નવી દિલ્હી, 20 જૂન (હિ.સ.) શાહિદ કપૂર, કૃતિ સેનન અને રશ્મિકા મંદાના અભિનીત ફિલ્મ 'કોકટેલ 2' એ, રિલીઝના પહેલા જ દિવસે બોક્સ ઓફિસ પર મજબૂત શરૂઆત કરીને દર્શકોનું ધ્યાન ખેંચ્યું છે. 19 જૂને સિનેમાઘરોમાં રિલીઝ થયેલી આ ફિલ્મને 'મેં વાપસ આઉંગા', 'ગવર્નર' અને 'ભારત ભાગ્ય વિધાતા' જેવી તાજેતરની ફિલ્મો સાથે સ્પર્ધા કરવી પડી હતી, પરંતુ તેમ છતાં ફિલ્મે પહેલા દિવસે બે આંકડામાં કમાણી નોંધીને પોતાની હાજરીનો અહેસાસ કરાવ્યો હતો.

ટ્રેડ રિપોર્ટ્સ અનુસાર, 'કોકટેલ 2' એ પહેલા દિવસે ઘરેલું બોક્સ ઓફિસ પર આશરે 13.50 કરોડ રૂપિયાનો બિઝનેસ કર્યો હતો. આ સાથે જ ફિલ્મે વર્ષ 2012માં આવેલી મૂળ ફિલ્મ 'કોકટેલ'ની પ્રથમ દિવસની કમાણીને પણ પાછળ છોડી દીધી છે. એટલું જ નહીં, શાહિદ કપૂરની અગાઉની ફિલ્મ 'ઓ રોમિયો'ના ઓપનિંગ ડે કલેક્શનને પણ પાછળ છોડીને આ ફિલ્મે વર્ષ 2026ની સૌથી મોટી બોલિવૂડ ઓપનિંગ્સની યાદીમાં ચોથું સ્થાન મેળવ્યું છે.

હોમી અદજાનિયાના નિર્દેશનમાં બનેલી આ ફિલ્મ આધુનિક સંબંધો, મિત્રતા અને પ્રેમની જટિલતાઓને દર્શાવે છે. જોકે સમીક્ષકો અને દર્શકો તરફથી ફિલ્મને મિશ્ર પ્રતિસાદ મળ્યો છે, પરંતુ કૃતિ સેનનના અભિનયની જોરદાર પ્રશંસા થઈ રહી છે. ઘણા દર્શકોએ તેના પાત્ર અને સ્ક્રીન પ્રેઝન્સને ફિલ્મની સૌથી મજબૂત કડી ગણાવી છે. દિનેશ વિજાન અને લવ રંજન દ્વારા નિર્મિત આ ફિલ્મ હવે વીકેન્ડમાં પોતાની કમાણી વધુ વધારવાની આશા રાખી રહી છે.

હિન્દુસ્થાન સમાચાર / લોકેશ ચંદ્ર દુબે / રામાનુજ શર્મા

હિન્દુસ્થાન સમાચાર / ડો.હિતેશ એન.વ્યાસ