ભુવનેશ્વર, નવી દિલ્હી, 28 માર્ચ (હિ.સ.). ઓડિશાના નયાગઢ જિલ્લામાં શુક્રવારે મોડી રાત્રે થયેલા એક દુ:ખદ માર્ગ અકસ્માતમાં ઓછામાં ઓછા પાંચ લોકોના મોત અને 40 થી વધુ ઘાયલ થયા છે. આ અકસ્માત દશપલ્લા પોલીસ સ્ટેશન વિસ્તાર હેઠળના ટાકેરા નજીક હનુમાન ઘાટીમાં થયો હતો. મૃતકોમાં બસ ડ્રાઈવર અને ચાર મહિલાઓનો સમાવેશ થાય છે.

પોલીસના જણાવ્યા અનુસાર, ખાનગી પ્રવાસી બસ બ્રહ્મપુરથી હરિશંકર જઈ રહી હતી, જેમાં લગભગ 60 મુસાફરો હતા. હનુમાન ઘાટી નજીક એક તીવ્ર વળાંક પર ડ્રાઈવરે કાબુ ગુમાવ્યો, જેના કારણે બસ એક મોટા ખડક સાથે અથડાઈ અને પલટી ગઈ.

અકસ્માત એટલો ગંભીર હતો કે, ઘણા મુસાફરો બસમાંથી બહાર ફેંકાઈ ગયા, જ્યારે 10 થી વધુ લોકો નીચે ફસાઈ ગયા. માહિતી મળતાં, દશપલ્લા અને બનીગોછા પોલીસ સ્ટેશન, ફાયર ફાઇટર અને એમ્બ્યુલન્સ ઘટનાસ્થળે પહોંચી. બચાવકર્તાઓએ ગેસ કટરનો ઉપયોગ કરીને ફસાયેલા મુસાફરોને બચાવ્યા.

ઘાયલોને પહેલા દશપલ્લા કોમ્યુનિટી હેલ્થ સેન્ટર લઈ જવામાં આવ્યા હતા, જ્યાંથી આશરે 15 ગંભીર ઘાયલોને જિલ્લા મુખ્યાલયની હોસ્પિટલમાં રિફર કરવામાં આવ્યા હતા.

પ્રત્યક્ષદર્શીઓના જણાવ્યા અનુસાર, અકસ્માતનું કારણ ઝડપી ગતિ હોઈ શકે છે. ઘાયલ મુસાફર સુભ્રાંશુ નાયકે જણાવ્યું હતું કે, ડ્રાઈવરે વળાંક પર ખૂબ જ ઝડપથી બસ ચલાવી હતી, જેના કારણે બસ પલટી ગઈ હતી. તૂટેલી બારીઓમાંથી ઘણા મુસાફરોને બચાવી લેવામાં આવ્યા હતા.

હિન્દુસ્થાન સમાચાર / સુનિતા મહંતો / સત્યવાન

હિન્દુસ્થાન સમાચાર / ડો.હિતેશ એન.વ્યાસ