નવી દિલ્હી, 23 માર્ચ (હિ.સ.): આરોગ્ય અને પરિવાર કલ્યાણ મંત્રાલય, વિશ્વ ટીબી રોગ દિવસ પર રાષ્ટ્રીય સ્તરના કાર્યક્રમનું આયોજન કરશે. આ કાર્યક્રમ ઉત્તર પ્રદેશના ગ્રેટર નોઈડામાં ગૌતમ બુદ્ધ યુનિવર્સિટી ખાતે યોજાશે. આ કાર્યક્રમની અધ્યક્ષતા, કેન્દ્રીય આરોગ્ય અને પરિવાર કલ્યાણ મંત્રી જે.પી. નડ્ડા કરશે.

આ કાર્યક્રમનો ઉદ્દેશ્ય, પ્રધાનમંત્રી નરેન્દ્ર મોદીના ટીબી મુક્ત ભારતના વિઝનને અનુરૂપ, ટીબી નાબૂદી તરફ ભારતની પ્રગતિ દર્શાવવાનો છે. તે રાષ્ટ્રીય ટીબી નાબૂદી કાર્યક્રમ (એનટીઈપી) હેઠળ પ્રાપ્ત થયેલી મુખ્ય સિદ્ધિઓ, નવીન વ્યૂહરચનાઓ અને મજબૂત સમુદાય ભાગીદારી દર્શાવવા માટે એક પ્લેટફોર્મ તરીકે સેવા આપશે.

સોમવારે કેન્દ્રીય આરોગ્ય મંત્રાલયે એક પ્રકાશન જારી કરીને જણાવ્યું હતું કે, આ પ્રસંગે મંત્રી જે.પી. નડ્ડા ટીબી મુક્ત ભારત અભિયાન હેઠળ 100 દિવસના સઘન ટીબી નાબૂદી કાર્યક્રમને લીલી ઝંડી આપશે અને ટીબી મુક્ત ભારત એપ્લિકેશન અને ટીબી મુક્ત શહેરી વોર્ડ પહેલનો પ્રારંભ કરશે. આ પહેલનો ઉદ્દેશ્ય ટીબીના કેસોને ઝડપથી ઓળખવા, સારવારનું પાલન પ્રોત્સાહન આપવા અને ખાસ કરીને ઉચ્ચ બોજવાળા વિસ્તારોમાં અંતિમ તબક્કાની ટીબી સેવાઓની ડિલિવરીને મજબૂત બનાવવાનો છે.

આ રાષ્ટ્રીય કાર્યક્રમમાં આરોગ્ય અને પરિવાર કલ્યાણ રાજ્યમંત્રી અનુપ્રિયા પટેલ, ઉત્તર પ્રદેશના નાયબ મુખ્યમંત્રી બ્રજેશ પાઠક, આરોગ્ય અને પરિવાર કલ્યાણ મંત્રાલયના સચિવ, કેન્દ્ર અને રાજ્ય સરકારના વરિષ્ઠ અધિકારીઓ, જાહેર આરોગ્ય નિષ્ણાતો, વિકાસ ભાગીદારો, આરોગ્યસંભાળ વ્યાવસાયિકો અને સમુદાયના પ્રતિનિધિઓ હાજરી આપશે.

હિન્દુસ્થાન સમાચાર / વિજયાલક્ષ્મી / પ્રભાત મિશ્રા

હિન્દુસ્થાન સમાચાર / માધવી વ્યાસ