
નવી દિલ્હી, 17 નવેમ્બર (હિ.સ.). વિશ્વની દિગ્ગજ ઈ-કોમર્સ અને ટેકનોલોજી કંપની એમેઝોને ભારતના સ્વચ્છ ઊર્જા ક્ષેત્રમાં પોતાની હાજરીને વ્યાપક સ્તરે વિસ્તારવાની જાહેરાત કરી છે. કંપનીએ ભારતના પુનઃપ્રાપ્ય ઊર્જા ક્ષેત્રમાં 2030 સુધી સાત અબજ ડોલર (લગભગ 65,393 કરોડ રૂપિયા)નું રોકાણ કરવાની જાહેરાત કરી છે. ઈ-કોમર્સ કંપની અગાઉ જ 4 અબજ ડોલરના પ્રોજેક્ટ્સ માટે કરાર કરી ચૂકી છે. વૈશ્વિક ઈ-કોમર્સ અને ક્લાઉડ ટેકનોલોજી કંપનીએ, મંગળવારે કુલ 934 મેગાવોટ ક્ષમતાના પવન અને સૌર ઊર્જા સાથે જોડાયેલા ચાર નવા પ્રોજેક્ટ્સની પણ જાહેરાત કરી.
કંપનીએ જણાવ્યું કે, આ રોકાણથી એમેઝોન ભારતમાં કાર્બન-મુક્ત ઊર્જાની ખરીદી કરનારી અગ્રણી કંપનીઓમાં પણ સામેલ થઈ જશે. એમેઝોન મુજબ આ ચાર પ્રોજેક્ટ્સમાં કર્ણાટકમાં 234 મેગાવોટનો પવન ઊર્જા પ્લાન્ટ સામેલ છે. આ એશિયામાં અત્યાર સુધીનો એમેઝોનનો સૌથી મોટો પવન ઊર્જા પ્રોજેક્ટ છે. આ ઉપરાંત આ જ રાજ્યમાં 200 મેગાવોટનો સૌર અને પવન ઊર્જાનો મિશ્ર પ્રોજેક્ટ, મધ્ય પ્રદેશમાં 300 મેગાવોટનો સૌર ઊર્જા પ્રોજેક્ટ અને રાજસ્થાનમાં 200 મેગાવોટનો સૌર ઊર્જા પ્રોજેક્ટ સામેલ છે.
કંપનીના જણાવ્યા અનુસાર, આ પ્રોજેક્ટ્સ ભારતમાં એમેઝોનના અગાઉના કરાર હેઠળ સામેલ ચાર અબજ ડોલરના પુનઃપ્રાપ્ય ઊર્જા પ્રોજેક્ટ્સનો ભાગ છે. કંપનીએ કહ્યું કે આ પ્રોજેક્ટ્સ કાર્યરત થયા પછી ભારતમાં એમેઝોનના પુનઃપ્રાપ્ય ઊર્જા પોર્ટફોલિયોની કુલ ક્ષમતા બે ગીગાવોટથી વધુ થઈ જશે. આનાથી એટલી વીજળી ઉત્પન્ન થઈ શકશે, જે 35 લાખથી વધુ ભારતીય પરિવારોની વાર્ષિક જરૂરિયાતો બરાબર હશે.
કેન્દ્રીય નવીન અને પુનઃપ્રાપ્ય ઊર્જા મંત્રી પ્રહલાદ જોશીએ પોતાની પ્રતિક્રિયા આપતા કહ્યું કે, અમે ભારતમાં પુનઃપ્રાપ્ય ઊર્જાના ક્ષેત્રમાં એમેઝોનના સતત રોકાણને આવકારીએ છીએ. આ પ્રકારના રોકાણ ભારતના સ્વચ્છ ઊર્જા લક્ષ્યોને આગળ વધારવા, ઊર્જા સુરક્ષાને મજબૂત કરવા અને ટકાઉ આર્થિક વિકાસમાં મદદ કરવામાં મહત્વની ભૂમિકા ભજવે છે. તેમણે કહ્યું કે આ રોકાણ ભારતના પુનઃપ્રાપ્ય ઊર્જા ક્ષેત્રમાં વૈશ્વિક કંપનીઓના વધતા વિશ્વાસને પણ દર્શાવે છે. સાથે જ, આ લાંબા ગાળાના રોકાણને આકર્ષવા, આર્થિક તકો ઊભી કરવા અને દેશમાં ઊર્જા પરિવર્તનની પ્રક્રિયાને ઝડપી બનાવવાની ક્ષમતા પણ દર્શાવે છે. અમે ભારતના પુનઃપ્રાપ્ય ઊર્જા લક્ષ્યોને આગળ વધારવા માટે ઉદ્યોગ જગત સાથે મળીને કામ કરવાનું ચાલુ રાખીશું.
હિન્દુસ્થાન સમાચાર / પ્રજેશ શંકર / સુનીત નિગમ
હિન્દુસ્થાન સમાચાર / માધવી વ્યાસ