- પીરાણા ડમ્પિંગ સાઈટ પાંચ વર્ષમાં દૂર કરવાનું વચન

- બજેટમાં જે જાહેરાત કરવામાં આવી હતી. જે જાહેરાત ફરીથી ભાજપના ચૂંટણી સંકલ્પ પત્રમાં

અમદાવાદ,16 એપ્રિલ (હિ.સ.) ગુજરાતમાં આગામી 26 એપ્રિલના રોજ સ્થાનિક સ્વરાજ્યની ચૂંટણીઓ યોજાય રહી છે. ભાજપ દ્વારા આજે અમદાવાદ મહાનગરપાલિકા માટે ચૂંટણી સંકલ્પ પત્ર જાહેર કરવામાં આવ્યું હતું. ભાજપના પ્રભારી મંત્રી ઋષિકેશ પટેલ, શહેર પ્રમુખ પ્રેરક શાહ અને મહાનગરપાલિકાના પૂર્વ પદાધિકારીઓએ, આગામી પાંચ વર્ષમાં ભાજપ શું કરશે તેનું વિઝન ડોક્યુમેન્ટ જાહેર કર્યું હતું.

અમદાવાદ મહાનગરપાલિકાનું વર્ષ 2026-27માં ભાજપના પદાધિકારીઓ દ્વારા બજેટમાં જે જાહેરાત કરવામાં આવી હતી. જે જાહેરાત ફરીથી ભાજપના ચૂંટણી સંકલ્પ પત્રમાં કરવામાં આવી હતી. ભાજપના નેતાઓને કોઈ ખાસ મોટી જાહેરાત ભાજપ દ્વારા સંકલ્પ પત્રમાં કરવામાં આવી નથી.

ભાજપના પ્રભારી મંત્રી ઋષિકેશ પટેલે જણાવ્યું હતું કે, અમે આવતાં પાંચ વર્ષમાં અમદાવાદ માટે શું કરીશું એના માટે વિઝન ડોક્યુમેન્ટ તૈયાર કર્યું છે. રિવરફ્રન્ટને ડફનાળાથી, ઈન્દિરા બ્રિજ અને ગિફ્ટ સીટી સુધી આગળ વધારવાનું આયોજન છે.

2026-27માં 15 અને 2027-28માં 13 ફાયર સ્ટેશન બનાવવાનું આયોજન છે. શહેરમાં એઆઇ આધારિત ટ્રાફિક સિગ્નલ વિકસાવવાની યોજના મુકાઈ છે. 100 લેફ્ટ ટર્ન ખુલ્લા મૂકવામાં આવશે.

અમદાવાદ શહેરને સ્લમ મુક્ત કરવામાં આવશે. 50000 મકાનોનો લક્ષ્યાંક મૂકવામાં આવશે. 2030 સુધીમાં 3000 ઇલેક્ટ્રિક બસ દોડાવવામાં આવશે. ફાટકમુક્ત અમદાવાદ બનાવવામાં આવશે. 17 નવા બ્રિજ બનાવવાનું આયોજન. સુભાષબ્રિજને 8 માર્ગીય બનાવવામાં આવશે.

દરેક વોર્ડમાં એક મેદાન અને બ્રિજ નીચે સ્પોર્ટ્સ એક્ટિવિટી ઝોન બનાવશે.

વધતા જતા પ્રદૂષણને અટકાવવા માટે થઈને શહેરમાં ગ્રીન કવર વધારવામાં આવશે. શહેરમાંથી પસાર થતી રેલવે લાઇનની બંને તરફ ગ્રીન કવર વધારવામાં આવશે. અમદાવાદનું ગ્રીન કવર 12.50 ટકાથી વધારીને 18 ટકા કરવાનું લક્ષ્યાંક છે. આગામી પાંચ વર્ષમાં અમદાવાદમાં સૌથી મોટા ડમ્પિંગ સાઈટ એવા પીરાણા ડમ્પિંગ સાઈટને દૂર કરવામાં આવશે એવો દાવો પણ કરવામાં આવ્યો છે.

હિન્દુસ્થાન સમાચાર / હર્ષ શાહ