નવી દિલ્હી, 22 જુલાઈ (હિ.સ.) ભારતીય સિનેમાની ક્લાસિક ફિલ્મોને નવી ટેકનોલોજી અને બહેતર ગુણવત્તા સાથે દર્શકો સુધી પહોંચાડવા માટે વિધુ વિનોદ ચોપરા ફિલ્મ્સ અને એનએચ સ્ટુડિયોઝે લાંબા ગાળાની વૈશ્વિક અધિકાર ભાગીદારીની જાહેરાત કરી છે. આ કરાર હેઠળ વિધુ વિનોદ ચોપરા ફિલ્મ્સની આખી ફિલ્મ લાઇબ્રેરીને 8કે રિઝોલ્યુશનમાં રિસ્ટોર કરવામાં આવી છે અને ડોલ્બી 5.1 સરાઉન્ડ સાઉન્ડ સાથે રીમાસ્ટર કરવામાં આવી છે. આ મહત્વાકાંક્ષી પ્રોજેક્ટને પૂરો થવામાં પાંચ વર્ષથી વધુ સમય લાગ્યો. ફિલ્મોનું પુનર્સ્થાપન મુંબઈની પ્રસાદ ફિલ્મ લેબ્સ અને ઇટાલીના બોલોનિયા સ્થિત એલ'ઇમાજિને રિટ્રોવાટા સ્ટુડિયોમાં કરવામાં આવ્યું. ઉલ્લેખનીય છે કે, આ ફિલ્મો 2026ની શરૂઆતથી કોઈપણ પ્લેટફોર્મ પર ઉપલબ્ધ નહોતી.

આ ભાગીદારી હેઠળ 'પરિંદા', '1942: એ લવ સ્ટોરી', 'કરીબ', 'મિશન કાશ્મીર', 'મુન્ના ભાઈ એમ.બી.બી.એસ.', 'પરિણીતા', 'લગે રહો મુન્ના ભાઈ', 'એકલવ્ય: ધ રોયલ ગાર્ડ', '3 ઇડિયટ્સ', 'ફરારી કી સવારી', 'બ્રોકન હોર્સીસ', 'વઝીર', 'એક લડકી કો દેખા તો ઐસા લગા' અને 'શિકારા' જેવી જાણીતી ફિલ્મોના વિશ્વવ્યાપી અધિકારોનું સંચાલન હવે એનએચ સ્ટુડિયોઝ કરશે. કંપની પહેલા આ ફિલ્મોને ફરીથી સિનેમાઘરોમાં રિલીઝ કરશે અને ત્યારબાદ તેમને ટેલિવિઝન, ઓટીટી, ફાસ્ટ ચેનલ તથા અન્ય ડિજિટલ પ્લેટફોર્મ પર ઉપલબ્ધ કરાવવામાં આવશે. આ કરાર પછી એનએચ સ્ટુડિયોઝની ફિલ્મ લાઇબ્રેરી 5,000થી વધુ ફિલ્મો સુધી પહોંચી ગઈ છે.

એનએચ સ્ટુડિયોઝના સ્થાપક નરેન્દ્ર હીરાવતે જણાવ્યું કે, વિધુ વિનોદ ચોપડાની ફિલ્મો ભારતીય સિનેમાની અમૂલ્ય ધરોહર છે અને તેમને નવી પેઢી સુધી શ્રેષ્ઠ તકનીકી ગુણવત્તા સાથે પહોંચાડવી તેમના માટે ગર્વની વાત છે. જ્યારે વિધુ વિનોદ ચોપડાએ કહ્યું કે, તેમની ફિલ્મોને સમય સાથે પણ સુસંગત રાખવી હંમેશા તેમની પ્રાથમિકતા રહી છે. તેમણે વિશ્વાસ વ્યક્ત કર્યો કે 8કે રિસ્ટોરેશન અને અત્યાધુનિક સાઉન્ડ સાથે દર્શકો આ કાલજયી ફિલ્મોનો પહેલા કરતા ક્યાંય સારો સિનેમેટિક અનુભવ પ્રાપ્ત કરશે.

હિન્દુસ્થાન સમાચાર / લોકેશ ચંદ્ર દુબે / સુનીત નિગમ

હિન્દુસ્થાન સમાચાર / માધવી વ્યાસ