નવી દિલ્હી, 12 ઓગસ્ટ (હિ.સ.) કેન્દ્રીય ગૃહમંત્રી અમિત શાહે બુધવારે વિપક્ષ પર સંસદની કાર્યવાહી ખોરવવાનો આરોપ લગાવતા કહ્યું કે, સરકાર દરેક મુદ્દે ચર્ચા કરવા માટે તૈયાર છે. તેમણે કહ્યું કે, વિપક્ષ આજે બપોરે ત્રણ વાગ્યા સુધી લોકસભા અધ્યક્ષને ચર્ચા માટે પત્ર આપે, સરકાર ત્રણ વાગ્યાથી બીજા દિવસે ત્રણ વાગ્યા સુધી ચર્ચા કરાવવા માટે તૈયાર છે અને તેઓ પોતે પણ ગૃહમાં હાજર રહીને તમામ પ્રશ્નોના જવાબ આપશે.

શાહે સંસદ પરિસરમાં પત્રકારો સાથેની વાતચીતમાં કહ્યું કે, સંસદનું ચોમાસુ સત્ર શરૂ થયા બાદથી તેઓ નિયમિત રીતે સંસદ આવી રહ્યા છે અને પોતાના કક્ષમાં હાજર રહે છે, પરંતુ વિપક્ષ બંને ગૃહોની કાર્યવાહી ચાલવા દેતો નથી. આવી સ્થિતિમાં ગૃહની અંદર જઈને પણ શું કરી શકાય. તેમણે કહ્યું કે, હવે જનતાએ નક્કી કરવું જોઈએ કે ખરેખર કોણ ભાગી રહ્યું છે.

ગૃહમંત્રીએ કહ્યું કે, સંસદીય કાર્યમંત્રી કિરણ રિજિજુ પહેલેથી જ સ્પષ્ટ કરી ચૂક્યા છે કે, સરકાર નીટ સંબંધિત વિદ્યાર્થીઓના વિરોધ-પ્રદર્શનના તમામ પાસાઓ પર ચર્ચા કરવા માટે તૈયાર છે. તેમણે કહ્યું કે, વિપક્ષની શરૂઆતની માંગ હતી કે ચર્ચા માટે સમય નક્કી કરવામાં આવે અને સરકાર તેના માટે સંમત થાય. તેઓ પોતે પણ સંસદમાં ઉઠાવવામાં આવતા દરેક પ્રશ્નનો જવાબ આપવા માટે તૈયાર છે, પરંતુ વિપક્ષ ચર્ચા થવા જ નથી દેવા માંગતો.

તેમણે કહ્યું કે, સરકાર પાસે છુપાવવા માટે કંઈ નથી. શાહે કહ્યું કે, સરકાર માત્ર નિવેદન આપવાને બદલે સંસદીય નિયમો અને સ્થાપિત પ્રક્રિયાઓ હેઠળ વિસ્તૃત ચર્ચાના પક્ષમાં છે. તેમણે કહ્યું કે, ગંભીર વિષયો પર સંસદમાં વિગતવાર ચર્ચા થાય છે અને એ જ સંસદીય રીત છે.

શાહે કહ્યું કે, તેઓ ચર્ચા આજે બપોરે ત્રણ વાગ્યાથી શરૂ કરીને બીજા દિવસે ત્રણ વાગ્યા સુધી ચાલુ રાખવા માટે તૈયાર છે. જરૂર પડે તો મોડી રાત સુધી ગૃહમાં બેસીને ચર્ચા ચાલુ રાખવા માટે પણ તેઓ તૈયાર છે. તેમણે એટલું પણ કહ્યું કે, જો લોકસભા અધ્યક્ષ મંજૂરી આપે તો પ્રશ્નકાળ સ્થગિત કરીને ચર્ચાને આગળ વધારી શકાય છે.

તેમણે કહ્યું કે, તેઓ સમગ્ર ચર્ચા દરમિયાન ગૃહમાં બેસશે, તમામ સભ્યોની વાતો સાંભળશે, મહત્વપૂર્ણ મુદ્દાઓ પર નોંધ લેશે અને દરેક પ્રશ્નનો જવાબ આપશે, જેથી દેશની જનતા સામે સમગ્ર મામલાની સચ્ચાઈ સ્પષ્ટ થઈ શકે.

ગૃહમંત્રીએ વિપક્ષને કહ્યું કે, હવે તેને નક્કી કરવું છે કે, તે સંસદમાં ચર્ચા કરવા માંગે છે કે હોબાળો મચાવવો. તેમણે કહ્યું કે વડાપ્રધાન નરેન્દ્ર મોદીના નેતૃત્વવાળી ભાજપ સરકાર અને રાષ્ટ્રીય જનતંત્રિક ગઠબંધન (રાજગ) સરકાર દરેક મુદ્દે ચર્ચા કરવા માટે તૈયાર છે. વિપક્ષે સંસદની કાર્યવાહી ચાલવા દેવી જોઈએ.

શાહે આ પણ કહ્યું કે, ‘ગાયબ’ અને ‘ભાગી ગયા’ જેવા શબ્દો તાજેતરના સમયમાં દેશના જાહેર અને સંસદીય વાદવિવાદમાં વધુ સાંભળવા મળવા લાગ્યા છે. તેમણે વિપક્ષ દ્વારા તેમની સંસદમાં હાજરીને લઈને ઉઠાવવામાં આવતા પ્રશ્નોના સંદર્ભમાં કહ્યું કે, તેઓ સત્ર શરૂ થયા બાદથી સતત સંસદ આવી રહ્યા છે અને ગૃહની કાર્યવાહી ચાલવાની સ્થિતિમાં તમામ પ્રશ્નોના જવાબ આપવા માટે તૈયાર છે.

હિન્દુસ્થાન સમાચાર / સુશીલ કુમાર / સચિન બુધૌલિયા

હિન્દુસ્થાન સમાચાર / ડો.હિતેશ એન.વ્યાસ