તેહરાન/વોશિંગ્ટન, નવી દિલ્હી, 27 જુલાઈ (હિ.સ.). મધ્ય પૂર્વ (પશ્ચિમ એશિયા) માં હુમલાઓ તો અટકી ગયા છે, પરંતુ હોર્મુઝ જળસંધિમાં સ્થિતિ તણાવપૂર્ણ બની રહી છે. હોર્મુઝમાં એક તેલ ટેન્કર બારુદી સુરંગ સાથે ટકરાયા બાદ જોરદાર ધમાકો થયો છે. અમેરિકાએ હાલ પૂરતું ઈરાન વિરુદ્ધના પોતાના હુમલાઓ રોકી દીધા છે. તેહરાનને પણ લગભગ બે અઠવાડિયાની બોમ્બવર્ષા બાદ આ વિસ્તારમાં પોતાના વળતા હુમલાઓ રોકવા પડ્યા છે.

અલ જઝીરા અને સીબીએસ ન્યૂઝના અહેવાલ મુજબ, અમેરિકી રાષ્ટ્રપતિ ડોનાલ્ડ ટ્રમ્પે સેના પાસે દારૂગોળો ઓછો હોવાના અહેવાલોને સદંતર નકારી કાઢ્યા છે. ઈરાની વિદેશ મંત્રાલયના પ્રવક્તા ઈસ્માઈલ બઘાઈનું કહેવું છે કે અમેરિકા અગાઉની વાતચીતનો ભંગ કરી ચૂક્યું છે. તેમ છતાં, તેહરાન અને વોશિંગ્ટન મધ્યસ્થીઓ દ્વારા સંદેશાઓની આપ-લે કરી રહ્યા છે.

ઈરાનના અધિકારીઓએ પુષ્ટિ કરી છે કે, હોર્મુઝ જળસંધિમાંથી પસાર થવાનો પ્રયાસ કરી રહેલું એક તેલ ટેન્કર બારુદી સુરંગો સાથે ટકરાયા બાદ ધમાકાનો ભોગ બન્યું છે. આ ટેન્કર ઈરાની અધિકારીઓની સૂચનાઓની અવગણના કરીને આગળ વધી રહ્યું હતું. હોર્મુઝમાં આ ઘટના બે દિવસની શાંતિ બાદ બની છે.

સંયુક્ત રાષ્ટ્રમાં અમેરિકી રાજદૂત માઈક વોલ્ટ્ઝે રવિવારે જણાવ્યું કે, ઈરાનના સૈન્ય ઠેકાણાઓ પર સતત 13મી રાત અમેરિકી હુમલાઓ બાદ ટ્રમ્પ પ્રશાસને રાજદ્વારી પ્રયાસોને ધ્યાનમાં રાખીને અનિશ્ચિત સમય સુધી હુમલાઓ રોકવાનો નિર્ણય કર્યો છે. બીજી તરફ, પાકિસ્તાન, કતાર અને મધ્ય પૂર્વના અન્ય દેશો અમેરિકા અને ઈરાનને ફરી શાંતિના ટેબલ પર લાવવાનો પ્રયાસ કરી રહ્યા છે.

ઈરાની સેનાએ પણ કહ્યું કે, તેણે મધ્ય પૂર્વમાં અમેરિકાના સહયોગી દેશો પર વળતા હુમલાઓ રોકી દીધા છે. અમેરિકી રાષ્ટ્રપતિ ડોનાલ્ડ ટ્રમ્પે 'ટ્રુથ સોશિયલ' પર આર્ટિફિશિયલ ઇન્ટેલિજન્સ (એઆઈ) દ્વારા નિર્મિત કેટલીક તસવીરો શેર કરી છે. આમાં અમેરિકાની સૈન્ય તાકાત દર્શાવવામાં આવી છે અને તેને દુનિયાનો રક્ષક ગણાવવામાં આવ્યો છે. આ તસવીરો અમેરિકાની રાજકીય મહત્વાકાંક્ષાને પણ રેખાંકિત કરે છે.

હિન્દુસ્થાન સમાચાર / મુકુન્દ

હિન્દુસ્થાન સમાચાર / ડો.હિતેશ એન.વ્યાસ