વોશિંગ્ટન, નવી દિલ્હી, 19 મે (હિ.સ.)। યુનાઇટેડ સ્ટેટ્સ ઓફ અમેરિકાના કેલિફોર્નિયા રાજ્યના સેન ડિએગો સ્થિત ઇસ્લામિક સેન્ટર પરિસરમાં મસ્જિદ પાસે સોમવારે થયેલા ગોળીબારમાં ત્રણ લોકોનાં મોત થયાં છે. એવો દાવો કરવામાં આવ્યો છે કે આ ઘટનાને બે સગીર બંદૂકધારીઓએ અંજામ આપ્યો હતો. ત્યારબાદ નજીકની ગલીમાં જઈને પોતાની જાતને ગોળી મારી આત્મહત્યા કરી લીધી. માહિતી મળતા જ ઇસ્લામિક સેન્ટર પહોંચેલી પોલીસે થોડા સમય માટે વિસ્તારમાં રહેતા લોકોને ઘરોની અંદર રહેવાની સલાહ આપી હતી. સેન ડિએગોના પોલીસ વડા સ્કોટ વાહલે આ ઘટનાની પુષ્ટિ કરી છે.

સીબીએસ ન્યૂઝના અહેવાલ મુજબ, વરિષ્ઠ પોલીસ અધિકારી સ્કોટ વાહલે જણાવ્યું કે, બે શંકાસ્પદ હુમલાખોરો નજીકમાં જ એક ગાડીની અંદર મૃત હાલતમાં મળી આવ્યા છે. શંકાસ્પદોની ઉંમર 17 અને 18 વર્ષ છે. વાહલે જણાવ્યું કે આ ઘટનાની તપાસ 'હેટ ક્રાઇમ' (નફરતથી જોડાયેલ ગુનો) તરીકે કરવામાં આવી રહી છે. સેન ડિએગોના ઇસ્લામિક સેન્ટરના ઈમામ તાહા હસને લોકોને નફરતનો ત્યાગ કરી સદભાવના સાથે રહેવાની અપીલ કરી છે. આ પરિસરમાં એક મદરેસા (શાળા) પણ છે. ગોળીબાર સમયે બાળકો મદરેસામાં અભ્યાસ કરી રહ્યા હતા. ગોળીઓના અવાજથી આખા પ્રાંગણમાં અફરાતફરી મચી ગઈ હતી.

સેન ડિએગોના પોલીસ વડા સ્કોટ વાહલે જણાવ્યું કે, હુમલાની પ્રથમ માહિતી સવારે લગભગ 11:43 વાગ્યે મળી હતી. આ ઘટનાના બે કલાક પહેલા એક મહિલાએ તેનો પુત્ર ગુમ હોવાની માહિતી આપી હતી. તેણે જણાવ્યું હતું કે તેની પાસે અનેક હથિયારો છે અને તેની ગાડી પણ ગાયબ છે. તેમણે કહ્યું કે ઇસ્લામિક સેન્ટરને કોઈ ધમકી મળી ન હતી. ઘટનાની દરેક પાસાથી તપાસ કરવામાં આવી રહી છે. ઇસ્લામિક સેન્ટરના ઈમામ તાહાએ પત્રકાર પરિષદમાં જણાવ્યું કે આ ઘટનાથી મુસ્લિમ સમુદાય શોકમાં છે. તેમણે કહ્યું, આ કંઈક એવું છે જેની અમે ક્યારેય અપેક્ષા રાખી ન હતી.

આ હુમલામાં ઇસ્લામિક સેન્ટરનો એક ગાર્ડ પણ માર્યો ગયો છે. પોલીસે તેની ઓળખ જાહેર કરવાનો ઇનકાર કર્યો છે. સેન ડિએગોના મેયર ટોડ ગ્લોરિયાએ જણાવ્યું કે પ્રાર્થના સ્થળોની સુરક્ષા માટે હવે પોલીસ તૈનાત કરવામાં આવશે. કેલિફોર્નિયાના ગવર્નર ગેવિન ન્યૂસમે કહ્યું કે તેઓ સેન ડિએગોના ઇસ્લામિક સેન્ટરની ઘટનાથી સ્તબ્ધ છે. કેલિફોર્નિયામાં નફરત માટે કોઈ સ્થાન નથી. ધાર્મિક સમુદાયો વિરુદ્ધ હિંસા સહન કરવામાં આવશે નહીં.

ઉલ્લેખનીય છે કે, અમેરિકામાં પ્રાર્થના સ્થળો પર પહેલા પણ હુમલા થયા છે. આ વર્ષની શરૂઆતમાં મિશિગનના સિનેગોગ (યહૂદી પ્રાર્થના સ્થળ) ને નિશાન બનાવવામાં આવ્યું હતું. ટેમ્પલ ઇઝરાયલે સોશિયલ મીડિયા પર નિવેદન જાહેર કરીને સેન ડિએગોના ઇસ્લામિક સેન્ટરમાં થયેલી ઘટનાની નિંદા કરી છે. સિનેગોગના રબ્બી (યહૂદી ધર્મગુરુ) અત્યારે વોશિંગ્ટનમાં છે. તેઓ સમગ્ર અમેરિકામાં પ્રાર્થના સ્થળોની સુરક્ષામાં મદદ માટે ભંડોળ એકઠું કરી રહ્યા છે. તેમનો લક્ષ્યાંક એક અબજ ડોલર એકત્ર કરવાનો છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ