બાંગ્લાદેશના વેપારીઓ ફફડાટમાં, ખંડણી ન મળતા ગુનેગારો કરી રહ્યા છે લોહીયાળ ખેલ
ઢાકા (બાંગ્લાદેશ), નવી દિલ્હી, 17 નવેમ્બર (હિ.સ.). બાંગ્લાદેશના વેપારીઓ ફફડાટના ઓછાયા હેઠળ જીવવા મજબૂર છે. ગુનેગારો ખંડણી ન મળતા લોહીયાળ ખેલ કરી રહ્યા છે. રવિવારે પણ રાજધાની ઢાકાના કેટલાક વધુ વ્યાપારી પ્રતિષ્ઠાનોને નિશાન બનાવવામાં આવ્યા હતા. મોહમ્મ
રાજધાનીમાં નેશનલ ઇન્સ્ટિટ્યૂટ ઓફ કાર્ડિયોવેસ્ક્યુલર ડિસીઝની સામેની તસ્વીર


ઢાકા (બાંગ્લાદેશ), નવી દિલ્હી, 17 નવેમ્બર (હિ.સ.). બાંગ્લાદેશના વેપારીઓ ફફડાટના ઓછાયા હેઠળ જીવવા મજબૂર છે. ગુનેગારો ખંડણી ન મળતા લોહીયાળ ખેલ કરી રહ્યા છે. રવિવારે પણ રાજધાની ઢાકાના કેટલાક વધુ વ્યાપારી પ્રતિષ્ઠાનોને નિશાન બનાવવામાં આવ્યા હતા. મોહમ્મદપુર અને હજારીબાગમાં 'એજેઆર કુરિયર સર્વિસ'ના વાહનો અને એક ગોદામ પર હુમલો કરવામાં આવ્યો હતો. રામપુરામાં એક ઇન્ટરનેટ સર્વિસ પ્રોવાઇડરની કચેરીમાં બે લોકોને ગોળી મારી દેવામાં આવી હતી. પોલીસ અને અન્ય કાયદો અમલી બનાવતી સંસ્થાઓએ રાજધાનીમાં 545 ખંડણીખોરો અને ગુનેગારોની યાદીના આધારે ધરપકડ તેજ કરી દીધી છે. તેમ છતાં સવાલો ઉઠી રહ્યા છે કે, ધરપકડો છતાં ખંડણીખોરોનું હથિયારોના જોરે વર્ચસ્વ કેમ ખતમ નથી થઈ રહ્યું?

ઢાકા ટ્રિબ્યુનના અહેવાલ મુજબ, શુક્રવારે રાત્રે લગભગ 11 વાગ્યાનો સમય હશે. રાજધાનીમાં નેશનલ ઇન્સ્ટિટ્યૂટ ઓફ કાર્ડિયોવેસ્ક્યુલર ડિસીઝની સામે અને શ્યામોલી તરફ જતા મુખ્ય માર્ગના કિનારે આવેલી અનુરાગ ફાર્મસીમાં કર્મચારી મોઈનુદ્દીન ગ્રાહકોને સેવા આપી રહ્યા હતા. અચાનક, ગોળીઓના અવાજથી આખો વિસ્તાર ધ્રૂજી ઉઠ્યો. ત્યાં હાજર લોકો કંઈ સમજે તે પહેલા જ ગોળીઓનો બીજો રાઉન્ડ ચાલ્યો. ગોળીઓ ફાર્મસીના કાચ તોડીને મોઈનુદ્દીનના માથા પરથી પસાર થઈ ગઈ. તેઓ આબાદ બચી ગયા.

આરોપ છે કે શૂટર બાદલ અને શૂટર પપ્પુ નામના બે ગુનેગારોએ ફાર્મસીના માલિક પાસે 50 લાખ ટકાની ખંડણી માંગી હતી. પૈસા ન મળતા તેમણે પહેલા બે દેશી બોમ્બ ફેંક્યા. ત્યારબાદ તેમણે સીધું જ ગોળીબાર કર્યો. માત્ર અનુરાગ ફાર્મસી જ નહીં, પરંતુ રાજધાનીના અનેક ભાગોમાં ખંડણીની માંગને લઈને વ્યાપારી પ્રતિષ્ઠાનો પર ગોળીબાર, હુમલા, તોડફોડ અને આગચંપીની ઘટનાઓ બની રહી છે. રવિવારે મોહમ્મદપુર અને હજારીબાગમાં એજેઆર કુરિયર સર્વિસના વાહનો અને એક ગોદામ પર હુમલો કરવામાં આવ્યો હતો. તે જ સાંજે રામપુરામાં એક ઇન્ટરનેટ સર્વિસ પ્રોવાઇડરની કચેરીમાં બે લોકોને ગોળી મારી દેવામાં આવી હતી.

એક પછી એક બની રહેલી આ ઘટનાઓથી વેપારીઓમાં ચિંતા વધી રહી છે. આરોપ છે કે ગુનેગારો પહેલા ફોન પર વેપારીઓને ધમકી આપીને તેમની પાસે ખંડણી માંગે છે. જો તેમની માંગણીઓ પૂરી ન થાય, તો તેઓ લોહીયાળ ખેલ કરીને ફફડાટ ફેલાવે છે. આવી પરિસ્થિતિમાં, કાયદો અમલી બનાવતી સંસ્થાઓએ રાજધાનીમાં 545 ખંડણી વસૂલનારાઓ અને ગુનેગારોની એક યાદીના આધારે પોતાની કાર્યવાહી તેજ કરી દીધી છે.

અનુરાગ ફાર્મસીની એક રેસ્ટોરન્ટ અને એક સુપરશોપને પણ નિશાન બનાવવામાં આવી છે. આ પ્રતિષ્ઠાનોના માલિક સૈયદ હસન નૂર ઇસ્લામ છે. તેઓ પૂર્વ કાઉન્સિલર અને આવામી લીગના નેતા તરીકે ઓળખાય છે. જાણવા મળ્યું છે કે 5 ઓગસ્ટ, 2024 ના રોજ થયેલા રાજકીય પરિવર્તન બાદથી તેઓ દેશની બહાર છે. સૂત્રોના જણાવ્યા અનુસાર મોહમ્મદપુર વિસ્તારના બે ગુનેગારો બાદલ અને પપ્પુએ તાજેતરમાં તેમની પાસે 50 લાખ ટકાની ખંડણી માંગી હતી. પૈસા ન મળતા તેમણે બોમ્બ અને ગોળી ચલાવીને ફફડાટ ફેલાવ્યો હતો. પોલીસે જણાવ્યું કે ફાર્મસીમાં થયેલા ગોળીબારના સંબંધમાં બે લોકોની ધરપકડ કરવામાં આવી ચૂકી છે. હુમલામાં સામેલ અન્ય લોકોને ધરપકડ કરવાના પ્રયાસો કરવામાં આવી રહ્યા છે.

રાજધાનીના રામપુરા અને હાતિરઝીલ વિસ્તારોમાં ખંડણી માંગવાના આરોપોને લઈને ગુજા બાદશાહ નામનો એક ગુનેગાર ચર્ચામાં છે. તેને માર્યા ગયેલા ગુનેગાર કૈલ્લા પલાશનો નજીકનો સાથી માનવામાં આવે છે. સ્થાનિક સૂત્રોના જણાવ્યા અનુસાર આ વર્ષે જૂનમાં ગોળીબારમાં કૈલ્લા પલાશના માર્યા ગયા બાદથી વિસ્તારમાં ગુજા બાદશાહનો પ્રભાવ વધી ગયો છે. આ પહેલા, એપ્રિલમાં તેની પૂર્વ પોલીસ એએસપી ફઝલુલ હકની હત્યાના કેસમાં ધરપકડ કરવામાં આવી હતી. બાદમાં તેને જામીન પર મુક્ત કરવામાં આવ્યો હતો. આરોપ છે કે તેના સાગરીતો રામપુરા અને હાતિરઝીલમાં કેબલ ટીવી અને ઇન્ટરનેટ કનેક્શન, હાઉસિંગ, ગારમેન્ટ ફેક્ટરીઓ અને હોટલો સહિત અનેક વ્યાપારી પ્રતિષ્ઠાનો પાસેથી ખંડણી વસૂલવામાં સક્રિય છે.

રવિવાર સાંજે ચાર-પાંચ યુવકો રામપુરાના વાપ્ડા રોડ સ્થિત સ્પીડ ટચ નેટવર્ક એન્ડ ટેકનોલોજીની કચેરીમાં ઘૂસ્યા અને ગોળીબાર કર્યો. જેમાં બે લોકો ઘાયલ થયા. જાણવા મળ્યું છે કે હુમલાખોરોમાંથી બે જણાએ પોતાના ચહેરા પર માસ્ક અને માથા પર ટોપી પહેરી હતી. કંપનીના નેટવર્ક ઓપરેશન્સ ઇન્ચાર્જ બંદોન કુમાર સાહા હુમલામાં ઘાયલ છે. તેમણે જણાવ્યું, “15-20 દિવસ પહેલા, પોતાને ગુજા બાદશાહ અને જોની ગણાવતા કેટલાક લોકોએ મોબાઈલ ફોન પર 10 લાખ ટકાની ખંડણી માંગી હતી. ધમકી પણ આપી હતી કે જો પૈસા આપવામાં નહીં આવે, તો તેઓ આ વિસ્તારમાં પોતાનો વ્યવસાય નહીં કરી શકે. ત્યારબાદ જ આ ગોળીબાર થયો. અમે ખૂબ જ ડરેલા છીએ.”

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ


 rajesh pande