કાઠમંડુ, નવી દિલ્હી, 14 ઓગસ્ટ (હિ.સ.). નેપાળના રોલ્પા જિલ્લાના થબાડ ગાઉંપાલિકા, ઉવા કોટલબારમાં થયેલા ભૂસ્ખલનમાં અત્યાર સુધીમાં 10 લોકોના મોત થયા છે. પોલીસના જણાવ્યા અનુસાર, તેમાંથી પાંચ મૃતદેહ ઘટનાસ્થળેથી મળી આવ્યા હતા. અન્ય પાંચ મૃતદેહ પૂરના તેજ પ્રવાહને કારણે પ્યુઠાન પહોંચ્યા હતા. મૃતકોમાં 5 વર્ષના બાળકથી લઈને 85 વર્ષના વૃદ્ધ સુધીનો સમાવેશ થાય છે.

કોટલબાર ગામના ઉપરના ભાગમાં ભારે ભૂસ્ખલન થયું છે. તેના કાટમાળની ઝપેટમાં આવવાથી ગામના 11 ઘર દબાઈ ગયા. જણાવવામાં આવ્યું છે કે, મોટા પાયે જાનહાનિ થઈ છે. ત્રણ લોકો હજુ પણ ગુમ હોવાનું જણાવાયું છે. તેમની શોધખોળ ચાલુ છે. કાટમાળની ઝપેટમાં આવવાથી 22 વર્ષીય હિમાલ પુન મગર અને 25 વર્ષીય સંજય ઘર્તી ઘાયલ થયા. તેમણે જ રાત્રે પોલીસના ઇમરજન્સી નંબર 100 પર ફોન કરીને ઘટનાની જાણકારી આપી હતી. બંનેની બુટવલમાં સારવાર ચાલી રહી છે.

ઘટનાસ્થળેથી 18 વર્ષીય શાંતિ પુન મગર, 60 વર્ષીય કમલબહાદુર પુન મગર, 80 વર્ષીય મનરખી પુન મગર, 75 વર્ષીય ડલબહાદુર પુન મગર અને 85 વર્ષીય હસ્તકલા રોકા મગરના મૃતદેહ મળી આવ્યા છે. જિલ્લા પોલીસ કાર્યાલયના સૂચના અધિકારી અને પોલીસ નિરીક્ષક કૃષ્ણ શ્રેષ્ઠના જણાવ્યા અનુસાર, રોલ્પાની લુંગ્રી નદી અને પ્યુઠાનની માડી નદીના વિવિધ સ્થળોએથી પણ પાંચ લોકોના મૃતદેહ મળી આવ્યા છે.

પ્યુઠાનમાં મળેલા મૃતદેહોની ઓળખ 38 વર્ષીય જુન કુમારી પુન મગર, 5 વર્ષીય અશોક પુન મગર, 80 વર્ષીય બલબહાદુર પુન મગર, 66 વર્ષીય મની પુન મગર અને 34 વર્ષીય મહેન્દ્ર ઘર્તી તરીકે થઈ છે. પોલીસ નિરીક્ષક શ્રેષ્ઠે જણાવ્યું કે 9 ઘર, એક દુકાન, બે ગોઠ અને એક ચર્ચ સંપૂર્ણપણે કાટમાળમાં દબાઈ ગયા છે. ઘટનાસ્થળે રાહત અને બચાવ અભિયાન ચાલુ છે.

હિન્દુસ્થાન સમાચાર / પંકજ દાસ / મુકુંદ

હિન્દુસ્થાન સમાચાર / ડો.હિતેશ એન.વ્યાસ