ઇસ્લામાબાદ, નવી દિલ્હી, 21 ઓગસ્ટ (હિ.સ.). રાવલપિંડીની આદિયાલા જેલ (રાવલપિંડી સેન્ટ્રલ જેલ) માં ઓગસ્ટ 2023 થી બંધ પદભ્રષ્ટ વડાપ્રધાન ઇમરાન ખાનને, આખરે શિફા આંતરરાષ્ટ્રીય હોસ્પિટલ, ઇસ્લામાબાદ લઈ જવામાં આવ્યા. એક પોલીસ અધિકારીએ જણાવ્યું કે, સર્વોચ્ચ અદાલતના આદેશ પર સમયમર્યાદા પૂરી થાય તે પહેલાં પાકિસ્તાન તહરીક-એ-ઇન્સાફ (પીટીઆઈ) ના સ્થાપક ઇમરાન ખાનને કડક સુરક્ષા વચ્ચે હોસ્પિટલ પહોંચાડવામાં આવ્યા.

ધ ન્યૂઝ અને જિયો ન્યૂઝના અહેવાલ મુજબ, હવે નિષ્ણાત ચિકિત્સકોની ટીમ ખાનને દાખલ કરવા અંગે નિર્ણય લેશે. ઇમરાન ખાન શિફા પહોંચે તે પહેલાં પોલીસ મહાનિરીક્ષક સૈયદ અલી નાસિર રિઝવીએ ત્યાંની મુલાકાત લઈને સુરક્ષા વ્યવસ્થાનું નિરીક્ષણ કર્યું. સર્વોચ્ચ અદાલતે મંગળવારે આદેશ આપ્યો હતો કે પૂર્વ વડાપ્રધાનને બે દિવસની અંદર જેલમાંથી હોસ્પિટલ પહોંચાડવામાં આવે. આ નિર્ણયથી નારાજ થયેલી સંઘીય સરકારે સર્વોચ્ચ અદાલતના નિર્ણય વિરુદ્ધ બુધવારે પુનર્વિચાર અરજી દાખલ કરી.

શિફા હોસ્પિટલની બહાર સુરક્ષાના કડક બંદોબસ્ત કરવામાં આવ્યા છે અને વિસ્તારમાં ભારે પોલીસ બળ તૈનાત કરવામાં આવ્યું છે. હોસ્પિટલ નજીક રોડ કિનારે ઉભેલી ગાડીઓને પણ હટાવવામાં આવી છે. પોલીસે આદિયાલા જેલમાંથી ઇમરાન ખાનને લઈ જતા પહેલાં પીટીઆઈના અધ્યક્ષ બેરિસ્ટર ગોહર ખાનને ઔપચારિક સૂચના આપી.

73 વર્ષીય ઇમરાન ખાનને ઘણા કેસોમાં દોષિત ઠેરવવામાં આવ્યા છે. એપ્રિલ 2022 માં અવિશ્વાસ પ્રસ્તાવ પછી પદભ્રષ્ટ કરાયેલા ખાનને ઘણા ગંભીર કેસોનો સામનો કરવો પડી રહ્યો છે. આ દરમિયાન, પીટીઆઈના મહાસચિવ સલમાન અકરમ રાજાએ જણાવ્યું કે, એ કહેવું વહેલું ગણાશે કે ઇમરાનને હોસ્પિટલમાંથી તેમના બાની ગાલા નિવાસસ્થાને રાખવામાં આવશે. તેમણે કહ્યું કે, કોઈપણ ઇમારતને ઉપ-જેલ જાહેર કરી શકાય છે. તેમણે કહ્યું કે, જો ચિકિત્સકો આ નિષ્કર્ષ પર પહોંચે કે તેમને પાછા જેલમાં મોકલવા તેમની તબિયત માટે નુકસાનકારક હશે, તો આવા નિર્ણય પર વિચાર કરી શકાય છે.

સર્વોચ્ચ અદાલતે મંગળવારે પોતાના નિર્ણયમાં આદિયાલા જેલના અધિકારીઓને નિર્દેશ આપ્યો કે તેઓ પીટીઆઈના સ્થાપકને તપાસ અને સારવાર માટે બે દિવસની અંદર શિફા હોસ્પિટલ મોકલે. અદાલતે ઇમરાનની તપાસ અને સારવાર માટે ચિકિત્સકોની વિશેષ ટીમ (તબીબી મંડળ) ગઠિત કરવાનો પણ આદેશ આપ્યો. સાથે જ, એ પણ નિર્દેશ આપવામાં આવ્યો કે તપાસ અને સારવાર દરમિયાન ડો. ઉઝમા અને પૂર્વ વડાપ્રધાનના અંગત ચિકિત્સક હાજર રહે. આ બધાનો ખર્ચ તેમનો પરિવાર ઉઠાવશે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ