સિલવાસા,29 મે (હિ.સ.)

દાદરા અને નગર હવેલીના માનદોની ગામ વિસ્તારમાં મહાત્મા ગાંધી રાષ્ટ્રીય ગ્રામિણ રોજગાર ગેરંટી યોજના (મનરેગા) અંતર્ગત ચેકડેમ નિર્માણ કાર્યનું વિધિવત ભૂમિપૂજન અને ખાતમુહૂર્ત કરવામાં આવ્યું હતું. કાર્યક્રમમાં ગામના સરપંચ, જિલ્લા પંચાયતના સભ્યગણ તેમજ જિલ્લા પંચાયત અધ્યક્ષ નિશાબેન ભાવરે પૂજા-અર્ચના કરી વિકાસ કાર્યનો પ્રારંભ કરાવ્યો હતો.

આ પ્રસંગે ઉપસ્થિત જનપ્રતિનિધિઓએ જણાવ્યું હતું કે ચેકડેમનું નિર્માણ વિસ્તારના ખેડૂતો માટે ખૂબ જ લાભદાયક સાબિત થશે. ચેકડેમના નિર્માણથી વરસાદી પાણીનો સંગ્રહ શક્ય બનશે, જેના કારણે ભૂગર્ભ જળસ્તરમાં વધારો થશે અને ખેડૂતોને સિંચાઈ માટે પૂરતું પાણી ઉપલબ્ધ થશે.

તેમણે વધુમાં જણાવ્યું હતું કે જળસંચયના આ પ્રકારના પ્રોજેક્ટો ખેતીની ઉત્પાદકતા વધારવામાં મદદરૂપ બનશે અને ગ્રામ્ય અર્થતંત્રને પણ મજબૂત બનાવશે. સરકાર અને વહીવટી તંત્ર ગ્રામ્ય વિસ્તારોના સર્વાંગી વિકાસ અને ખેડૂતોના કલ્યાણ માટે સતત પ્રયત્નશીલ છે.

કાર્યક્રમ દરમિયાન મોટી સંખ્યામાં ગ્રામજનો ઉપસ્થિત રહ્યા હતા. ગામલોકોએ આ વિકાસ કાર્ય અંગે ખુશી વ્યક્ત કરી વહીવટી તંત્ર અને જનપ્રતિનિધિઓનો આભાર માન્યો હતો. સાથે જ ભવિષ્યમાં પણ ગામના વિકાસ અને જનસુવિધાઓને લગતા આવા કાર્યો સતત હાથ ધરવામાં આવે તેવી આશા વ્યક્ત કરી હતી.

આ પ્રસંગે ગ્રામ પંચાયતના હોદ્દેદારો, સ્થાનિક આગેવાનો, ગ્રામજનો અને અન્ય મહાનુભાવો ઉપસ્થિત રહ્યા હતા.

---------------

હિન્દુસ્થાન સમાચાર / Krishna Ghanshyam Jha