ભાવનગર, 29 માર્ચ (હિ.સ.) : કમિશનર દ્વારા શહેરના મહત્વપૂર્ણ વિસ્તારોમાં ડ્રેનેજ વ્યવસ્થાને વધુ સુદ્રઢ બનાવવા માટે હાથ ધરાનાર કામ અંગે સ્થળ મુલાકાત લેવામાં આવી હતી. સમરસ હોસ્ટેલથી શરૂ કરીને આઈ.ટી.આઈ. કેમ્પસ, એન્જિનિયરિંગ કોલેજના ખૂણા, ડાયાભાઈ ચોક, વિજયરાજ નગર સર્કલ તેમજ રાજકોટ રોડ સુધીની ડ્રેનેજ લાઇન શરૂ કરવાના પ્રસ્તાવિત કામનું સ્થળ પર જઈ નિરીક્ષણ કરવામાં આવ્યું હતું.આ સાઇટ વિઝિટ દરમિયાન કમિશનરએ સંબંધિત વિભાગના અધિકારીઓ સાથે વિસ્તૃત ચર્ચા કરી હતી. ખાસ કરીને વરસાદી પાણીના યોગ્ય નિકાલ, ગટર લાઇનની ક્ષમતા, અને ભવિષ્યમાં વધતા વસ્તીદબાણને ધ્યાનમાં રાખીને આયોજન કરવામાં આવે તેવી સૂચનાઓ આપવામાં આવી હતી. સાથે સાથે કામ ઝડપથી અને ગુણવત્તાસભર રીતે પૂર્ણ થાય તે માટે કોન્ટ્રાક્ટરોને પણ કડક માર્ગદર્શન આપવામાં આવ્યું હતું.

શહેરમાં પાણી ભરાવાની સમસ્યાને દૂર કરવા માટે આ ડ્રેનેજ લાઇન ખૂબ જ મહત્વપૂર્ણ સાબિત થશે. ખાસ કરીને વરસાદી સિઝનમાં નાગરિકોને રાહત મળે તે માટે આ કામગીરીને પ્રાથમિકતા આપવામાં આવી રહી છે. તેમણે અધિકારીઓને કામ દરમિયાન ટ્રાફિક વ્યવસ્થા જળવાઈ રહે અને સામાન્ય જનતાને ઓછામાં ઓછી અસુવિધા થાય તે માટે જરૂરી પગલાં લેવા પણ સૂચના આપી હતી.આ પ્રસંગે સંબંધિત વિભાગના ઈજનેરો, નગરપાલિકાના અધિકારીઓ અને અન્ય સ્ટાફ હાજર રહ્યા હતા. સમગ્ર કામગીરી સમયસર પૂર્ણ થાય અને શહેરના નાગરિકોને સુવિધા મળી રહે તે માટે પ્રશાસન પ્રતિબદ્ધ હોવાનું કમિશનરએ વિશ્વાસ વ્યક્ત કર્યો હતો.

આ રીતે કરવામાં આવેલી સાઇટ વિઝિટ શહેરના વિકાસ અને સુવિધાઓમાં વધારો લાવવા માટે મહત્વપૂર્ણ પગલું સાબિત થશે.

---------------

હિન્દુસ્થાન સમાચાર / GONDALIYA DISHANT