીને ગુજરાતના કારીગરો દ્વારા એગેટ અને અર્ધ-કિંમતી પથ્થરો તથા બારીક એપ્લિક વર્ક (પેબંદનું કામ) થી તૈયાર કરવામાં આવેલી પરંપરાગત કલાકૃતિઓ આકર્ષણનું કેન્દ્ર બની રહી છે.

ભારતની આ ગૌરવશાળી કલા અને સંસ્કૃતિને દર્શાવતું આ પ્રદર્શન 15 નવેમ્બર સુધી એકતા નગરમાં દર્શકો અને પર્યટકો માટે ખુલ્લું રહેશે.

ઉલ્લેખનીય છે કે, સીસીઆઈસી ભારતીય હસ્તકલા અને હસ્તશિલ્પની સમૃદ્ધ અને વિવિધ વારસાની ઉજવણી કરે છે, જે દેશભરની શ્રેષ્ઠ કલાકારી, રચનાત્મકતા અને પરંપરાગત ઉત્પાદનોની એક વિશાળ શ્રેણીને એક મંચ પર લાવે છે. આ ભારતની જીવંત સાંસ્કૃતિક વિરાસત અને સ્વદેશી કલા સ્વરૂપોની ચિરસ્થાયી સુંદરતાનું પ્રતીક છે.

હિન્દુસ્થાન સમાચાર / શ્રદ્ધા દ્વિવેદી / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ