નવી દિલ્હી, 15 મે (હિ.સ). પશ્ચિમ એશિયામાં ચાલી રહેલા સંકટ વચ્ચે જાહેર ક્ષેત્રની ઓઈલ એન્ડ ગેસ માર્કેટિંગ કંપનીઓએ પેટ્રોલ અને ડીઝલના ભાવમાં 3-3 રૂપિયા પ્રતિ લિટરનો વધારો કર્યો છે. સીએનજીના ભાવમાં પણ બે રૂપિયા પ્રતિ કિલોગ્રામનો વધારો કરવામાં આવ્યો છે. નવા દર આજથી અમલમાં આવ્યા છે. લગભગ ચાર વર્ષ પછી પેટ્રોલ-ડીઝલના ભાવમાં વધારો કરવામાં આવ્યો છે.

દિલ્હીમાં હવે પેટ્રોલની કિંમત 94.77 રૂપિયાથી વધીને 97.77 રૂપિયા પ્રતિ લિટર અને ડીઝલની કિંમત 87.67 રૂપિયાથી વધીને 90.67 રૂપિયા પ્રતિ લિટર થઈ ગઈ છે. કોલકતા, મુંબઈ અને ચેન્નાઈ જેવા મહાનગરોમાં પણ ઈંધણના ભાવમાં ઉછાળો આવ્યો છે. કોલકતામાં પેટ્રોલ 3.29 રૂપિયા વધીને હવે 108.74 રૂપિયા પ્રતિ લિટર પર પહોંચી ગયું છે. દેશની આર્થિક રાજધાની મુંબઈમાં પેટ્રોલ 3.14 રૂપિયા વધીને 106.68 રૂપિયા પ્રતિ લિટરના ભાવે મળી રહ્યું છે. દક્ષિણ ભારતના મોટા શહેર ચેન્નાઈમાં પેટ્રોલના ભાવમાં 2.83 રૂપિયાનો ઉછાળો આવ્યો છે અને નવી કિંમત 103.67 રૂપિયા પ્રતિ લિટર થઈ ગઈ છે.

કોલકતામાં ડીઝલના ભાવમાં 3.11 રૂપિયાનો વધારો થયો છે. ત્યાં એક લિટર ડીઝલ 95.13 રૂપિયામાં મળી રહ્યું છે. મુંબઈમાં પણ ડીઝલ 3.11 રૂપિયા મોંઘું થઈને 93.14 રૂપિયા પ્રતિ લિટર પર પહોંચી ગયું છે. ચેન્નાઈમાં ડીઝલના ભાવમાં 2.86 રૂપિયાનો વધારો કરવામાં આવ્યો છે. ત્યાં ડીઝલ હવે 95.25 રૂપિયા પ્રતિ લિટર મળી રહ્યું છે.

દિલ્હીના પ્રીત વિહાર સ્થિત ભારત પેટ્રોલિયમના પંપ પર એક ગ્રાહકે આ અંગે કહ્યું, અમે આમાં શું કરી શકીએ? આ બધી વસ્તુઓ બીજા દેશોમાંથી આવે છે. તેનું ઉત્પાદન અહીં નથી થતું. તેથી સરકાર જે પણ પગલાં લઈ રહી છે, તે દેશના હિતમાં છે. પેટ્રોલ-ડીઝલના ભાવ વધારાને લઈને વિપક્ષ આક્રમક છે. કોંગ્રેસે એક્સ પર લખ્યું, મોંઘવારી મેને જનતા પર હંટર ચલાવ્યું. સપા પ્રમુખ અખિલેશ યાદવે કટાક્ષ કરતા કહ્યું કે, આગળ વધવું હોય તો સાયકલ જ વિકલ્પ છે.

નિષ્ણાતોનું કહેવું છે કે, પેટ્રોલ-ડીઝલ અને સીએનજીના ભાવમાં આ વધારો ક્રૂડ ઓઈલના વધતા વૈશ્વિક ભાવને કારણે ઈંધણ વેચતી કંપનીઓને થઈ રહેલા સતત નુકસાન વચ્ચે કરવામાં આવ્યો છે. આંતરરાષ્ટ્રીય બજારમાં ક્રૂડ ઓઈલની કિંમત લગભગ 106 ડોલર પ્રતિ બેરલ છે.

હિન્દુસ્થાન સમાચાર / પ્રજેશ શંકર / મુકુંદ

હિન્દુસ્થાન સમાચાર / માધવી વ્યાસ