કચ્છ, 13 જૂન (હિ.સ.) : અંજાર શહેર અને આસપાસના વિસ્તારના મુસાફરો માટે એક મહત્વપૂર્ણ વિકાસરૂપે રૂ. ૪૮૫.૯૮ લાખના ખર્ચે નિર્માણ પામેલા નવા એસ.ટી. ડેપો-વર્કશોપનું ભવ્ય લોકાર્પણ ઉચ્ચ અને ટેક્નિકલ શિક્ષણ રાજ્યમંત્રી ત્રિકમભાઈ છાંગાના હસ્તે કરવામાં આવ્યું. આ આધુનિક સુવિધાસભર વર્કશોપ રાજ્યની જાહેર પરિવહન વ્યવસ્થાને વધુ કાર્યક્ષમ અને ગુણવત્તાસભર બનાવવાના પ્રયાસોમાં એક મહત્વપૂર્ણ સોપાન સાબિત થશે.

લોકાર્પણ સમારોહ દરમિયાન રાજ્યમંત્રી ત્રિકમભાઈ છાંગાએ જણાવ્યું હતું કે ગુજરાતમાં છેલ્લા કેટલાક વર્ષોમાં પરિવહન ક્ષેત્રે નોંધપાત્ર પરિવર્તન આવ્યું છે. રાજ્ય સરકારે જાહેર પરિવહનને વધુ સુલભ, સુરક્ષિત અને આધુનિક બનાવવા સતત પ્રયાસો કર્યા છે, જેના પરિણામે આજે લોકોનો એસ.ટી. સેવાઓ પ્રત્યેનો વિશ્વાસ વધુ મજબૂત બન્યો છે. તેમણે જણાવ્યું કે નવા વર્કશોપના કાર્યરત બનવાથી બસોના જાળવણી અને મરામતના કામમાં ઝડપ આવશે, જેના કારણે મુસાફરોને વધુ વિશ્વસનીય અને ગુણવત્તાસભર સેવાઓ મળી શકશે.

તેમણે વધુમાં જણાવ્યું કે વિકાસના માર્ગે આગળ વધતા ગુજરાતમાં માળખાકીય સુવિધાઓના વિસ્તરણને પ્રાથમિકતા આપવામાં આવી રહી છે. અંજાર ખાતે ઊભી થયેલી આ નવી સુવિધા માત્ર પરિવહન તંત્રને મજબૂત બનાવશે એટલું જ નહીં, પરંતુ કર્મચારીઓ માટે પણ વધુ સગવડભર્યું કાર્યપર્યાવરણ ઉપલબ્ધ કરાવશે. તેમણે નાગરિકો અને કર્મચારીઓને સકારાત્મક અભિગમ સાથે પોતાની જવાબદારીઓ નિભાવવાની અપીલ કરતાં જણાવ્યું કે જનસેવામાં ગુણવત્તા અને પ્રતિબદ્ધતા જ સાચી પ્રગતિનો આધાર છે.

કાર્યક્રમ દરમિયાન વડાપ્રધાન નરેન્દ્ર મોદીના જાહેર જીવન અને દેશસેવાના ૧૨ વર્ષ પૂર્ણ થવાના અવસરનો પણ ઉલ્લેખ કરવામાં આવ્યો હતો. રાજ્યમંત્રીશ્રીએ જણાવ્યું કે દેશના વિકાસ અને જનકલ્યાણ માટે થયેલા વિવિધ કાર્યોની ઉજવણી વચ્ચે અંજારને મળેલી આ નવી સુવિધા વિકાસયાત્રાની એક યાદગાર કડી બની રહેશે.

સમારોહમાં અંજાર નગરપાલિકા પ્રમુખ ધર્મિષ્ઠાબેન ખાંડેક, તાલુકા પંચાયત પ્રમુખ સંદીપ ચાવડા, નગરપાલિકા ઉપપ્રમુખ પરેશ માલસત્તર, કારોબારી ચેરમેન પ્રકાશ લોદરીયા, જિલ્લા પંચાયતના સભ્યો તેમજ વિવિધ વિભાગોના અધિકારીઓ અને આગેવાનો ઉપસ્થિત રહ્યા હતા. ઉપરાંત મોટી સંખ્યામાં નગરજનો પણ આ પ્રસંગના સાક્ષી બન્યા હતા.

નવા એસ.ટી. ડેપો-વર્કશોપના લોકાર્પણ સાથે અંજારમાં પરિવહન સેવાઓને નવી દિશા અને ગતિ મળવાની આશા વ્યક્ત કરવામાં આવી રહી છે. સ્થાનિક નાગરિકો માટે આ પ્રોજેક્ટ વિકાસના વધુ એક મજબૂત પગલાં તરીકે જોવામાં આવી રહ્યો છે, જે આગામી સમયમાં મુસાફરોને વધુ સારી અને સમયસર સેવાઓ ઉપલબ્ધ કરાવવામાં મહત્વપૂર્ણ ભૂમિકા ભજવશે.

---------------

હિન્દુસ્થાન સમાચાર / Rohit Ramjibhai Padhiyar