ફિલાડેલ્ફિયા, નવી દિલ્હી, 15 જૂન (હિ.સ.) ફીફા વર્લ્ડ કપ 2026ના ગ્રુપ-ઈ મુકાબલામાં આઇવરી કોસ્ટે, અંતિમ ક્ષણોમાં શાનદાર વાપસી કરતાં રવિવારે ઇક્વાડોરને 1-0થી હરાવી દીધો. મેચનો એકમાત્ર અને નિર્ણાયક ગોલ અમાદ ડિયાલોએ 90મા મિનિટમાં કર્યો.

મુકાબલા દરમિયાન સ્ટેડિયમમાં ઇક્વાડોરના સમર્થકોનો દબદબો સ્પષ્ટ દેખાઈ રહ્યો હતો. પીળા અને વાદળી રંગમાં રંગાયેલા દર્શકોએ સમગ્ર મેચ દરમિયાન પોતાની ટીમનું જોરદાર સમર્થન કર્યું, પરંતુ અંતે જીત આઇવરી કોસ્ટના ભાગે ગઈ.

ઇક્વાડોરે શરૂઆતથી જ આક્રમક રમત બતાવી અને અનેક સારા અવસરો ઊભા કર્યા. 24મા મિનિટમાં જોન યેબોઆનો જોરદાર શોટ ક્રોસબાર સાથે અથડાયો, જ્યારે છ મિનિટ બાદ એલન મિન્ડા પણ ગોલ કરવામાં ચૂકી ગયા અને તેમનો પ્રયાસ પણ પોળ સાથે અથડાયો.

બીજી તરફ, આઇવરી કોસ્ટે પણ કેટલાક અવસરો ઊભા કર્યા. એલી વાહીનો પ્રયાસ પોળ સાથે અથડાયો, જ્યારે સેકો ફોફાના અને ફ્રેન્ક કેસીએ મિડફિલ્ડમાં ટીમને મજબૂતી આપી.

જ્યારે મુકાબલો ગોલરહિત ડ્રો તરફ વધતો દેખાઈ રહ્યો હતો, ત્યારે 90મા મિનિટમાં વિલ્ફ્રેડ સિંગોએ શાનદાર મૂવ બનાવતાં બોલ અમાદ ડિયાલો સુધી પહોંચાડ્યો. ડિયાલોએ બોક્સની બહારથી ઉત્તમ નિયંત્રણ બતાવતા સચોટ શોટ લગાવ્યો અને બોલને નેટમાં પહોંચાડી આઇવરી કોસ્ટને જીત અપાવી.

જોકે ગોલ ડિયાલોએ કર્યો, પરંતુ મેચમાં આઇવરી કોસ્ટના યુવા ખેલાડી ઇયાન ડિયોમાંડેનું પણ શાનદાર પ્રદર્શન રહ્યું. તેમણે પોતાની ઝડપ અને આક્રમક રમતથી સતત ઇક્વાડોરની રક્ષા પંક્તિને પરેશાન કરી.

આ જીત સાથે આઇવરી કોસ્ટે ગ્રુપ-ઈમાં પોતાના અભિયાનની મજબૂત શરૂઆત કરી અને હવે તેના ત્રણ પોઈન્ટ થઈ ગયા છે. ટીમ અંકતાલિકામાં જર્મનીની બરાબરી પર પહોંચી ગઈ છે, જેણે પોતાના પહેલા મુકાબલામાં કુરાસાઓને 7-1થી હરાવ્યો હતો.

વળી, ઇક્વાડોર પર હવે આગામી મુકાબલામાં જીત મેળવવાનો દબાણ રહેશે, કારણ કે સતત અવસરો બનાવ્યા છતાં ટીમ અંક મેળવી શકી નથી.

હિંદુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ