વોશિંગ્ટન/તેહરાન, નવી દિલ્હી, 28 જુલાઈ (હિ.સ.). અમેરિકા અને ઈરાનની હઠને કારણે આંતરરાષ્ટ્રીય દરિયાઈ કોરિડોર હોર્મુઝ જળસંધિના ઉકળતા પાણીથી ઝઝૂમી રહેલા સમગ્ર મધ્ય પૂર્વ (પશ્ચિમ એશિયા) ને રાહતના સારા સમાચાર મળી શકે છે. અમેરિકી રાષ્ટ્રપતિ ડોનાલ્ડ ટ્રમ્પે કહ્યું કે વોશિંગ્ટનની તેહરાન સાથે ખૂબ જ મૈત્રીપૂર્ણ વાતચીત થઈ રહી છે. પરંતુ તેમણે સંકેત આપ્યો છે કે તેઓ લાંબી વાતચીત માટે તૈયાર નથી. તેઓ ઈચ્છે છે કે જે કંઈ પણ થાય તે જલ્દી થાય. આ અંગે ઈરાને કહ્યું કે અમેરિકા યુદ્ધમાંથી બહાર નીકળવાનો રસ્તો શોધવા માટે તડપી રહ્યું છે.

અલ જઝીરાના અહેવાલ મુજબ, આ મામલે ઈરાન સાવચેતીપૂર્વક, માપી-તોળીને અને વ્યવહારિક રીતે આગળ વધી રહ્યું છે. તે ઈચ્છે છે કે શાંતિ પાછી ફરે, પરંતુ અમેરિકાની મનસ્વી શરતો પર નહીં. ઈરાનના વિદેશ મંત્રાલયના પ્રવક્તાની સાપ્તાહિક પ્રેસ બ્રીફિંગમાં કહેવાયેલી આ કદાચ સૌથી મહત્વની વાત છે. ઈરાન મિશ્ર અને દ્વિપક્ષીય સંદેશ આપવાનો પ્રયાસ કરી રહ્યું છે કે તેહરાન ભવિષ્યમાં સંઘર્ષની પરિસ્થિતિઓનો સામનો કરવા માટે સંપૂર્ણપણે તૈયાર છે.

ઈરાનની સેનાના પ્રમુખે પણ આ જ વાતનું પુનરાવર્તન કર્યું છે. ઈરાન એ પણ કહી રહ્યું છે કે, રાજદ્વારીના દરવાજા ન તો સંપૂર્ણપણે ખુલ્લા છે કે ન તો સંપૂર્ણપણે બંધ, પરંતુ તે થોડા ખુલ્લા છે. બીજી તરફ, અમેરિકા એ સુનિશ્ચિત કરવા માંગે છે કે હોર્મુઝ જળસંધિ ફરીથી ખુલી જાય. ટ્રમ્પનું કહેવું છે કે, જો ઈરાન જીદ પર અડગ રહેશે તો તેની સામે કડક લશ્કરી કાર્યવાહીનો વિકલ્પ તેમની પાસે છે.

આ દરમિયાન ઇઝરાયેલના વડાપ્રધાન બેન્જામિન નેતન્યાહુ વોશિંગ્ટન પહોંચી ચૂક્યા છે. તેઓ ટ્રમ્પને મળશે તેવી અપેક્ષા છે. આ મુલાકાતમાં ઈરાન સાથે યુદ્ધનો મુદ્દો સૌથી મહત્વનો હોઈ શકે છે. જ્યારે, સાઉદી અરેબિયાએ ઇરાકમાં ઈરાન સમર્થિત જૂથોના ડ્રોન હુમલાની નિંદા કરી છે. આ જૂથોએ રિયાધ અને પૂર્વીય પ્રાંતમાં તેલ સુવિધાઓને નિશાન બનાવી છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ